Ma nekeʼkʼutuk ebʼ li ixq saʼ xyanqebʼ laj testiiw re li Jehobʼa?

Heeheʼ. Chixjunilebʼ laj testiiw re li Jehobʼa nekeʼkʼutuk malaj nekeʼpuktesink, ut saʼ xyanqebʼ wank chi miyon ebʼ li ixq. Joʼkan naq, li Santil Hu naxye: «Naabʼalebʼ li ixq xeʼyehok [malaj nekeʼyehok] resil» (Salmo 68:12, Li Santil Hu, Sociedad Bíblica de Guatemala).

Ebʼ li ixq li wankebʼ choʼq aj testiiw re li Jehobʼa nekeʼxkʼam rehebʼ rikʼinebʼ li ixq li wankebʼ resil saʼ li Santil Hu (Proverbios 31:10-31). Usta moko xaqabʼanbʼilebʼ ta chi xbʼaanunkil junaq li kʼanjel saʼ li chʼuut, chi sahebʼ saʼ xchʼool nekeʼtzʼaqonk chi xpuktesinkil li yaal ut nekeʼxbʼaanu jun li nimla kʼanjel naq nekeʼxkʼut li yaal rehebʼ li xkokʼal (Proverbios 1:8). Ut rikʼinebʼ li raatin ut ebʼ li xbʼaanuhom, nekeʼxyal xkanabʼankil jun chaabʼil eetalil choʼq rehebʼ li junchʼol (Tito 2:3-5).