7 Kʼut li chaabʼil naʼlebʼ

KʼARU NARAJ XYEEBʼAL?

Li xbʼaanuhom jun li kristiʼaan aʼan li chaabʼil naʼlebʼ li nabʼeresink re saʼ li xyuʼam. Ma nakaayal aaqʼe re naq junelik taaye li yaal? Wi joʼkan nakatnaʼlebʼak, chʼolchʼo naq nakaawaj naq ebʼ laakokʼal teʼxkʼam rehebʼ aawikʼin.

Jun li kristiʼaan li chaabʼil xbʼaanuhom aj kʼanjelak, natawok u ut inkʼaʼ nasikʼok u, ebʼ li naʼlebʼ aʼin natzolmank saʼ li saajilal.

LI NAʼLEBʼ LI NAXKʼE LI SANTIL HU: «Kʼe xnaʼlebʼebʼ li kokʼ poyanam naq toj saajebʼ; ut naq toxeʼtixq, inkʼaʼ taasachq saʼ xchʼoolebʼ» (Proverbios 22:6).

KʼAʼUT WANK XWANKIL?

Li chaabʼil bʼaanuhom naʼajmank re roksinkil li Internet. Li xKaryn jun li naʼbʼej naxye: «Saʼ xkʼabʼaʼ naq ebʼ li qakokʼal nekeʼroksi li selular malaj li tableta yalaq joqʼe naru teʼxkʼe ribʼ saʼ xiwxiwal. Usta chunchukebʼ chiqakʼatq naru naq yookebʼ rilbʼal jun li yibʼ aj naʼlebʼ».

LI NAʼLEBʼ LI NAXKʼE LI SANTIL HU: «Li ak ninqebʼ, aʼanebʼ li keʼxkʼaytesi li xkʼaʼuxl chi xtawbʼal ru bʼar wank li us ut bʼar wank li inkʼaʼ us» (Hebreos 5:14).

Aajel ru naq taawoksi ebʼ li chaabʼil aatin. Anaqwan qʼaxal wank xwankil xyeebʼal «bʼaanu usilal» ut «bʼanyox» joʼ ajwiʼ xkʼebʼal qachʼool chirixebʼ li junchʼol. Aʼin inkʼaʼ chik naʼilmank anaqwan xbʼaan naq ebʼ li kristiʼaan nekeʼxik xchʼool chirixebʼ li xkʼanjelobʼaal chʼiichʼ.

LI NAʼLEBʼ LI NAXKʼE LI SANTIL HU: «Joʼ chanru teeraj teʼxbʼaanu eere ebʼ li poyanam, joʼkan ajwiʼ chebʼaanuhaq laaʼex rehebʼ aʼan» (Lucas 6:31).

KʼARU TATRUUQ XBʼAANUNKIL?

Ye chi chʼolchʼo ru kʼaru li chaabʼil bʼaanuhom nakaayuʼami. Ak kitzʼilmank rix naq maare ebʼ li saaj inkʼaʼ teʼxmux ribʼ wi saʼebʼ li rochoch nekeʼkʼuteʼk chiru naq li naʼlebʼ aʼin moko us ta.

LI TATRUUQ XBʼAANUNKIL: Oksi jun li esil li tojaʼ xaawabʼi re naq tat-aatinaq chirix li chaabʼil bʼaanuhom. Jun eetalil, wi nakaawabʼi naq xkʼulmank jun li maaʼusilal saʼ xkʼabʼaʼ li tzʼeqtaanank naru taaye: «Xiwalej ru aʼan! Kʼaʼut nakaaye naq ebʼ li kristiʼaan nekeʼxbʼaanu aʼan?».

«Re naq ebʼ li alal kʼajolbʼej teʼnaʼlebʼaq chiʼus tento naq teʼxnaw kʼaru li us ut li inkʼaʼ us» (Brandon).

Kʼut chiruhebʼ li chaabʼil naʼlebʼ. Ebʼ li toj kokʼebʼ naru ajwiʼ teʼxtzol xyeebʼal «bʼaanu usilal» ut «bʼanyox» joʼ ajwiʼ xkʼebʼal xchʼool chirixebʼ li junchʼol. Li hu Parenting Without Borders (Padres sin fronteras) naxye: «Wi ebʼ li kokʼal nekeʼxkʼe reetal naq nekeʼtzʼaqonk saʼ li junkabʼal, saʼ li tzolebʼaal ut saʼ li teep inkʼaʼ nekeʼchʼaʼajkoʼk chiru xtenqʼankilebʼ li junchʼol».

LI TATRUUQ XBʼAANUNKIL: Tenebʼ saʼ xbʼeen laakokʼal jun li kʼanjel re naq teʼxkʼe reetal naq jwal aajel ru naq teʼtenqʼanq.

«Wi ebʼ laakokʼal teʼxtzol kʼanjelak saʼ li ochoch inkʼaʼ tchʼaʼajkoʼq chiruhebʼ naq teʼkanaaq xjunes. Xbʼaan naq ak kʼaynaqebʼ xbʼaanunkil li tenebʼanbʼil saʼ xbʼeenebʼ» (Tara).