Sikʼ li naʼlebʼ li naxye li yaal
Li chʼaʼajkilal
Wank sut li tzʼeqtaanank nachalk xbʼaan naq kʼebʼil roq ruqʼ junaq li esil. Qilaq wiibʼ oxibʼ li eetalil:
Wankebʼ li patron nekeʼxkʼoxla naq ebʼ li ixq inkʼaʼ nekeʼruuk xbʼaanunkil ebʼ li kʼanjel rikʼin li kʼanjelobʼaal chʼiichʼ chi moko li xkʼanjelebʼ laj chamalnawom.
Naabʼalebʼ nekeʼxye naq li wankebʼ saʼ kʼalebʼaal ebʼ aj kalajenaq ut qʼemebʼ. Naq yook chaq li nimla rahobʼtesiik saʼ ruqʼebʼ laj nazi, kiyeemank ajwiʼ li tikʼtiʼ chirixebʼ laj judiiy naq saʼ xkʼabʼaʼebʼ kiʼosoʼk li tumin saʼ Alemania. Saʼ li wiibʼ chi eetalil aʼin, nakʼutunk xkawilal li tzʼeqtaanank. Wiibʼ oxibʼ rehebʼ li tzʼeqtaanank aʼin toj wank saʼebʼ li qakutan.
Naabʼalebʼ li qas qiitzʼin nekeʼxkʼoxla naq chixjunilebʼ li poyanam li inkʼaʼ tzʼaqalebʼ re ru junelik rahebʼ saʼ xchʼool ut yookebʼ xjosqʼil.
Li nekeʼxpaabʼ li yoobʼanbʼil naʼlebʼ aʼin, nekeʼxchap aʼin choʼq eetalil re xyeebʼal naq yaal li nekeʼxkʼoxla, ut nekeʼxye naq maakʼaʼebʼ xnaʼlebʼ li inkʼaʼ nekeʼxkʼulubʼa li xkʼaʼuxebʼ.
Li naʼlebʼ li naxkʼe li Santil Hu
«Li seebʼ xkʼaʼuxl naxsikʼ li chaabʼil naʼlebʼ; aʼut li jip junes memil naʼlebʼ naxsikʼ» (PROVERBIOS 15:14).
Kʼaru naraj xyeebʼal? Wi inkʼaʼ naqanaw chixjunil li yaal, toopaltoʼq. Wi kaʼajwiʼ naqabʼi li nekeʼxseeraqʼi qe ut inkʼaʼ naqanaw chanru xwank chi tzʼaqal, inkʼaʼ sa tqilebʼ li junchʼol.
Chanru natenqʼank xsikʼbʼal li naʼlebʼ li naxye li yaal
Naq naqanawebʼ ru chiʼus ebʼ li qas qiitzʼin, inkʼaʼ naqapaabʼ li tikʼtiʼ li nekeʼxye chirixebʼ. Ut, naq xqanaw naq tikʼtiʼ li xeʼxye qe chirix jun siir li qas qiitzʼin, chʼolchʼo naq inkʼaʼ chik tqapaabʼ li xeʼxye qe chirix li jun siir chik.
Li tatruuq xbʼaanunkil
Wi jun li poyanam inkʼaʼ us xnaʼlebʼ, aʼin inkʼaʼ naraj xyeebʼal naq joʼkanebʼ chixjunil.
Kʼulubʼa naq inkʼaʼ nakaanaw chixjunil chirixebʼ li junchʼol.
Sikʼ li naʼlebʼ li naxye li yaal.