Ebʼ li naʼlebʼ li tooxtenqʼa re naq sahaq saʼ qachʼool rikʼin li kʼaru wank qe

Chatkʼanjelaq chi kaw

«Chixyalaq bʼan xqʼe chi kʼanjelak saʼ tiikilal rikʼin ruqʼ, re naq twanq kʼaru tixwotz rikʼin li wank saʼ rajbʼal ru» (EFESIOS 4:28).

Laj Yobʼtesinel naraj naq tqil li kʼanjel joʼ jun li chaabʼil naʼlebʼ. Kʼaʼut? Xbʼaan naq jun li kristiʼaan li nakʼanjelak chi kaw sa saʼ xchʼool xbʼaan naq naxchʼolani ut naxwenteni li xjunkabʼal. Naru ajwiʼ xtenqʼankil junaq li wank saʼ rajbʼal ru. Ebʼ li patron nekeʼroxloqʼi ebʼ li nekeʼkʼanjelak chi kaw ut aʼin naxbʼaanu naq moko teʼisiiq ta saʼebʼ li xkʼanjel. Wank xyaalal naq li Santil Hu naxye naq li usilal li nekeʼxtaw ebʼ li nekeʼkʼanjelak chi kaw, aʼan li maatan «li nachalk rikʼin li Yos» (Eclesiastés 3:13).

Moobʼalaqʼik

«Naqanaw naq saq ru li qachʼool qakʼaʼuxl, xbʼaan naq inkʼaʼ naqaj bʼalaqʼik chi moko elqʼak saʼ chixjunil li naqabʼaanu» (HEBREOS 13:18, TNM).

Wi inkʼaʼ nokoobʼalaqʼik sa tqekʼa qibʼ, tuqtuuq ru li qachʼool ut maakʼaʼ tchʼiʼchʼiʼinq re li qakʼaʼuxl. Joʼkan ajwiʼ, ebʼ li junchʼol tooʼeʼroxloqʼi ut teʼxkʼojobʼ xchʼool qikʼin. Ebʼ li kristiʼaan li nekeʼbʼalaqʼik inkʼaʼ nekeʼoxloqʼiik chi moko ebʼ li junchʼol nekeʼxkʼojobʼ xchʼool rikʼinebʼ. Ebʼ li kristiʼaan aʼin nekeʼchʼiʼchʼiʼiiʼk xbʼaan li xkʼaʼuxl ut junelik yookebʼ xxiw saʼ xkʼabʼaʼ naq inkʼaʼ nekeʼraj naq ebʼ li junchʼol teʼxnaw li yookebʼ xbʼaanunkil.

Maakanabʼ naq li tumin jwal wanq xwankil saʼ laayuʼam

«Mexrahink li bʼihomal, kʼojkʼooq bʼan eechʼool rikʼin li kʼaru wank eere» (HEBREOS 13:5).

Naʼajmank li tumin re xloqʼbʼal li qatzakahemq ut jalan chik li kʼaʼaq re ru abʼan li jwal xuwajel aʼan xraabʼal li tumin. Junaq li kristiʼaan naru naxkʼe chixjunil li xhoonal ut li xmetzʼew kaʼajwiʼ re xsikʼbʼal xkomon li xbʼihomal. Wi naxbʼaanu aʼin naru tixkʼe saʼ chʼaʼajkilal li xsumlajik, maakʼaʼaq chik xhoonal re wank rikʼinebʼ li ralal xkʼajol, joʼ ajwiʼ naru tyajerq (1 Timoteo 6:9, 10). Joʼkan ajwiʼ, junaq li kristiʼaan li naxik xchʼool chirix li tumin naru nabʼalaqʼik. Jun li winq li wank xnawom kixye: «Li tiik xchʼool, naabʼalebʼ nekeʼosobʼtesink re; aʼut li nabʼihomoʼk chi junpaat, toxtoj rix li xmaak» (Proverbios 28:20).

Li chaabʼil tzolok

«Kol li naʼlebʼ li qʼaxal nakʼanjelak ut li seebʼal kʼaʼuxl» (PROVERBIOS 3:21, TNM).

Li chaabʼil tzolok nokooxtenqʼa re naq ebʼ li kristiʼaan teʼruuq xkʼojobʼankil xchʼool qikʼin ut re naq ebʼ li naʼbʼej yuwaʼbʼej chaabʼil teʼnaʼlebʼaq. Abʼan rikʼin li tzolok aʼin moko chʼolchʼo ta naq tqataw li sahil chʼoolejil chi moko tooruuq xchaabʼilobʼresinkil li qawanjik. Re naq us tooʼelq saʼ li qayuʼam, naʼajmank li chaabʼil naʼlebʼ li nachalk rikʼin li Yos. Li Santil Hu naxye naq ebʼ li kristiʼaan li nekeʼxyuʼami li naxye li Yos «us nekeʼelk rikʼin chixjunil li nekeʼxbʼaanu» (Salmo 1:1-3).