Kʼaʼut naq naqakʼul li rahilal, nokootixk ut nokookamk?

Saʼ xkʼabʼaʼ li xbʼeen winq ut ixq

«Xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam» (ROMANOS 5:12).

Li Yos kixyobʼtesi laj Adán ut li xʼEva chi tzʼaqal re ru ebʼ li xyuʼam. Kixkʼe rehebʼ jun li chaabʼil naʼaj saʼ Ruuchichʼochʼ, li chʼinaʼusil naʼajej Edén. Kixye ajwiʼ rehebʼ naq naru teʼxtzeka li ru chixjunil ebʼ li cheʼ abʼan wank jun li inkʼaʼ raj keʼxchʼeʼ. Abʼanan laj Adán ut li xʼEva inkʼaʼ keʼabʼink ut keʼxtzaka ru li cheʼ ut chi joʼkan keʼmaakobʼk (Génesis 2:15-17; 3:1-19). Saʼ xkʼabʼaʼ naq inkʼaʼ keʼabʼink, li Yos kirisi laj Adán ut li xʼEva saʼ li chʼinaʼusil naʼajej. Chalen li kutan aʼan jwal kaw chik li xwanjikebʼ. Saʼ xnumikebʼ li chihabʼ keʼwank ralal xkʼajol ut aʼanebʼ ajwiʼ kaw li xwanjikebʼ. Chixjunilebʼ keʼtiixk ut keʼkamk (Génesis 3:23; 5:5). Joʼkan naq chiqajunilo nokooyajerk, nokootixk ut nokookamk xbʼaan naq laj Adán ut li xʼEva, aʼanebʼ xbʼeen qanaʼ qayuwaʼ.

Saʼ xkʼabʼaʼ ebʼ li maaʼus aj musiqʼej

«Chixjunil li ruuchichʼochʼ wank rubʼel xwankil li maaʼus» (1 JUAN 5:19).

«Li maaʼus» aʼan laj Tza, jun li ánjel li kixqʼet ribʼ chiru li Yos (Juan 8:44; Apocalipsis 12:9). Saʼ xnumikebʼ li kutan junchʼol chik chi ánjel xeʼxtaqe laj Tza ut aʼanebʼ li maaʼus aj musiqʼej. Ebʼ li maaʼus aj musiqʼej aʼin nekeʼroksi ebʼ li xwankil re xbʼalaqʼinkilebʼ li kristiʼaan ut xnajtobʼresinkilebʼ rikʼin li Yos, joʼ ajwiʼ nekeʼokenk chirix li maaʼusilal li nekeʼxbʼaanu ebʼ li qas qiitzʼin (Salmo 106:35-38; 1 Timoteo 4:1). Laj Tza ut ebʼ li maaʼus aj musiqʼej nekeʼsahoʼk xchʼool naq naqakʼul junaq li rahilal.

Saʼ xkʼabʼaʼ li naqabʼaanu

«Li kʼaru naraw li winq, aʼan ajwiʼ li tixqʼol» (GÁLATAS 6:7).

Chiqajunilo naqakʼul li rahilal xbʼaan li maak li xqechani rikʼin laj Adán ut xbʼaan xmaaʼusilal laj Tza li wank saʼ xbʼeen li Ruuchichʼochʼ. Abʼan wank sut laaʼo ajwiʼ naqakʼam chaq li rahilal saʼ qabʼeen. Joʼkan ajwiʼ naq naqabʼaanu junaq li chaabʼil naʼlebʼ naqataw rusilal, abʼan naq naqabʼaanu junaq li yibʼru aj naʼlebʼ naqakʼam chaq rahilal saʼ qabʼeen. Jun eetalil, jun li yuwaʼbʼej li inkʼaʼ nabʼalaqʼik, kaw nakʼanjelak ut naxra li rixaqil ut ebʼ li ralal xkʼajol naxbʼaanu naq li xjunkabʼal sahaq saʼ xchʼool. Abʼanan, wi naxbʼatzʼunle li tumin, nakalaak ut inkʼaʼ naraj kʼanjelak tixbʼaanu naq li xjunkabʼal tkanaaq saʼ nebʼaʼil. Joʼkan naq us naq tqayuʼami li chaabʼil naʼlebʼ li naxkʼe qe laj Yobʼtesinel, xbʼaan naq aʼan naraj naq tqataw rusilal li chaabʼil naʼlebʼ re naq toowanq «saʼ tuqtuukilal» (Salmo 119:165).

Saʼ xkʼabʼaʼ naq wanko «saʼ rosoʼjikebʼ li kutan»

«Saʼ rosoʼjikebʼ li kutan [...]. Ebʼ li winq junes rehebʼ teʼraj, teʼxrahi ru li tumin [...], aj qʼetolaqebʼ raatin xnaʼ xyuwaʼ [...], inkʼaʼ teʼxkuy ribʼ, qʼaxal josqʼaqebʼ, xikʼ teʼril li chaabʼilal» (2 TIMOTEO 3:1-5).

Saʼebʼ li qakutan, naabʼalebʼ li qas qiitzʼin nekeʼnaʼlebʼak joʼ naxye li raqal ut aʼin naxkʼutbʼesi naq wanko «saʼ rosoʼjikebʼ li kutan». Li Santil Hu kixye ajwiʼ naq saʼebʼ li qakutan twanq ebʼ li yalok u, li weʼej, ebʼ li ninqi hiik ut ebʼ li yajel (Mateo 24:3, 7, 8; Lucas 21:10, 11). Xbʼaan aʼin naabʼalebʼ li kristiʼaan nekeʼxkʼul li rahilal ut nekeʼkamk.