Kʼaru yook chi kʼulmank rikʼin roxloqʼinkil li junchʼol?

KʼAʼUT WANK XWANKIL ROXLOQʼINKIL LI JUNCHʼOL

• Li Santil Hu naxye: «Li nasumenk rikʼin qʼunil aatin, naxkotz li josqʼil; aʼut li nasumenk saʼ josqʼil, naxnimobʼresi li chʼaʼajkilal» (Proverbios 15:​1, SBG). Ebʼ li aatin ut ebʼ li naʼlebʼ li inkʼaʼ naxkʼut li oxloqʼink naxkʼeʼ xsiʼul junaq li xaml. Ut naq nabʼaanumank aʼin, qʼaxal ra nakʼulmank.

• Li Jesús kixye: «Li naʼelk saʼ re junaq li qas qiitzʼin aʼan li wank saʼ xchʼool» (Mateo 12:34). Wi inkʼaʼ sa naqaatinahebʼ li junchʼol malaj naqakutebʼ chi aatin, wank tana jun li nimla chʼaʼajkilal li yook chi chʼiʼchʼiʼink re li qachʼool. Chi joʼkaʼin yooqo xkʼutbʼesinkil li naqekʼa chirixebʼ li jalanebʼ xyuʼam, xwanjik, xkʼalebʼaal malaj xtenamit. Wi joʼkan, laaʼo tento tqajal qakʼaʼuxl.

  Tojeʼ xpatzʼeʼk re numenaq 32,000 li qas qiitzʼin li wankebʼ saʼ 28 li tenamit chanru nekeʼril li oxloqʼink, li 65% kixye naq xuwajel rilbʼal naq saʼebʼ li qakutan maaʼani chik naʼoxloqʼink.

LI TATRUUQ XBʼAANUNKIL

Maakʼaʼ naxye rikʼin ani yooqat chi aatinak, tento taawoxloqʼi. Taawoxloqʼi ajwiʼ li junchʼol usta inkʼaʼ nekeʼkʼoxlak joʼ laaʼat. Sikʼ bʼar wank ebʼ li naʼlebʼ li textenqʼa chi wank saʼ aatin ut chi joʼkan inkʼaʼ tatraqoq aatin saʼ xbʼeenebʼ chi moko twechʼ rixebʼ.

Bʼaanu rehebʼ li junchʼol li twulaq raj chaawu naq teʼxbʼaanu aawe. Wi tuulanat ut chaabʼil nakatnaʼlebʼak rikʼinebʼ li junchʼol, maare joʼkan ajwiʼ tateʼril laaʼat.

Kuyun maak. Kʼoxla naq li qas qiitzʼin inkʼaʼ kiraj xrahobʼtesinkil aachʼool. Ut wi jun li qas qiitzʼin naxye malaj naxbʼaanu aawe junaq li naʼlebʼ li tixtochʼ bʼayaq laachʼool, kuy xmaak.

LI NAQABʼAANU JOʼ AJ TESTIIW RE LI JEHOBʼA

Maakʼaʼ naxye bʼar wanko malaj bʼar yooko chi kʼanjelak, laaʼo joʼ aj testiiw re li Jehobʼa naqoxloqʼi chixjunilebʼ li qas qiitzʼin ut naqakʼut li chaabʼil naʼlebʼ aʼin chiruhebʼ li junchʼol re naq teʼxbʼaanu ajwiʼ.

Chi sibʼil naqatzolebʼ li qas qiitzʼin chirix li Santil Hu maakʼaʼ naxye chanru li xwanjikebʼ, abʼan maajunwa naqaminebʼ ru re naq teʼkʼoxlaq joʼ laaʼo chi moko naqaminebʼ ru re naq teʼxpaabʼ li naqapaabʼ. Ut joʼ naxye li Santil Hu, naqawotz li naqapaabʼ, abʼan naqabʼaanu «saʼ tuulanil» ut naqoxloqʼihebʼ li nekeʼabʼink qe (2 Timoteo 2:24; 1 Pedro 3:15).

Inkʼaʼ naqakʼulubʼa li tzʼeqtaanank. Joʼkan naq, chi sa qachʼool naqakʼulebʼ saʼebʼ li qachʼutam li nekeʼraj xtzolbʼal li Santil Hu, maakʼaʼ naxye chanru li xwanjikebʼ. Naqakʼe qachʼool chi xkʼulbʼalebʼ ut chi «[roxloqʼinkilebʼ] li jalan jalanq chi qas qiitzʼin» (1 Pedro 2:17).

Naqoxloqʼi xwankil li awabʼejilal li wank saʼ li qateep (Romanos 13:1). Naqapaabʼ li naxye li chaqʼrabʼ ut naqakʼe li tumin li nachʼutubʼamank choʼq rehebʼ li awabʼej. Joʼkan ajwiʼ, usta inkʼaʼ nokootzʼaqonk chirix li xʼawabʼejilal li ruuchichʼochʼ, maajunwa naqanimebʼ li junchʼol re naq teʼnaʼlebʼaq joʼ laaʼo, naqakanabʼ bʼan naq teʼxbʼaanu li nekeʼraj.