Laj Enoc Maakʼaʼ Xxiw

NAQ keʼok chi tamk li qas qiitzʼin saʼ Ruuchichʼochʼ, naabʼalebʼ maaʼusebʼ xnaʼlebʼ joʼ laj Cain. Abʼan kiwank jun winq chaabʼil xnaʼlebʼ, aj Enoc xkʼabʼaʼ. Li winq aʼin, kaw xchʼool chi kʼanjelak chiru li Yos. Inkʼaʼ kixkanabʼ xkʼanjel usta ebʼ li poyanam maaʼusebʼ xnaʼlebʼ.

Ma nakaanaw kʼaʼut naq yookebʼ xbʼaanunkil li maaʼusilal? Chaajultika: ani kibʼaanunk re, naq laj Adan ut xʼEva teʼxqʼet Raatin li Yos ut teʼxlow ru li cheʼ? Aʼan jun musiqʼej inkʼaʼ us xnaʼlebʼ. Li Santil Hu naxye naq aʼan laj Tza. Laj Tza naraj naq chiqajunilo tqabʼaanu li maaʼusilal.

Li Jehobʼa kixye re laj Enoc naq tixye rehebʼ li qas qiitzʼin naq twulaq xqʼehil naq li Yos tixsach li maaʼusebʼ xnaʼlebʼ. Kʼajoʼ tana keʼpoʼk naq keʼrabʼi li esil aʼin. Maare keʼraj xkamsinkil laj Enoc. Joʼkan naq tento kawaq xchʼool laj Enoc chi xyeebʼal resil li Yos.

Laj Enoc moko najt ta kiwank saʼ xyanqebʼ li maaʼusebʼ xnaʼlebʼ. Joʼkan naq, kikamk naq wank 365 chihabʼ re. Kʼaʼut naqaye naq moko najt ta kiwank laj Enoc? Xbʼaan naq saʼebʼ li kutan aʼan, ebʼ li poyanam kawebʼ ribʼ ut li xyuʼamebʼ nawulak toj 800 malaj 900 chihabʼ. Jun eetalil aʼan li ralal laj Enoc, laj Matusalen. Aʼan kikamk naq wank 969 chihabʼ re.

Naq kikamk laj Enoc kinumtaak li maaʼusilal. Li Santil Hu naxye naq ‹junes maaʼusilal wank saʼ xchʼoolebʼ li poyanam›.

Ma nakaanaw kʼaʼut naq kinumtaa li chʼaʼajkilal? Xbʼaan naq laj Tza kixtaw jun chik li naʼlebʼ re naq ebʼ li poyanam teʼxbʼaanu xkomon li maaʼusilal. Chanru kixbʼaanu aʼin laj Tza?