Laj Noe ut li Jukubʼ Kabʼl

LAJ Noe kiwank rixaqil ut oxibʼ ralal. Li xkʼabʼaʼebʼ li ralal aʼan aj Sem, aj Cam ut aj Jafet. Ebʼ li ralal wankebʼ rixaqil. Joʼkan naq waqxaqibʼebʼ saʼ li xjunkabʼal laj Noe.

Li Yos kixkʼe jun xkʼanjel laj Noe. Kixye re, naq tixyiibʼ jun nimla jukubʼ kabʼl chanchan jun nimla kaax ut najt roq. Li Yos kixye: ‹Oxibʼ tasal ru taabʼaanu›. Kixye ajwiʼ re, naq tixyiibʼ xnaʼaj li xjunkabʼal, xnaʼajebʼ li xul ut xnaʼaj li tzakahemq.

Li Yos kixye re laj Noe naq tixyiibʼ chiʼus li jukubʼ kabʼl re naq inkʼaʼ t-oq haʼ chisaʼ. Kixye li Yos: ‹Tintaqla chaq jun nimla bʼutʼihaʼ ut tinsach chixjunil li wank saʼ Ruuchichʼochʼ. Li maaʼanihaq chisaʼ li jukubʼ kabʼl tkamq›.

Laj Noe ut ebʼ li ralal keʼxpaabʼ li Yos ut keʼok chi kabʼlak. Abʼan, ebʼ li poyanam keʼok xseʼenkil ut moko keʼxkanabʼ ta xbʼaanunkil li maaʼusilal. Maaʼani kipaabʼank re laj Noe.

Naabʼal chihabʼ kiʼajmank re xyiibʼankil li jukubʼ kabʼl xbʼaan naq kʼajoʼ xnimal. Naq ak xaqli li jukubʼ kabʼl, li Yos kixye re laj Noe naq troksihebʼ li xul, teelom ut ixq. Wankebʼ kixchʼikebʼ saʼ wuqutk. Joʼkan ajwiʼ, troksihebʼ jalan jalanq xpaayil li xul li nekeʼrupupik. Laj Noe kixbʼaanu chixjunil joʼ kiyeheʼk re xbʼaan li Yos.

Chirix chik aʼan, laj Noe ut li xjunkabʼal keʼok ajwiʼ saʼ li jukubʼ kabʼl. Ut li Yos kixtzʼap li okebʼaal. Laj Noe ut li xjunkabʼal keʼoybʼeenink saʼ li jukubʼ kabʼl. Wi wankat raj ajwiʼ saʼ li jukubʼ kabʼl, maare xaaye raj: Ma tchalq tawiʼ li bʼutʼihaʼ?