Chanru Kikoleʼk laj Moises?

ANI li kʼuulaʼal yook chi yaabʼak? Aʼan laj Moises. Ma nakaanaw ani li ixqaʼal li wank chiru laj Moises? Aʼan xrabʼin laj Faraon.

Naq kiyoʼlaak laj Moises kimuqeʼk xbʼaan li xnaʼ re naq inkʼaʼ tkamsiiq. Li xnaʼ laj Moises naxnaw naq ebʼ laj Egipto teʼxtaw li xkʼuulaʼal. Joʼkan naq, ma nakaanaw kʼaru kixkʼul laj Moises naq wank oxibʼ po re?

Li xnaʼ laj Moises kixyiibʼ chiʼus jun li chakach re naq inkʼaʼ t-oq haʼ chisaʼ. Kixkʼe laj Moises saʼ li chakach ut kixkanabʼ chaq saʼ xbʼeen li pim, chire li nimaʼ Nilo. Li xMiriam, ranabʼ laj Moises, kikanaak saʼ pim re rilbʼal kʼaru tixkʼul li riitzʼin.

Chirix chik aʼan, li xrabʼin laj Faraon kiwulak chi atink saʼ li nimaʼ ut kiril li chakach. Tojaʼ naq kixye re jun rehebʼ li xmoos: ‹Kʼam chaq we li chakach aʼan›. Naq li xrabʼin laj Faraon kixte re li chakach, kiril jun li kʼuulaʼal kʼajoʼ xchʼinaʼusal! Laj Moises yook chi yaabʼak. Joʼkan naq li xrabʼin laj Faraon kiyotʼeʼk xchʼool chi rilbʼal ut inkʼaʼ kiraj naq tkamsiiq.

Li xMiriam xko chixkʼatq li xrabʼin laj Faraon ut kixye re: ‹Ma taawaj naq tinbʼoq chaq junaq ixq aj Israel re naq tixkʼirisi li kʼuulaʼal?›

Li xrabʼin laj Faraon kixye re xMiriam: ‹Ayu, bʼaanu usilal!›

Li xMiriam kixye chaq re li xnaʼ. Naq li xnaʼ kiwulak rikʼin xrabʼin laj Faraon, kiyeheʼk re: ‹Kʼam li kʼuulaʼal aʼin ut tatintoj chi rilbʼal›.

Chi joʼkan laj Moises kikʼirisiik xbʼaan li xnaʼ. Naq kinimank laj Moises, kikʼameʼk xbʼaan li xnaʼ saʼ rochoch laj Faraon. Chirix chik aʼan, li xrabʼin laj Faraon kikanaak choʼq xnaʼ laj Moises. Joʼkan naq laj Moises kikʼiik saʼ rochoch laj Faraon.