Laj Moises Kisutqʼiik Egipto

NAQ laj Moises kiwulak Egipto, kiʼaatinak rikʼin laj Aaron, li ras, chirixebʼ li eetalil. Ut naq laj Moises ut laj Aaron keʼxkʼut ebʼ li eetalil aʼin chiruhebʼ laj Israel, chixjunilebʼ keʼxpaabʼ naq li Jehobʼa kitaqlank chaq rehebʼ.

Chirix chik aʼan, laj Moises ut laj Aaron keʼwulak rikʼin laj Faraon ut keʼxye re: ‹Li Jehobʼa, li xYos laj Israel kixye: Kanabʼebʼ chi xik lintenamit saʼ li chaqichʼochʼ chiru oxibʼ kutan, re naq teʼxloqʼoni wu›. Laj Faraon kichaqʼok: ‹Inkʼaʼ ninpaabʼ li Jehobʼa ut inkʼaʼ tinkanabʼebʼ chi xik laj Israel!›

Laj Faraon yook xjosqʼil xbʼaan naq ebʼ laj Israel keʼraj oxibʼ kutan re xloqʼoninkil li Jehobʼa. Joʼkan naq, kixmimebʼ ru chi kʼanjelak. Ebʼ laj Israel keʼxye naq laj Moises wank re, naq laj Faraon kiʼok xrahobʼtesinkilebʼ. Joʼkan naq laj Moises kirahoʼk saʼ xchʼool. Li Jehobʼa kixye re laj Moises: ‹Tinbʼaanu naq laj Faraon tixkanabʼ chi xik lintenamit›.

Naq laj Moises ut laj Aaron, kohebʼ wiʼ chik rikʼin laj Faraon keʼxbʼaanu jun li eetalil. Laj Aaron kixkut li xcheʼ chiru laj Faraon ut li cheʼ kisutqʼiik choʼq kʼantiʼ. Chirix chik aʼan ebʼ laj qʼe li nekeʼkʼanjelak chiru laj Faraon, keʼxkut ajwiʼ ebʼ li xcheʼ ut keʼsutqʼiik ajwiʼ choʼq kʼantiʼ. Abʼan, li xkʼantiʼ laj Aaron kiʼok xnuqʼbʼalebʼ li xkʼantiʼ ebʼ laj qʼe. Usta laj Faraon kiril li eetalil aʼin inkʼaʼ kixkanabʼebʼ chi xik laj Israel.

Joʼkan naq kiwulak xkutankil naq li Jehobʼa kixkʼut xjosqʼil chiru laj Faraon. Ma nakaanaw kʼaru kixbʼaanu? Kixkʼam chaq 10 li rahilal saʼ xbʼeenebʼ laj Egipto.

Naq yookebʼ xkʼulbʼal ebʼ li rahilal, laj Faraon kixbʼoq laj Moises ut kixye re: ‹Xaaqabʼ li rahilal ut tinkanabʼebʼ chi xik laj Israel›. Naq kixaqli li rahilal, inkʼaʼ kixkanabʼebʼ chi xik. Toj saʼ xlaje li rahilal, laj Faraon kixkanabʼ chi xik li xtenamit li Jehobʼa.

Qilaq saʼ li jun chik tzolom li 10 chi rahilal li kixtaqla li Yos saʼ xbʼeenebʼ laj Egipto.