Laj Josue aj Kʼamol Bʼe

LAJ Moises kiraj ok saʼ li tenamit Canaan rochbʼeenebʼ laj Israel. Joʼkan naq kixye re li Jehobʼa: ‹Kanabʼin chi numeʼk saʼ junpaakʼal li nimaʼ Jordan re naq twil li chaabʼil chʼochʼ›. Li Jehobʼa kixye re laj Moises: ‹Kanabʼ xyeebʼal aʼan!› Ma nakaanaw kʼaʼut kixye aʼin li Jehobʼa?

Xbʼaan naq laj Moises ut laj Aaron inkʼaʼ keʼxkʼe xloqʼal li Jehobʼa naq kiʼelk chaq li haʼ saʼ li pek. Joʼkan naq li Jehobʼa kixye naq inkʼaʼ teʼoq saʼ li tenamit Canaan.

Wuqubʼ po xkamik laj Aaron naq li Jehobʼa kixye re laj Moises: ‹Kʼam laj Josue ut kʼe chiru laj Eleazar, laj tij, ut chiru li tenamit. Chiru li tenamit taaye naq laj Josue tjolominq rehebʼ›. Saʼ li eetalil nakʼutunk naq laj Moises yook xbʼaanunkil joʼ kiyeheʼk re xbʼaan li Jehobʼa.

Tojaʼ naq li Jehobʼa kixye re laj Josue: ‹Kawaq aachʼool ut matxuwak. Laaʼat tatkʼamoq rehebʼ laj Israel saʼ li tenamit Canaan li xinyeechiʼi rehebʼ. Laaʼin wanqin aawikʼin!›

Chirix chik aʼan, li Jehobʼa kixye re laj Moises naq taaxik saʼ li tzuul Nebo re li naʼajej Moab. Saʼ li tzuul aʼin, laj Moises kiril chixjunil rusilal li tenamit Canaan. Li Jehobʼa kixye re laj Moises: ‹Aʼin li chʼochʼ xinyeechiʼi rehebʼ li ralal xkʼajol laj Abrahan, laj Isaac ut laj Jacob. Xatinkanabʼ chi rilbʼal, abʼan inkʼaʼ tat-oq aran›.

Laj Moises kikamk saʼ li tzuul Nebo naq wank 120 chihabʼ re. Toj kaw ribʼ ut saqenk naʼilok. Naq kikamk laj Moises kʼajoʼ naq keʼrahoʼk saʼ xchʼool ebʼ laj Israel ut keʼyaabʼak chirix! Anaqwan laj Josue tjolominq rehebʼ, joʼkan naq sahebʼ wiʼ chik saʼ xchʼool.