Ebʼ laj Gabaon

NAABʼALEBʼ li tenamit re Canaan yookebʼ xkawresinkil ribʼ re xqʼaxbʼal ruhebʼ laj Israel saʼ li yalok. Abʼan ebʼ laj Gabaon keʼxkʼoxla naq li Yos wank rikʼinebʼ laj Israel. Joʼkan naq inkʼaʼ keʼraj yalok rikʼinebʼ. Xbʼaan naq keʼxkʼoxla naq wi teʼxbʼaanu, teʼyaloq rikʼin li Yos. Ma nakaanaw kʼaru keʼxbʼaanu laj Gabaon?

Ebʼ laj Gabaon keʼxyoobʼ naq najt keʼchalk chaq. Joʼkan naq, keʼxkʼe chirixebʼ pejel tʼikr ut pejel xaabʼ. Keʼxkʼe qʼeel iiq saʼ xbʼeenebʼ li xbʼuur ut kawil kaxlan wa keʼxkʼam chirixebʼ. Naq keʼwulak rikʼin laj Josue keʼxye re: ‹Najt nokoochalk chaq. Wanko arin, xbʼaan naq xqabʼi resil naq nim xwankil leeYos, Jehobʼa. Xqabʼi li kixbʼaanu cheerix naq kexʼelk chaq Egipto. Joʼkan naq ebʼ li nekeʼjolomink saʼ li qatenamit, keʼxye qe naq tqakʼam chaq qawa ut toochalq xyeebʼal eere: Naqaj wank choʼq eemoos ut mexyalok qikʼin. Kʼeemaq reetal naq najt nokoochalk xbʼaan naq pejel chik li qatʼikr ut qaxaabʼ ut moko us ta chik li qawa!›

Laj Josue ut ebʼ laj jolominel keʼxpaabʼ rehebʼ laj Gabaon. Joʼkan naq keʼxye rehebʼ naq inkʼaʼ teʼyaloq rikʼinebʼ. Abʼan, naq kinumeʼk oxibʼ kutan ebʼ laj Israel keʼxnaw naq moko najt ta li xtenamitebʼ laj Gabaon.

Tojaʼ naq laj Josue kixye rehebʼ: ‹Kʼaʼut naq xeeye qe naq najt nekexchalk?›

Ebʼ laj Gabaon keʼxye: ‹Xqabʼi resil naq leeYos, Jehobʼa, kixyeechiʼi xkʼeebʼal eere li tenamit Canaan. Joʼkan naq xooxuwak ut xqakʼoxla naq naru tooʼeekamsi›. Ebʼ laj Israel inkʼaʼ keʼxkamsi ebʼ laj Gabaon, abʼan keʼxkanabʼ choʼq xmoosebʼ.

Li awabʼej re Jerusalen kichalk xjosqʼil xbʼaan naq ebʼ laj Gabaon keʼxkʼe ribʼ saʼ aatin rikʼinebʼ laj Israel. Joʼkan naq li awabʼej aʼin, kixye rehebʼ kaahibʼ chik chi awabʼej: ‹Chineetenqʼa chi yalok rikʼinebʼ laj Gabaon›. Joʼkan naq ebʼ li oobʼ chi awabʼej keʼyalok rikʼinebʼ laj Gabaon. Ma us naq ebʼ laj Gabaon keʼxkʼe ribʼ saʼ aatin rikʼinebʼ laj Israel?