Laj Gedeon ut Ebʼ li 300 chi Winq

ANIHEBʼ li winq wankebʼ saʼ li eetalil? Aʼanebʼ laj puubʼ re Israel. Ut li winq li yook rilbʼal chanru nekeʼukʼak ebʼ laj Israel, aʼan laj Gedeon. Laj Gedeon aj raqol aatin re Israel.

Ma nakaakʼe reetal naq jalan jalanq nekeʼukʼak ebʼ laj Israel? Wankebʼ nekeʼxkubʼsi ribʼ saʼ haʼ. Abʼan, ma nakaanaw kʼaʼut naq jun rehebʼ li winq inkʼaʼ naxkubʼsi xjolom naq yook chi ukʼak? Xbʼaan naq chi joʼkan tixkʼe reetal kʼaru yook chi kʼulmank saʼ li xsutam. Li xnaʼlebʼ li winq aʼin us, xbʼaan naq li Jehobʼa kixye re laj Gedeon naq tixsikʼebʼ ru kaʼajwiʼ li inkʼaʼ nekeʼxkubʼsi xjolom naq nekeʼukʼak. Ut li nekeʼxkubʼsi xjolom teʼsutqʼiiq saʼebʼ li rochoch. Qilaq kʼaʼut naq li Yos kixye aʼin.

Ebʼ laj Israel wankebʼ wiʼ chik saʼ chʼaʼajkilal, xbʼaan naq inkʼaʼ keʼabʼink chiru li Jehobʼa. Ebʼ laj Madian kawebʼ ribʼ ut nekeʼxrahobʼtesi laj Israel. Joʼkan naq ebʼ laj Israel keʼtijok chiru li Jehobʼa re naq tixtenqʼahebʼ. Li Jehobʼa kirabʼi li keʼxtzʼaama chiru.

Li Jehobʼa kixye re laj Gedeon naq tixsikʼ jun chʼuut chi winq. Joʼkan naq laj Gedeon kixchʼutubʼ 32.000 ebʼ laj puubʼ. Abʼan 135.000 teʼyaloq saʼ xbʼeenebʼ laj Israel. Li Jehobʼa kixye re laj Gedeon: ‹Naabʼalebʼ laj puubʼ xaachʼutubʼ›. Kʼaʼut naq li Jehobʼa kixye aʼin?

Li Jehobʼa inkʼaʼ kiraj naq teʼxkʼoxla naq moko aajel ta naq aʼan ttenqʼank rehebʼ naq teʼyaloq saʼ xbʼeenebʼ laj Madian. Joʼkan naq kixye re laj Gedeon: ‹Ye rehebʼ li yookebʼ xxiw naq teʼsutqʼiiq saʼebʼ li rochoch›. Joʼkan naq 22.000 keʼsutqʼiik. Kaʼaj chik 10.000 ebʼ aj Israel keʼkanaak rikʼin laj Gedeon. Abʼan 135.000 xkʼihalebʼ laj Madian li teʼyaloq saʼ xbʼeenebʼ laj Israel!

Li Jehobʼa kixye wiʼ chik re laj Gedeon: ‹Toj naabʼal laj puubʼ chaawu!› Joʼkan naq li Jehobʼa kixye re laj Gedeon naq tixkʼehebʼ chi ukʼak ebʼ laj Israel chire li haʼ. Chixjunilebʼ li teʼxkubʼsi ribʼ chi ukʼak, teʼsutqʼiiq saʼebʼ li rochoch. Chirix chik aʼan li Jehobʼa kixye re laj Gedeon: ‹Tinqʼaxtesihebʼ laj Madian saʼ laawuqʼ ut saʼ ruqʼebʼ li 300 chi winq li inkʼaʼ keʼxkubʼsi xjolom naq keʼukʼak›.

Naq xwulak xkutankil li yalok, laj Gedeon kixjekʼihebʼ li 300 chi winq saʼ oxibʼ chʼuut. Kixkʼe rehebʼ li junjunq xxukubʼ ut xkukebʼ rikʼin xaml. Ak wulak re xtuqtuukil li qʼoqyink naq laj Gedeon ut ebʼ li 300 chi winq keʼxsut chixjunil xnaʼajebʼ laj Madian. Keʼxyaabʼasi li xxukubʼ ut keʼxjor li xkukebʼ. Tojaʼ naq keʼxye: ‹Xoochalk saʼ xkʼabʼaʼ li Jehobʼa ut laj Gedeon!› Naq keʼajk ru ebʼ laj Madian keʼsach xnaʼlebʼ, keʼxuwak ut keʼelelik. Joʼkan naq ebʼ laj Israel keʼelk chiʼus saʼ li yalok.