Li Naʼajej li Naxyeechiʼi li Yos

MA NAKAAWIL li sahilal naʼajej? Aʼin tana li naʼajej kixkʼut li Jehobʼa chiru laj Isaias. Laj Isaias aj kʼanjel chiru li Yos. Maaʼani chik laj Jonas naq kiwank laj Isaias.

Kʼajoʼ xchʼinaʼusal li naʼajej aʼin! Kʼaru nachalk saʼ aachʼool naq nakaawil li naʼajej aʼin? Li sahilal naʼajej, li kixkʼe li Yos re laj Adan ut xʼEva. Abʼan, ma tchʼinaʼusoʼq tawiʼ chixjunil li Ruuchichʼochʼ?

Li Jehobʼa kixye re laj Isaias naq tixtzʼiibʼa chanruhaq li akʼ Ruuchichʼochʼ li tixkʼe li Yos re li xtenamit. Li Yos kixye re laj Isaias: ‹Li xojbʼ ut li karneer teʼwanq saʼ tuqtuukilal. Li saaj wakax ut li kaqkoj junaj teʼichajibʼq ut jun chʼinaʼal t-iloq rehebʼ. Maakʼaʼ tixkʼul li kʼuulaʼal naq tbʼatzʼunq chi xkʼatq li kʼantiʼ›.

Wankebʼ naru teʼxye naq aʼin maajunwa tkʼulmanq. Xbʼaan naq junelik wank li rahilal ut li chʼaʼajkilal. Abʼan kʼoxlan chirix aʼin, chanru li naʼajej kixkʼe li Yos re laj Adan ut xʼEva?

Li Yos kixkʼe laj Adan ut xʼEva saʼ jun chʼinaʼusil naʼajej, abʼan keʼxsach xbʼaan naq keʼxqʼet Raatin li Yos. Joʼkan naq keʼcheekobʼk ut keʼkamk. Li Yos naxyeechiʼi rehebʼ li nekeʼrahok re, jun li chʼinaʼusil naʼaj joʼ li kixkʼe re laj Adan ut li xʼEva.

Saʼ li akʼ Ruuchichʼochʼ maaʼani chik trahobʼtesinq, chi moko tixbʼaanu ta li maaʼusilal. Twanq tuqtuukilal. Ebʼ li qas qiitzʼin sahaqebʼ saʼ xchʼool ut maaʼani chik tyajerq joʼ kiwank chaq saʼ xtiklajik. Moqon chik tqatzol chanru tixchʼinaʼusa li Yos chixjunil li Ruuchichʼochʼ.