Toj Kachʼin ut Wank Xnaʼlebʼ

MA NAKAANAW ani li chʼinaʼal yook chi aatinak rikʼinebʼ li winq? Li chʼinaʼal aʼan li Jesus ut wank 12 chihabʼ re. Ut ebʼ li winq aʼanebʼ li nekeʼkʼutuk saʼ li Rochoch li Yos aran Jerusalen.

Sachso xchʼool keʼkanaak ebʼ li winq xbʼaan naq li Jesus naxnaw chirix li Yos ut chirix li Santil Hu. Abʼan, bʼar wank laj Jose ut li xMaria? Kʼaʼut maaʼanihebʼ rikʼin li Jesus?

Rajlal chihabʼ laj Jose kixkʼamebʼ li xjunkabʼal saʼ li tenamit Jerusalen re xnimankil li Paswa. Najt wank li tenamit Nazaret ut maakʼaʼ li bʼelebʼaal chʼiichʼ. Chi roqebʼ nekeʼxik ut chiru oxibʼ kutan tana nekeʼwulak saʼ li tenamit Jerusalen.

Nim li xjunkabʼal laj Jose ut tento naq tixchʼoolanihebʼ. Wankebʼ ranabʼ ut riitzʼin li Jesus. Naq laj Jose, li xMaria ut ebʼ li ralal xkʼajol keʼelk chaq Jerusalen, keʼsutqʼiik saʼ li tenamit Nazaret. Keʼxkʼoxla naq yook chaq li Jesus chirixebʼ. Abʼan, naq keʼok chi hilank keʼxkʼe reetal naq li Jesus moko wank ta saʼ xyanqebʼ li xkomon ut ebʼ li ramiiw. Joʼkan naq laj Jose ut li xMaria keʼsutqʼiik chi xsikʼbʼal li Jesus saʼ li tenamit Jerusalen.

Naq kitaweʼk li Jesus, yook xbʼaanunkil ebʼ li patzʼom rehebʼ li nekeʼkʼutuk saʼ Rochoch li Yos. Ebʼ li yookebʼ chi abʼink re, sachsookebʼ xchʼool xbʼaan naq wank xnaʼlebʼ. Li xMaria kixye re li Jesus: ‹Kʼaʼut xaabʼaanu qe aʼin? Yooko chaasikʼbʼal›.

Li Jesus kixye rehebʼ: ‹Kʼaʼut yookex chinsikʼbʼal? Ma inkʼaʼ nekeenaw naq tento wanqin saʼ Rochoch linYuwaʼ?›

Li Jesus kiwulak chiru wank, bʼarwiʼ nekeʼkʼutuk chirix li Yos. Joʼkan naq, rajlal xamaan kiwulak chi xloqʼoninkil li Yos saʼ li tenamit Nazaret. Ut kixkʼe xchʼool chi abʼink saʼebʼ li chʼutam, joʼkan naq kiwank xnaʼlebʼ chirix li Santil Hu. Ut laaʼat, ma nawulak chaawu xik saʼebʼ li chʼutam? Qatzolaq qe rikʼin li Jesus.