Li Jesus ut li Ixq aj Samaria

LI JESUS kiʼok chi hilank chi xkʼatq jun li bʼekbʼil haʼ, aran Samaria. Xbʼaan naq ebʼ li xtzolom kohebʼ saʼ tenamit chi xloqʼbʼal li tzakahemq. Li Jesus kiʼaatinak rikʼin li ixq, li kichalk chi risinkil xhaʼ ut kixye re: ‹Si bʼayaq wukʼaʼ!›

Kʼaʼut kisach xchʼool li ixq naq li Jesus kiʼaatinank re? Xbʼaan naq li Jesus aj Judio ut li ixq aj Samaria. Ebʼ laj Judio inkʼaʼ nekeʼaatinak rikʼinebʼ laj Samaria. Abʼan li Jesus naxra chixjunilebʼ li qas qiitzʼin. Li Jesus kixye re li ixq: ‹Wi nakaanaw raj ani yook chi xpatzʼbʼal rukʼaʼ aawe. Laaʼat tpatzʼ raj aawukʼaʼ re ut aʼan tixkʼe aawe li haʼ, li nakʼehok re li yuʼam›.

Li ixq kixye re li Jesus: ‹Qaawaʼ, cham li jul ut maakʼaʼ kʼaru taawisi wiʼ li haʼ. Bʼar taataw li haʼ li nakʼehok re li yuʼam?›

Li Jesus kixye re li ixq: ‹Usta taawukʼ li haʼ aʼin, tchaqiq wiʼ chik aawe. Abʼan li haʼ li tinkʼe aawe naru tixkʼe aayuʼam chi junelik›.

Li ixq kixye re li Jesus: ‹Qaawaʼ keʼ we li haʼ li yookat xyeebʼal, re naq inkʼaʼ chik tchaqiq we chi moko tinchalq ta chik chi risinkil inhaʼ›.

Li ixq kixkʼoxla naq li Jesus yook chi aatinak chirix li haʼ li naʼukʼek. Abʼan li Jesus yook chi aatinak chirix li yaal ut chirix li Xnimajwal Awabʼejilal li Yos. Aʼin naxkʼe li junelik yuʼam joʼ li haʼ naxkʼe li yuʼam.

Chirix chik aʼan, li Jesus kixye re li ixq: ‹Ayu, bʼoq chaq laabʼeelom ut chalqat chirix›.

Tojaʼ naq li ixq kixye: ‹Maakʼaʼ inbʼeelom›.

Li Jesus kixye re: ‹Yaal naq maakʼaʼ aabʼeelom. Abʼan kiwank oobʼ aabʼeelom ut li winq li wank aawikʼin moko aabʼeelom ta›.

Sachso xchʼool kikanaak li ixq xbʼaan naq yaal kixye li Jesus. Chanru kixnaw aʼin li Jesus? Li Yos kitaqlank re li Jesus saʼ Ruuchichʼochʼ, joʼkan naq Aʼan kikʼehok re li esil aʼin. Sachsookebʼ xchʼool keʼkanaak ebʼ li xtzolom naq keʼril li Jesus chi aatinak rikʼin li ixq aj Samaria.

Kʼaru naqatzol chirix aʼin? Naqatzol naq li Jesus chaabʼil rikʼin chixjunilebʼ li qas qiitzʼin. Tento naq tqakʼam qe rikʼin li Jesus ut inkʼaʼ tqakʼoxla naq li jalanebʼ xtenamit, maaʼusebʼ xnaʼlebʼ. Li Jesus naraj naq ebʼ li qas qiitzʼin teʼxnaw li yaal re naq teʼwanq xyuʼam chi junelik. Ut laaʼo tento naq tqatenqʼahebʼ.