Li Jesus Kiwaklesink Kamenaq

LI CHʼINA ixqaʼal li chapcho chi ruqʼ li Jesus wank 12 chihabʼ re. Rikʼin li chʼina ixqaʼal wankebʼ ajwiʼ li xnaʼ xyuwaʼ. Ma nakaanaw, kʼaʼut sahebʼ saʼ xchʼool li xnaʼ xyuwaʼ?

Aj Jairo xkʼabʼaʼ li xyuwaʼ li chʼina ixqaʼal. Laj Jairo wank xwankil, abʼan jun ajwiʼ xrabʼin. Saʼ jun kutan li chʼina ixqaʼal aʼin, kiyajerk ut inkʼaʼ nakʼiraak. Joʼkan naq, laj Jairo ut li rixaqil keʼok xkʼaʼuxl. Naq laj Jairo kixnaw naq li Jesus nakʼirtasink xko chi xsikʼbʼal.

Li Jesus wank saʼ xyiihebʼ li qas qiitzʼin naq laj Jairo kiwulak rikʼin, kixwiqʼibʼ ribʼ ut kixye re: ‹Nim xyajel linrabʼin. Kʼirtasi chaq bʼaanu usilal!› Li Jesus kixsume xkʼirtasinkil li chʼina ixqaʼal.

Naq li Jesus ut laj Jairo kohebʼ chi rilbʼal li chʼina ixqaʼal, ebʼ li qas qiitzʼin yookebʼ xtikʼisinkil ribʼ. Xbʼaan naq teʼraj wank chi xkʼatq li Jesus. Tojaʼ naq li Jesus kixye: ‹Ani kichʼeʼok we?› Li Jesus naxnaw naq kichʼeheʼk, xbʼaan naq kireekʼa naq kiʼelk xkawil xmetzʼew. Ma nakaanaw ani kichʼeʼok re, li raqʼ li Jesus? Jun li ixq, li 12 chihabʼ rokik xyajel. Abʼan naq kixchʼeʼ li Jesus saʼ junpaat kikʼiraak.

Naq laj Jairo kiril aʼin, kisahoʼk saʼ xchʼool xbʼaan naq kixkʼe reetal naq moko chʼaʼaj ta chiru li Jesus xkʼirtasinkilebʼ li qas qiitzʼin. Tojaʼ naq kichalk jun li winq ut kixye re laj Jairo: ‹Maachʼichʼiʼi li Jesus, xbʼaan naq laarabʼin kamenaq chik›. Naq li Jesus kirabʼi aʼin, kixye re laj Jairo: ‹Matkʼoxlak chirix laarabʼin!›

Naq keʼwulak saʼ rochoch laj Jairo, ebʼ li qas qiitzʼin rahebʼ saʼ xchʼool ut yookebʼ chi yaabʼak. Tojaʼ naq li Jesus kixye rehebʼ: ‹Mexyaabʼak, li chʼina ixqaʼal moko kamenaq ta, yal yook chi wark!› Naq li Jesus kixye aʼin, keʼok xseʼenkil xbʼaan naq li chʼina ixqaʼal ak kamenaq chik.

Li Jesus kiʼok saʼ xnaʼaj li chʼina ixqaʼal. Abʼan maaʼani kixkanabʼ chi ok rikʼin, kaʼajwiʼ oxibʼ rehebʼ li tzolom ut li xnaʼ xyuwaʼ li chʼina ixqaʼal. Li Jesus kixchap chi ruqʼ li chʼina ixqaʼal ut kixye re: ‹Waklin!› Chirix chik aʼan, li chʼina ixqaʼal kiwakli wiʼ chik chi yoʼyo. Naq li chʼina ixqaʼal kiʼajk ru ut kiʼok chi bʼeek, kʼajoʼ naq keʼsahoʼk saʼ xchʼool li xnaʼ xyuwaʼ.

Li chʼina ixqaʼal maawaʼ li xbʼeen kamenaq li kixwaklesi chi yoʼyo li Jesus. Saʼ li xbʼeen sut kixwaklesi li xyum jun li malkaʼan re li tenamit Nain. Chirix chik aʼan kixwaklesi laj Lazaro. Naq li Jesus t-awabʼejinq saʼ qabʼeen tixwaklesi wiʼ chik chi yoʼyo ebʼ li kamenaq. Nasahoʼk saʼ qachʼool xnawbʼal aʼin, peʼyaal?