Li Jesus Kixrahebʼ li Kokʼal

LI JESUS yook xqʼalunkil jun li chʼinaʼal. Arin nakʼutunk naq li Jesus naxrahebʼ li kokʼal. Ebʼ li winq li wankebʼ rikʼin li Jesus aʼanebʼ li xʼapostol. Ma nakaanaw kʼaru yook xyeebʼal li Jesus rehebʼ?

Naq li Jesus ut ebʼ li xʼapostol yookebʼ chaq chiru bʼe, ebʼ li xʼapostol keʼxweechʼi ribʼ. Joʼkan naq li Jesus kixye rehebʼ: ‹Chirix kʼaru xeeweechʼi eeribʼ? Li Jesus naxnaw chirix kʼaru yookebʼ chi pleetik. Abʼan kixbʼaanu li patzʼom aʼin, yal re rilbʼal ma teʼxye xyaalal re.

Naq li Jesus kixbʼaanu li patzʼom maajun rehebʼ li xtzolom kisumenk re, xbʼaan naq yookebʼ xyeebʼal ani rehebʼ wank xwankil. Chanru kixchʼolobʼ li Jesus rehebʼ li xtzolom naq li wankil moko us ta xrahinkil ru?

Li Jesus kixkʼe jun li chʼinaʼal chiruhebʼ li xtzolom ut kixye rehebʼ: ‹Cheenaw aʼin, wi inkʼaʼ nekeejal eenaʼlebʼ ut wi inkʼaʼ joʼkaqex li kokʼal maajoqʼe texʼoq saʼ li Xnimajwal Awabʼejilal li Yos. Li naxkubʼsi ribʼ joʼ li chʼinaʼal aʼin, aʼan li jwal nim xwankil saʼ li Xnimajwal Awabʼejilal li Yos›. Ma nakaanaw kʼaʼut kixye li Jesus aʼin rehebʼ li xtzolom?

Xbʼaan naq ebʼ li kokʼal inkʼaʼ nekeʼxnima xwankil, chi moko nekeʼxnimobʼresi ribʼ chiruhebʼ li rechkokʼalil. Joʼkan naq li Jesus kiraj naq ebʼ li xtzolom teʼxtzol rehebʼ rikʼinebʼ li kokʼal. Re naq inkʼaʼ teʼxrahi ru li wankil.

Moko kaʼaj tawiʼ saʼ li kutan aʼin li Jesus kixkʼutbʼesi naq kixrahebʼ li kokʼal. Xbʼaan naq saʼ jun kutan ebʼ li naʼbʼej yuwaʼbʼej keʼxkʼam ebʼ li xkokʼal rikʼin li Jesus. Abʼan ebʼ li apostol inkʼaʼ keʼxkanabʼ chi numeʼk li kokʼal. Joʼkan naq, li Jesus kixye rehebʼ li xtzolom: ‹Kanabʼomaq chi chalk ebʼ li kokʼal wikʼin ut meeram chiruhebʼ, xbʼaan naq li chanchanebʼ li kokʼal aʼanebʼ teʼeechaninq re li Nimajwal Awabʼejilal›. Chirix chik aʼan, li Jesus kixqʼaluhebʼ li kokʼal ut kirosobʼtesihebʼ. Li Jesus kixrahebʼ li kokʼal chi anchal xchʼool!