Laj Saulo Xko Damasco

MA NAKAANAW ani li winq li wank chiru chʼochʼ? Aʼan laj Saulo, li kikʼaakʼalenk re li raqʼebʼ li keʼkamsink re laj Esteban. Abʼan, kʼaru yook chi kʼulmank saʼ li eetalil?

Ak kamenaq chik laj Esteban, naq laj Saulo xko xsikʼbʼalebʼ li xtzolom li Jesus re xrahobʼtesinkilebʼ. Kirisihebʼ chaq saʼebʼ li ochoch ut kixkʼehebʼ saʼ tzʼalam. Wankebʼ keʼelelik saʼ jalan chik tenamit ut aran keʼxpuktesi li chaabʼil esilal. Laj Saulo xko saʼ jalan jalanq chi tenamit chi xsikʼbʼalebʼ li tzolom li Jesus. Abʼan, ma nakaanaw kʼaru kixkʼul laj Saulo naq yook chi xik Damasco?

Maakʼaʼ saʼ xchʼool laj Saulo naq kisuteʼk xbʼaan li Saqʼe, tojaʼ naq kitʼaneʼk saʼ chʼochʼ. Ut kiʼeekʼank chaq jun xyaabʼ kuxej saʼ choxa: ‹Saulo, Saulo! Kʼaʼut xikʼ yookat chi wilbʼal?› Ebʼ li winq, li wankebʼ rikʼin laj Saulo, usta inkʼaʼ keʼxtaw ru li kiyeemank, keʼril li kixkʼul laj Saulo.

Laj Saulo kixye: ‹Anihat, Qaawaʼ?›

Li xyaabʼ kuxej kixye: ‹Laaʼin li Jesus, li xikʼ nakaawil›. Kʼaʼut kixye aʼin li Jesus? Naq laj Saulo kixrahobʼtesihebʼ li xtzolom li Jesus, li Jesus kireekʼa naq aʼan kirahobʼtesiik.

Laj Saulo kixye wiʼ chik: ‹Qaawaʼ, kʼaru tento tinbʼaanu?›

Li Jesus kixye re: ‹Wanklin ut aayu Damasco, aran taayemanq aawe kʼaru taabʼaanu›. Naq laj Saulo kiwakli, inkʼaʼ chik kiru chi ilok. Laj Saulo kimutzʼoʼk. Joʼkan naq ebʼ li rochbʼeen, keʼxchap chi ruqʼ ut keʼxkʼam Damasco.

Chirix chik aʼan, li Jesus kixye re laj Ananias, jun rehebʼ li xtzolom, li wank Damasco: ‹Aayu, saʼ li tiikil bʼe, nekeʼxye re, saʼ li rochoch laj Judas. Aran taapatzʼ ma wank laj Saulo. Laj Saulo xinsikʼ choʼq aj kʼanjel chiwu›.

Laj Ananias kixbʼaanu li kiyeheʼk re xbʼaan li Jesus. Naq kiril laj Saulo kixkʼe li ruqʼ saʼ xbʼeen ut kixye re: ‹Li Jesus kitaqlank chaq we re naq tat-iloq wiʼ chik ut re naq taakʼul li santil musiqʼej›. Chanchan rix kar kiʼelk saʼ ru laj Saulo tojaʼ naq kiʼilok wiʼ chik.

Laj Saulo kixpuktesi chiʼus li chaabʼil esilal saʼ jalan jalanq chi tenamit. Chirix chik aʼan kixkʼabʼaʼi apostol Pablo, toj tqatzol kʼaru kixbʼaanu. Xbʼeenwa tqatzol kʼaru kixye li Yos re laj Pedro.