Li maaʼus aj musiqʼej nekeʼraj naq tqaqʼet qibʼ chiru li Yos

Kʼaʼut naq qʼaxal nekeʼxyal xqʼe laj Tza ut ebʼ li maaʼus aj musiqʼej re qabʼalaqʼinkil? Xbʼaan naq nekeʼraj naq tooʼokenq chirixebʼ chi xqʼetbʼal qibʼ chiru li Yos, nekeʼraj ajwiʼ naq tqaloqʼoni ruhebʼ, tqapaabʼ li tikʼtiʼ ut tqayuʼami li naʼlebʼ li inkʼaʼ nawulak chiru li Jehobʼa. Naabʼal rehebʼ li naʼlebʼ aʼin chalenaq rikʼin li nabʼaanumank naq nakamk junaq li kristiʼaan.

Qʼaxal ra naqekʼa naq nakamk junaq li qakomon malaj junaq li qamiiw ut maakʼaʼ reekʼ naq tqakʼutbʼesi naq ra wanko. Li Jesús «kiʼok chi yaabʼak» naq kikamk laj Lázaro, li ramiiw (Juan 11:35).

Saʼ jalan jalanq chi naʼajej wank naabʼal li naʼlebʼ li nabʼaanumank naq nakamk junaq li kristiʼaan. Wank rehebʼ li naʼlebʼ aʼin, moko naxqʼet ta li naʼlebʼ li wank saʼ li Santil Hu. Abʼanan, naabʼal rehebʼ li naʼlebʼ aʼin chalenaq saʼ li kʼutum naq ebʼ li kamenaq yoʼyokebʼ ut naq nekeʼruuk rilbʼal ebʼ li kristiʼaan. Li xyoʼlenkil li kamenaq, xkʼebʼal wiʼ chik xbʼeen li naqabʼaanu saʼebʼ li muquk ut xkʼebʼal wiʼ chik xbʼeen li xrahil qachʼool nabʼaanumank re xsahobʼresinkil xchʼool li xmusiqʼ li kamenaq. Abʼan, joʼ naxye li Santil Hu ebʼ li kamenaq «maakʼaʼ nekeʼxnaw», li nekeʼxbʼaanu aʼin yookebʼ xjekʼinkil li xtikʼtiʼ laj Tza (Eclesiastés 9:5).

Ebʼ li kristiʼaan nekeʼxpaabʼ naq ebʼ li kamenaq nekeʼraj naq teʼtenqʼaaq ut wi inkʼaʼ nabʼaanumank nekeʼok chi rahobʼtesink. Joʼkan naq, naq naxbʼaanu 40 kutan malaj jun chihabʼ li xkamik junaq li kristiʼaan, nekeʼxkʼe jun li waʼak. Nekeʼxkʼoxla naq chi joʼkan nekeʼxtenqʼa re naq «tqʼaxonq» saʼ li xnaʼajebʼ li musiqʼej. Jun chik li naʼlebʼ aʼan xkʼebʼal xwa rukʼaʼ li kamenaq.

Moko us ta naq tqayuʼami ebʼ li naʼlebʼ aʼin, xbʼaan naq yooqo xjekʼinkil li xtikʼtiʼ laj Tza chirixebʼ li kamenaq. Ma twulaq raj chiru li Jehobʼa naq tqayuʼami li xnaʼlebʼ li maaʼus aj musiqʼej? Maajoqʼe bʼiʼan! (2 Corintios 6:14-18).

Ebʼ laj kʼanjel chiru li Jehobʼa moko nekeʼtzʼaqonk ta chi xyuʼaminkil li xtikʼtiʼ laj Tza. Nekeʼxyal bʼan xqʼe chi xtenqʼankil ut xkʼojobʼankil xchʼool li ak xeʼkamk xkomon. Nekeʼxnaw naq kaʼajwiʼ li Jehobʼa naru xtenqʼankil li kristiʼaan li ak kamenaq chik (Job 14:14, 15).

Li Yos xikʼ naril li tuulak

Wankebʼ li kristiʼaan nekeʼaatinak rikʼinebʼ li maaʼus aj musiqʼej ut junchʼol chik nekeʼxsikʼ jun li kristiʼaan li naʼaatinak rikʼinebʼ li kamenaq re naq t-aatinaq saʼ xkʼabʼaʼebʼ. Aʼin nakʼabʼaʼiik tuulak. Saʼ li naʼlebʼ aʼin naʼokenk li vudú, li qʼehink, li suʼeert ut aatinak rikʼinebʼ li kamenaq.

Li Santil Hu naxtzʼeqtaana li naʼlebʼ aʼin naq naxye: «Miwank junaq saʼ eeyanq li [...] tixbʼaanu li qʼehibʼk ut li rilbʼal li yuʼam chaalel rikʼin xkaʼyankil ebʼ li chahim. Maajun eere tixbʼaanu li tuulak malaj xmoybʼal xsaʼ li uhej. Maajunaq aj bʼalaqʼ saʼ eeyanq chi moko li nekeʼaatinak rikʼin li anum malaj rikʼinebʼ li kamenaq; maajunaq aj qʼe eerikʼin. Xbʼaan naq chixjunilebʼ li nekeʼbʼaanunk re aʼin, yibʼeetal chiru li Qaawaʼ laaYos» (Deuteronomio 18:10-12).

Kʼaʼut naq kaw nokooxqʼus li Jehobʼa chirix aʼin?

Xbʼaan naq nokooxra, naraj qakolbʼal chiru li tuulak ut li qʼehink. Aʼan naxrahebʼ li kristiʼaan ut naxkʼe xchʼool chirixebʼ, naxnaw naq wi tqachʼik qibʼ rikʼinebʼ li maaʼus aj musiqʼej ra tqakʼul.

Li xNilda, aʼan jun rehebʼ li kiwank joʼ aj aatinanel rikʼinebʼ li maaʼus aj musiqʼej aran Brasil. Ebʼ li maaʼus aj musiqʼej kʼajoʼ naq keʼxrahobʼtesi. Aʼan naxye: «Ebʼ li maaʼus aj musiqʼej [...] nekeʼxchʼik ribʼ saʼ linjunxaqalil ut ninbʼaanu li nekeʼxye we. Wank sut ninkʼe reetal li ninbʼaanu wank sut inkʼaʼ, joʼkan naq xineʼxkʼam saʼ li naʼaj bʼarwiʼ wankebʼ li xeʼkanoʼk ru. Ebʼ li maaʼus aj musiqʼej kʼajoʼ naq xineʼxrahobʼtesi, joʼkan naq junelik ninsiksotk xbʼaanebʼ. Xinʼok rukʼbʼal li bʼan re naq sa twekʼa wibʼ, xinʼok chi mayibʼk ut kalaak. Chiru naabʼal chihabʼ xinwank chi joʼkaʼin».

Moqon, rikʼin xtenqʼ li Jehobʼa ut ebʼ laj Testiiw, li xNilda kiʼelk rubʼel xwankil li maaʼus aj musiqʼej, anaqwan sa chik saʼ xchʼool saʼ li xyuʼam. Aʼan naxye: «Maajunwa raj teechʼik eeribʼ rikʼinebʼ li maaʼus aj musiqʼej».