Tzolom 9
Li Nekeʼpaabʼank re li Yos Tento naq Saqaqebʼ Ru
Kʼaʼut tento naq saqaq ru chixjunil li naqabʼaanu? (1)
Kʼaru naraj xyeebʼal naq saqaq ru li qapaabʼal? (2) Li qayuʼam? (3) Ut li qakʼaʼuxl? (4) Ut kʼaʼut naq tqasaabʼesi qibʼ ut tqasaabʼesi li qochoch? (5)
Bʼar wank rehebʼ li tzʼaj aj aatin inkʼaʼ us xyeebʼal? (6)
1. Li Jehobʼa saq ru ut sant. Li Yos naraj naq ebʼ li nekeʼloqʼonink re tento naq junelik saqaqebʼ ru, saʼebʼ li xpaabʼal, saʼ xyuʼamebʼ ut ebʼ li xkʼaʼuxl. Naraj ajwiʼ naq teʼxsaabʼesi ribʼebʼ (1 Pedro 1:16). Tento naq tqakʼe qachʼool re naq junelik saqaq qu chiru li Yos xbʼaan naq li ruuchichʼochʼ tzʼaj ru ut xbʼaan naq laaʼo aj maak.
2. Saqaq ru li qapaabʼal: Wi naqaj xloqʼoninkil li Jehobʼa, inkʼaʼ tqabʼaanu li naxkʼut li bʼalaqʼil paabʼal. Tento naq tooʼelq ut inkʼaʼ chik tootzʼaqonk saʼ li bʼalaqʼil paabʼal (2 Corintios 6:14-18; Apocalipsis 18:4). Naq ak xaatzol li yaal chirix li Yos, maakanabʼ naq tateʼxbʼalaqʼi li inkʼaʼ nekeʼxkʼut li yaal (2 Juan 10, 11).
3. Saqaq ru li qayuʼam: Li Jehobʼa naraj naq ebʼ li nekeʼloqʼonink re tento naq junelik chaabʼilaqebʼ xnaʼlebʼ (1 Pedro 2:12). Li Yos naril chixjunil li naqabʼaanu, usta tqabʼaanu saʼ muqmu (Hebreos 4:13). Inkʼaʼ us xbʼaanunkil li tzʼaj aj naʼlebʼ li wank saʼ li ruuchichʼochʼ, joʼ li koʼbʼeetak yumbʼeetak (1 Corintios 6:9-11).
4. Saqaq ru li qakʼaʼuxl: Wi chaabʼil qakʼaʼuxl, chaabʼilaq ajwiʼ qanaʼlebʼ (Filipenses 4:8). Wi yooko xkʼoxlankil li tzʼaj ru aj naʼlebʼ, naru naq toomaakobʼq (Mateo 15:18-20). Re naq inkʼaʼ tqatzʼajni ru li qakʼaʼuxl tento naq tqakʼe reetal kʼaru yooko xbʼaanunkil naq inkʼaʼ yooko chi kʼanjelak. Abʼan wi yooko chi rilbʼal xsaʼ li Santil Hu chaabʼilaq ru qakʼaʼuxl.
5. Saabʼesink ibʼ: Tento naq tooʼatinq ut tqasaabʼesi qatʼikr xbʼaan naq laaʼo aj kʼanjel chiru li Yos. Joʼkan ajwiʼ tento naq tqachʼaj li quqʼ naq nokooʼelk chaq saʼ tzʼeqlebʼaal ut naq ok qe chi waʼak malaj kʼuubʼank. Wi saʼ junaq ochoch maakʼaʼ li tzʼeqlebʼaal tento xbʼekbʼal xjulel li tzʼeqomq ut xtzʼapbʼal xbʼeen rikʼin chʼochʼ (Deuteronomio 23:12, 13). Chixjunil aʼin tixkʼe qakawilal. Ebʼ li nekeʼloqʼonink re li Yos nekeʼxsaabʼesi chisaʼ ut chirix li rochochebʼ. Ebʼ li ochoch aʼin tento naq teʼwanq joʼ chaabʼil eetalil choʼq rehebʼ li echkabʼal.
6. Saq ru aatin: Ebʼ li nekeʼloqʼonink re li Yos inkʼaʼ nekeʼtikʼtiʼik. Ebʼ laj tikʼtiʼ inkʼaʼ teʼreechani li xNimajwal Awabʼejilal li Yos (Efesios 4:25; Apocalipsis 21:8). Ebʼ li nekeʼloqʼonink re li Yos inkʼaʼ nekeʼhobʼok. Inkʼaʼ nekeʼxseeraqʼi, nekeʼrabʼi chi moko nekeʼseʼek ta chirix li tzʼaj aj aatin li nekeʼxye ebʼ li poyanam. Joʼkan naq ebʼ li rechkabʼal, xkomon kʼanjel malaj tzolom nekeʼxkʼe reetal naq ebʼ li tzʼaqal aj paabʼanel inkʼaʼ nekeʼxye li tzʼaj aj aatin (Efesios 4:29, 31; 5:3).
[Ebʼ li jalam u re li perel 18 ut 19]
Ebʼ li nekeʼloqʼonink re li Yos tento naq saqaq ru chixjunil li teʼxbʼaanu