Tzolom 10

Kʼaru Xikʼ Naril li Yos?

Chanru taawil li xikʼ naril li Yos? (1)

Chanru nekeʼxmux ribʼebʼ li poyanam? (2)

Chanru nekeʼril ebʼ laj paabʼanel li tikʼtiʼ? (3) li bʼuulink rix tumin? (3) li elqʼak? (3) li nimla josqʼink ut li pleetik? (4) Chanru nekeʼril ajwiʼ li tuulak ut li qʼehink? (5) Ut li kalaak? (6)

Chanru xkanabʼankil chixjunil li yiibʼ ru aj naʼlebʼ? (7)

1. Ebʼ li nekeʼloqʼonink re li Yos nekeʼxbʼaanu li us ut nekeʼxtzol ajwiʼ xtzʼeqtaanankil li maaʼusilal (Salmo 97:10). Joʼkan naq tento tqatzʼeqtaana chixjunil li yiibʼ ru aj naʼlebʼ li xikʼ naril li Yos. Qilaq wiibʼ oxibʼ rehebʼ li naʼlebʼ aʼin:

2. Li koʼbʼeetak ut li yumbʼeetak: Ebʼ li yiibʼ ru aj naʼlebʼ joʼ ebʼ li nekeʼxmux ru li sumlaak, li nekeʼxmux ribʼ ut inkʼaʼ sumsuukebʼ, li nekeʼxmux ribʼ rikʼin xul, rikʼinebʼ rechwinqilal ixqilal, rikʼinebʼ xkomon malaj rech-alal, chixjunil aʼin nimla maak chiru li Yos (Levítico 18:6; Romanos 1:26, 27; 1 Corintios 6:9, 10). Joʼkan ajwiʼ, wi wank jun winq ut jun ixq yal laqʼlookebʼ tento naq teʼxkanabʼ ribʼ malaj teʼsumlaaq chiru li chaqʼrabʼ (Hebreos 13:4).

3. Li tikʼtiʼik, li bʼuulink rix tumin, li elqʼak: Li Jehobʼa moko natikʼtiʼik ta (Tito 1:2). Joʼkan naq, wi inkʼaʼ naqaj naq li Yos tooxtzʼeqtaana tento naq inkʼaʼ tootikʼtiʼiq (Proverbios 6:16-19; Colosenses 3:9, 10). Li bʼuulink rix tumin naxkʼam chaq li ratawankil li bʼihomal. Joʼkan naq ebʼ li nekeʼloqʼonink re li Yos inkʼaʼ nekeʼxbʼaanu aʼin (Efesios 5:3-5). Joʼkan ajwiʼ, inkʼaʼ nekeʼelqʼak, chi moko nekeʼxloqʼ ta li kʼaʼaq re ru yal elqʼanbʼil, chi moko nekeʼxchap ta li kʼaʼaq re ru wi majiʼ nekeʼxpatzʼ (Éxodo 20:15; Efesios 4:28).

4. Li nimla josqʼink ut li pleetik: Li nimla josqʼil naru nokooxkʼam chi xbʼaanunkil li maaʼusilal (Génesis 4:5-8). Li nekeʼxbʼaanu li maaʼusilal naq nekeʼjosqʼoʼk moko teʼwanq ta choʼq ramiiw li Yos (Salmo 11:5; Proverbios 22:24, 25). Moko us ta naq tqakʼe reeqaj li rahilal li xeʼxbʼaanu chaq qe (Proverbios 24:29; Romanos 12:17-21).

5. Li tuulak ut li qʼehink: Wankebʼ nekeʼxtzʼaama xtenqʼankil rehebʼ li musiqʼej re naq teʼruuq xkʼirtasinkilebʼ li yaj. Wankebʼ ajwiʼ nekeʼtuulak re kʼehok yajel malaj re kamsink. Chixjunil li yiibʼ ru aj naʼlebʼ aʼin wank rubʼel xwankil laj Tza. Joʼkan naq ebʼ li nekeʼloqʼonink re li Yos inkʼaʼ nekeʼxbʼaanu aʼin (Deuteronomio 18:9-13). Wi inkʼaʼ tqakanabʼ li Jehobʼa naru tookoleʼq chiru li tuulak (Proverbios 18:10).

6. Li kalaak: Rukʼbʼal bʼayaq li bʼiin malaj li haʼ li nakaltesink moko maak ta (Salmo 104:15; 1 Timoteo 5:23). Abʼan li Yos xikʼ naril li kalaak ut li numʼukʼak (1 Corintios 5:11-13; 1 Timoteo 3:8). Li kalaak  naru naxkʼe qayajel malaj tixjukʼ qajunkabʼal ut naru ajwiʼ naxbʼaanu naq tootʼaneʼq saʼ junpaat saʼ junaq chik li maak (Proverbios 23:20, 21, 29-35).

7. Li nekeʼxbʼaanu li inkʼaʼ us «moko teʼreechani ta li xNimajwal Awabʼeji[lal] li Yos» (Gálatas 5:19-21). Abʼan tatruuq xkanabʼankil li yiibʼ ru aj naʼlebʼ aʼin, wi nakaara ut nakaawaj xsahobʼresinkil xchʼool li Yos (1 Juan 5:3). Tzol xtzʼeqtaanankil li yiibʼ ru aj naʼlebʼ li naxye li Yos naq inkʼaʼ us (Romanos 12:9). Ochbʼeenihebʼ li nekeʼxbʼaanu li naxye li Santil Hu (Proverbios 13:20). Joʼkan ajwiʼ naru tooʼeʼxtenqʼa ebʼ li qech aj paabʼanel, li kawebʼ ribʼ saʼ li paabʼal (Santiago 5:14). Ut misach saʼ aachʼool naq li Yos taatenqʼanq aawe naq tattijoq chiru (Filipenses 4:6, 7, 13).

[Ebʼ li jalam u re li perel 20 ut 21]

Li Yos xikʼ naril li kalaak, li elqʼak, li bʼuulink rix tumin, li nimla josqʼink ut li pleetik