Tzolom 11
Ebʼ li Yiibʼ Ru aj Naʼlebʼ Inkʼaʼ Nawulak chiru li Yos
Kʼaru naʼlebʼ moko us ta chiru li Yos? (1)
Ma us xpaabʼankil naq li Yos oxibʼ chiribʼil? (2)
Kʼaʼut naq ebʼ li nekeʼloqʼonik re li Yos inkʼaʼ nekeʼxnima ru li Ralankil, xkutankil xyoʼlajik, chi moko li Rahil Kutan? (3, 4)
Ma toj nekeʼchʼiʼchʼiʼink ebʼ li kamenaq? (5)
Ma chiru krus kikamk li Jesus? (6)
Ani tento tqasahobʼresi xchʼool? (7)
1. Wank chaabʼil naʼlebʼ ut wank ajwiʼ inkʼaʼ us. Abʼan li Yos naxtzʼeqtaana li naʼlebʼ li chalenaq saʼ li bʼalaqʼil paabʼal. Joʼkan ajwiʼ naxtzʼeqtaana li naʼlebʼ li inkʼaʼ naxye li yaal chirix li Santil Hu (Mateo 15:6).
2. Oxibʼ chiribʼil: Ma us xyeebʼal naq li Yos oxibʼ chiribʼil? Inkʼaʼ. Kaʼajwiʼ li Jehobʼa, li Yuwaʼbʼej, aʼan li «tzʼaqal Yos» (Juan 17:3; Marcos 12:29). Li Jesus, xbʼeen Ralal li Yos ut wank rubʼel xwankil (1 Corintios 11:3). Li Yuwaʼbʼej nim xwankil chiru li Alalbʼej (Juan 14:28). Li santil musiqʼej aʼan li xmetzʼew li Yos li naroksi re xbʼaanunkil li Rajom (Génesis 1:2; Hechos 2:18).
3. Li Ralankil ut li Rahil Kutan: Li Jesus moko kiyoʼlaak ta saʼ li 25 xbʼe li po Diciembre, kiyoʼlaak tana chiru li xbʼeen xamaan re li po Octubre. Saʼ li po aʼin ebʼ laj kʼaakʼalenel karneer nekeʼril chaq ebʼ li xketomq chiru li qʼoqyink (Lucas 2:8-12). Li Jesus maajunwa kixye rehebʼ li xtzolom naq teʼxninqʼehi ru xkutankil li xyoʼlajik. Li kʼaru kixye rehebʼ naq tento teʼxjultika aʼan li xkamik (Lucas 22:19, 20). Chixjunil li nabʼaanumank saʼ li Ralankil ut saʼ li Rahil Kutan nachalk chaq saʼebʼ li bʼalaqʼil paabʼal li keʼwank chaq najter. Ebʼ li xbʼeen xtzolom li Jesus inkʼaʼ keʼxninqʼehi ru li Ralankil, chi moko li Rahil Kutan. Joʼkan ajwiʼ, saʼebʼ qakutan, ebʼ li tzʼaqal aj paabʼanel inkʼaʼ nekeʼxbʼaanu aʼin.
4. Xnimankil ru li yoʼlajik: Li Santil Hu naʼaatinak kaʼajwiʼ chirix wiibʼ li winq li keʼxninqʼehi ru li xchihabʼ. Abʼan ebʼ li winq aʼin moko keʼxloqʼoni ta ru li Jehobʼa (Génesis 40:20-22; Marcos 6:21, 22, 24-27). Ebʼ li xbʼeen aj paabʼanel moko keʼxninqʼehi ta ru ebʼ li xchihabʼ. Li naʼlebʼ aʼin nachalk chaq saʼ li bʼalaqʼil paabʼal li keʼwank chaq najter. Ebʼ li tzʼaqal aj paabʼanel nekeʼxkʼe xmaatan saʼ yalaq kʼaru kutankil ut sa nekeʼwank saʼ komonil.
5. Xuwak chiruhebʼ li kamenaq: Ebʼ li kamenaq maakʼaʼ chik nekeʼxbʼaanu ut maakʼaʼ chik nekeʼreekʼa. Joʼkan naq laaʼo inkʼaʼ chik nokooru xtenqʼankilebʼ ut aʼanebʼ ajwiʼ inkʼaʼ chik nekeʼru qachʼiʼchʼiʼinkil. Naq nokookamk maakʼaʼ nakana chi yoʼyo (Salmo 146:4; Eclesiastés 9:5, 10; Ezequiel 18:4 NM). Abʼan wank naq ebʼ li maaʼus aj musiqʼej nekeʼxnumsi ribʼebʼ joʼ xmusiqʼebʼ li kamenaq. Chixjunil li naʼlebʼ chirix xuwankil malaj xloqʼoninkil ruhebʼ li kamenaq moko us ta (Isaías 8:19).
6. Li krus: Li Jesus moko kikamk ta chiru krus. Kikamk chiru jun li oqech malaj cheʼ. Wank jun li aatin chalenaq saʼ li aatinobʼal griego li naraj xyeebʼal «oqech». Abʼan naq keʼxtzʼiibʼa chaq li Santil Hu saʼ jalan jalanq chi aatinobʼal, keʼxjal ru li aatin aʼin choʼq «krus». Li krus kichalk saʼebʼ li bʼalaqʼil paabʼal li keʼwank chaq najter qʼe kutan. Ebʼ li xbʼeen xtzolom li Jesus inkʼaʼ keʼroksi li krus, chi moko keʼxkʼe ta xloqʼal. Joʼkan naq qakʼoxlaq, ma us tawiʼ roksinkil li krus saʼ li loqʼonink? (Deuteronomio 7:26; 1 Corintios 10:14.)
7. Mare chʼaʼaj xkanabʼankil junaq rehebʼ li naʼlebʼ aʼin. Ebʼ li qakomon ut ebʼ li qamiiw naru teʼxye qe naq inkʼaʼ tqajal qanaʼlebʼ malaj qakʼaʼuxl. Joʼkan naq mare chʼaʼaj chiqu xkanabʼankil junaq rehebʼ li naʼlebʼ aʼin. Abʼan us xkʼoxlankil naq xsahobʼresinkil xchʼool li Yos jwal us chiru xsahobʼresinkilebʼ xchʼool li qakomon (Proverbios 29:25; Mateo 10:36, 37).
[Li jalam u re li perel 22]
Li Yos moko oxibʼ ta chiribʼil
[Li jalam u re li perel 23]
Li Ralankil chalenaq saʼ li bʼalaqʼil paabʼal
[Li jalam u re li perel 23]
Inkʼaʼ tqaloqʼoni, chi moko tqaxxuwahebʼ ta ru li kamenaq