Tzolom 14

Chanru Nekeʼkʼanjelak laj Testiiw re li Jehobʼa

Joʼqʼe xtikla chaq wiʼ chik li xkʼanjelebʼ laj Testiiw re li Jehobʼa? (1)

Chanru nekeʼxbʼaanu li xchʼutamebʼ? (2)

Chanru nekeʼxtoj li sachom? (3)

Anihebʼ nekeʼkʼamok bʼe saʼebʼ li junjunq chi chʼuut? (4)

K ʼaru chik nekeʼxbʼaanu rajlal chihabʼ? (5)

Kʼaru li kʼanjel nekeʼxbʼaanu saʼebʼ li xmolam? (6)

1. Ebʼ laj Testiiw re li Jehobʼa keʼxtikibʼ chaq wiʼ chik li xkʼanjel chiruhebʼ li chihabʼ 1870. Saʼ li chihabʼ 1931 xeʼkʼabʼaʼiik Testiiw re li Jehobʼa, li kʼabʼaʼej aʼin wank saʼ li Santil Hu. Saʼ xtiklajik, yal nanookebʼ chaq ru joʼebʼ li Nekeʼtzolok chirix li Santil Hu (Isaías 43:10). Li chʼina chʼuut aʼin kiʼok chi taamk ut anaqwan naabʼalebʼ xkʼihal ebʼ laj Testiiw. Anaqwan saʼ chixjunil li Ruuchichʼochʼ ak xqʼax 230 chi tenamit bʼarwiʼ yookebʼ chi xpuktesinkil li chaabʼil esilal.

2. Kachʼin chik ma chixjunilebʼ li chʼuut rehebʼ laj Testiiw re li Jehobʼa nekeʼchʼutla wiibʼ sut chiru li xamaan. Naru tatwulaq saʼebʼ li chʼutam aʼin (Hebreos 10:24, 25). Chixjunil li nekeʼxkʼut aran isinbʼil chaq saʼ li Santil Hu. Ebʼ laj Testiiw re li Jehobʼa nekeʼtijok ut nekeʼbʼichank chi anchal xchʼoolebʼ re xloqʼoninkil li Yos. Joʼkan nekeʼtikla ut nekeʼraqeʼk ebʼ li xchʼutam (Efesios 5:18, 19). Li nekeʼwulak saʼebʼ li chʼutam inkʼaʼ nekeʼtojok, chi moko nekeʼpatzʼe ta tumin rehebʼ (Mateo 10:8).

3. Naabʼal rehebʼ li xchʼuut laj Testiiw re li Jehobʼa nekeʼxbʼaanu ebʼ li xchʼutam saʼebʼ li xChʼutlebʼaal Kabʼl. Ebʼ li Chʼutlebʼaal Kabʼl aʼin moko ninqal ochoch ta, ut ebʼ laj Testiiw li nekeʼyiibʼank re moko tojbʼilebʼ ta. Aran maakʼaʼ pechʼbʼil yos, chi moko jalam u. Li sachom natojmank rikʼin li joʼnimal nekeʼraj tenqʼank ebʼ li nekeʼwulak saʼebʼ li chʼutam. Joʼkan naq li nekeʼraj tenqʼank naru nekeʼxkʼe saʼ jun li chʼina kax li wank aran (2 Corintios 9:7).

4. Saʼebʼ li junjunq chi chʼuut wankebʼ cheekel winq malaj aj ilol re li chʼuut. Aʼanebʼ nekeʼkʼutuk ut nekeʼkʼamok bʼe (1 Timoteo 3:1-7; 5:17). Wankebʼ ajwiʼ aj tenqʼanel, ut aʼanebʼ nekeʼtenqʼank rehebʼ li cheekel winq (1 Timoteo 3:8-10, 12, 13). Ebʼ li winq aʼin moko nimebʼ ta xwankil chiru li chʼuut (2 Corintios 1:24). Chi moko kʼeebʼilebʼ ta xnimal ru  kʼabʼaʼej re naq teʼkʼeheʼq xloqʼal (Mateo 23:8-10). Chi moko jalan ta nekeʼxtiqibʼ ribʼebʼ. Joʼkan ajwiʼ moko tojbʼilebʼ ta chi kʼanjelak saʼ li chʼuut. Ebʼ li cheekel winq aʼin nekeʼxtenqʼa li chʼuut re naq kawaqebʼ saʼ li paabʼal, ut nekeʼxbʼaanu chi anchal xchʼool. Joʼkan ajwiʼ nekeʼkʼehok naʼlebʼ ut nekeʼkʼojobʼank chʼool naq wank chʼaʼajkilal (Santiago 5:14-16; 1 Pedro 5:2, 3).

5. Ebʼ laj Testiiw re li Jehobʼa wankebʼ ajwiʼ xnimla chʼutam rajlal chihabʼ. Saʼebʼ li nimla chʼutam aʼin nekeʼwulak naabʼalebʼ li chʼuut. Wank ajwiʼ jalan jalanq li seeraqʼ, li tzolok chirix li Santil Hu ut li subʼeʼk saʼ haʼ (Mateo 3:13-17; 28:19, 20).

6. Li nimla molam li najolomink rehebʼ li xchʼuut laj Testiiw re li Jehobʼa saʼ chixjunil li ruuchichʼochʼ, wank saʼ li nimla tenamit Nueva York. Aran wankebʼ aj Jolominel Kʼanjel. Aʼanebʼ jun chʼuut chi cheekel winq tzʼaqlojenaqebʼ xnaʼlebʼ. Aʼanebʼ nekeʼjolomink ut nekeʼilok rehebʼ li chʼuut saʼ chixjunil li ruuchichʼochʼ. Joʼkan ajwiʼ, ebʼ li xmolam laj Testiiw re li Jehobʼa saʼ chixjunil li ruuchichʼochʼ naxqʼax ru 100. Saʼ li molam aʼin nekeʼxyiibʼ ut nekeʼxjekʼi ebʼ li tasal hu li nekeʼaatinak chirix li Santil Hu. Li nekeʼkʼanjelak aran moko tojbʼilebʼ ta. Aran ajwiʼ nekeʼxkʼuubʼ li kʼanjel re xpuktesinkil li chaabʼil esilal. Us raj naq tatxik chi xnawbʼal chaq junaq rehebʼ li molam aʼin.