Tzololm 16

Chaaqʼaxtesi Laayuʼam chiru li Yos ut Subʼ Aawibʼ saʼ Haʼ

Kʼaru tento taabʼaanu re naq tatwanq choʼq ramiiw li Yos? (1, 2)

Chanru taaqʼaxtesi laayuʼam chiru li Yos? (1)

Joʼqʼe naru taasubʼ aawibʼ saʼ haʼ? (2)

Kʼaru taabʼaanu re naq junelik tiikaq aachʼool chiru li Yos? (3)

1. Wi taawaj wank choʼq ramiiw li Yos tento naq taatzol li yaal li wank saʼ li Santil Hu (1 Timoteo 2:3, 4), taapaabʼ li yookat chi xtzolbʼal (Hebreos 11:6), taayotʼ aachʼool xbʼaan laamaak ut taajal aakʼaʼuxl (Hechos 3:19; 17:30, 31) ut inkʼaʼ chik taabʼaanu li yiibʼ ru aj naʼlebʼ (Proverbios 28:13). Chirix chik aʼan, wi nakaara li Yos taaqʼaxtesi laayuʼam chiru. Aʼin naraj xyeebʼal naq tattijoq chiru li Yos naq wanqat aajunes ut taaye re naq nakaawaj kʼanjelak chiru chi junelik ut naq nakaawaj xbʼaanunkil li naraj aʼan (Mateo 16:24; 22:37).

2. Naq ak xattzolok chirix li Santil Hu, ut ak xaaqʼaxtesi laayuʼam chiru li Yos, tento naq taasubʼ aawibʼ saʼ haʼ (Mateo 28:19, 20). Naq tatsubʼeʼq saʼ haʼ, aran taakʼutbʼesi chiruhebʼ li qas qiitzʼin naq xaaqʼaxtesi laayuʼam chiru li Jehobʼa. Li nekeʼsubʼeʼk saʼ haʼ tento naq teʼxnaw kʼaru yookebʼ xbʼaanunkil ut chʼolchʼooq ajwiʼ chiruhebʼ naq teʼkʼanjelaq chiru li Yos. Naq junaq li qas qiitzʼin nasubʼeʼk saʼ haʼ, tento naq chixjunil li xtibʼel tmuqunq rubʼel haʼa (Marcos 1:9, 10; Hechos 8:36).

3. Naq ak xaaqʼaxtesi laayuʼam re li Jehobʼa, tento naq taayuʼami li xaayeechiʼi re (Salmo 50:14; Eclesiastés 5:4, 5). Laj Tza tixyal aawix re naq taakanabʼ xloqʼoninkil li Jehobʼa (1 Pedro 5:8). Joʼkan naq tijon chiru li Yos (Filipenses 4:6, 7). Tzol wulaj wulaj li naxye li Santil Hu (Salmo 1:1-3). Maakanabʼebʼ laj Testiiw re li Jehobʼa (Hebreos 13:17). Wi taabʼaanu aʼin, junelik kawaq ut tiikaq aachʼool chiru li Yos ut junelik tatruuq xbʼaanunkil li naxpatzʼ aawe.

[Kʼe reetal]