Kʼaru taabʼaanu naq tatxuwaq ut wanqat aajunes?

Il li chʼinaʼal saʼ li eetalil. Peʼyaal naq wank xjunes ut txuwaq? Ma ak xatxuwak jun sutaq?... Chiqajunilo ak xqeekʼa aʼin. Li Santil Hu naʼaatinak chirixebʼ winq ut ixq, usta nekeʼxra chaq li Jehobʼa, keʼxuwak ut keʼreekʼa ribʼ xjunes. Laj Elias jun rehebʼ aʼin. Qilaq kʼaru kixkʼul.

Laj Elias kiwank chaq saʼ li tenamit Israel, naq toj maajiʼ nayoʼlaak li Jesus arin saʼ Ruuchichʼochʼ. Saʼebʼ li kutan aʼin, li awabʼej re Israel ut li rixaqil inkʼaʼ nekeʼxra chaq li Jehobʼa, li tzʼaqal Yos. Aj Acab ut xJezabel xkʼabʼaʼebʼ ut nekeʼxloqʼoni chaq li bʼalaqʼil yos Baal. Joʼkan naq, kachʼin chik ma chixjunilebʼ laj Israel yookebʼ chaq xloqʼoninkil laj Baal. Li xJezabel maaʼus xnaʼlebʼ ut kiraj xkamsinkilebʼ li nekeʼxloqʼoni chaq li Jehobʼa. Ut kiraj ajwiʼ xkamsinkil laj Elias xbʼaan naq naxloqʼoni li Jehobʼa. Kʼaru raj kixbʼaanu laj Elias? Ut kʼaru raj xaabʼaanu laaʼat?...

Najt xkoho laj Elias! Xkoho saʼ chaqichʼochʼ ut kixmuq ribʼ saʼ jun li ochoch pek. Kʼaʼut kixmuq ribʼ?... Xbʼaan naq yook xxiw. Abʼan inkʼaʼ raj kixuwak, kʼaʼut? Laj Elias naxnaw naq li Yos ttenqʼanq re. Ak kitenqʼaak chaq. Saʼ jun kutan, laj Elias kitijok, ut li Yos kixsume naq kikubʼeek chaq xaml saʼ choxa. Peʼyaal naq nim xwankil li Jehobʼa? Heeheʼ. Laj Elias kiruuk raj xkʼojobʼankil xchʼool rikʼin!

Naq laj Elias wank saʼ ochoch pek, li Jehobʼa kixye re: «Kʼaʼut wankat arin?». Laj Elias kixye re li Jehobʼa: «Najter wankebʼ nekeʼpaabʼank chaawu, anaqwan injunes chik. Ut yook inxiw, maare tineʼxkamsi ajwiʼ». Laj Elias kixkʼoxla naq ak xeʼkamk chixjunilebʼ laj kʼanjel chiru li Yos. Abʼan li Jehobʼa kixye re: «Inkʼaʼ, moko aajunes ta xatkanaak. Wuqubʼ mil yookebʼ inloqʼoninkil. Matxuwak, xbʼaan naq wank jun li kʼanjel choʼq aawe». Naq li Yos kixye aʼin, kʼaru kireekʼa laj Elias?... Kisahoʼk tana saʼ xchʼool!

Anaqwan kʼoxla li kixkʼul laj Elias. Kʼaru naqatzol chirix?... Usta taaweekʼa naq wankat aajunes ut yooq aaxiw, kʼoxla naq wankebʼ laawamiiw li nekeʼxra li Jehobʼa ut nakateʼxra ajwiʼ laaʼat. Li Jehobʼa nim xwankil ut junelik tatxtenqʼa. Peʼyaal naq us xnawbʼal aʼin?...