Kaʼajwiʼ laasumʼaatin taara

Li Jehobʼa naraj naq maajunwa toobʼalaqʼiq (Malaquias 2:16). Li naʼlebʼ aʼin nakʼanjelak saʼ xyanqebʼ li sumsu re naq inkʼaʼ teʼkʼoxlaq chi xyeebʼal chiribʼilebʼ ribʼ li nekeʼxkʼoxla. Ut aʼan ajwiʼ ttenqʼanq rehebʼ re naq tkʼiiq li xrahomebʼ.

Saʼebʼ li qakutan li sumsukebʼ moko nekeʼxra ta chik ribʼ. Re xkolbʼal laasumlajik, tento taabʼaanu wiibʼ li naʼlebʼ.

1. KʼE XWANKIL LAASUMLAJIK

LI NAXYE LI SANTIL HU: «Inkʼaʼ joʼkaqex li maakʼaʼebʼ xnaʼlebʼ, joʼkaqex bʼan li wankebʼ xnaʼlebʼ» (Efesios 5:15, 16). Chiwanq aanaʼlebʼ re xkʼeebʼal xwankil laasumlajik. Wank xkʼulubʼ re naq wanq xwankil.

Li Jehobʼa naraj naq kaʼajwiʼ laasumʼaatin taakʼoxla ut naq sahaq saʼ leechʼool saʼ wiibʼal (Eclesiastes 9:9). Ut naraj naq maajunwa taakanabʼ xchʼolaninkil, naraj naq taasikʼ chanru taasahobʼresi xchʼool (1 Corintios 10:24). Laasumʼaatin tento treekʼa naq nakaawaj naq wanq chaakʼatq ut naq oxloqʼ chaawu.

NARU NAKAABʼAANU AʼIN:

• Junelik taakʼe laahoonal re ut taawabʼi li naxye

• Kʼoxla li nekeeraj saʼ wiibʼal ut inkʼaʼ kaʼajwiʼ li nakaawaj laaʼat

2. KʼAAKʼALE LAACHʼOOL

LI NAXYE LI SANTIL HU: «Chixjunil li tixkaʼya junaq ixq ut tixrahi ru, ak xmux [...] saʼ xchʼool» (Mateo 5:28). Wi junaq li qas qiitzʼin yook xkʼoxlankil li muxuk ibʼ, ak yook xbʼalaqʼinkil li xsumʼaatin.

Li Jehobʼa naxye naq tento tqakʼaakʼale li qachʼool (Proverbios 4:23; Jeremias 17:9). Ut re xbʼaanunkil aʼin, tento taakʼe reetal kʼaru yookat rilbʼal (Mateo 5:29, 30). Kʼam aawe rikʼin laj Job, aʼan kixye naq maajunwa tixrahi ru junaq ixq (Job 31:1). Maajunwa taawil li nekeʼxkʼut ribʼ chi tʼustʼu re maakobʼk. Ut maajunwa txik aachʼool chirix li maawaʼ aasumʼaatin.

NARU NAKAABʼAANU AʼIN:

• Kʼutbʼesi rikʼin laabʼaanuhom naq oxloqʼ chaawu laasumʼaatin

• Wi laasumʼaatin inkʼaʼ nawulak chiru chanru nakaawaatina junaq li qas qiitzʼin, kʼe xwankil li reekʼahom ut paabʼ