Najosqʼoʼk ut naxkamsi li riitzʼin

Naq laj Adan ut xʼEva keʼelk saʼ li naʼaj Eden, keʼwank naabʼal xkokʼal. Li xbʼeen aʼan laj Cain. Li xkʼanjel aʼan rawbʼal li kiʼilqʼeen ut ebʼ li xeʼpim. Li xkabʼ ralal aʼan laj Abel, ut aj ilok karneer.

Saʼ jun kutan, laj Cain ut laj Abel keʼmayejak chiru li Jehobʼa. Ma nakaanaw kʼaru li mayej? Aʼan jun rehebʼ li xchaabʼilal ru li maatan li nakʼemank re li Yos. Li Jehobʼa kiwulak chiru li xmaatan laj Abel, abʼan inkʼaʼ kiwulak chiru li re laj Cain. Joʼkan naq, laj Cain kʼajoʼ naq kichalk xjosqʼil ut li Jehobʼa kixye re: «Wi inkʼaʼ nakaawisi saʼ laachʼool laajosqʼil, taabʼaanu junaq li maaʼusilal». Abʼan laj Cain inkʼaʼ kiʼabʼink chiru.

Chirix chik aʼan, laj Cain kixye re laj Abel: «Yoʼo chiwix saʼ awimq». Ut naq wankebʼ xjunes, laj Cain kixsakʼ li riitzʼin ut kixkamsi. Kʼaru kixbʼaanu li Jehobʼa? Kixkʼe chi xtojbʼal xmaak laj Cain naq kixtaqla chi najt. Maajunwa chik tsutqʼiiq rikʼin li xjunkabʼal.

Kʼaru naqatzol? Wi inkʼaʼ naʼelk chiqu junaq li naʼlebʼ joʼ chanru naqaj, maare tchalq qajosqʼil. Ut wi naqekʼa naq yook chi numtaak qajosqʼil, malaj ebʼ li junchʼol teʼril naq xuwajel qajosqʼil, tento tqajal qanaʼlebʼ. Wi inkʼaʼ tqabʼaanu saʼ junpaat, li qajosqʼil naru ttaqlanq saʼ qabʼeen, ut aʼin tooxkʼe saʼ chʼaʼajkilal.

Laj Abel kʼajoʼ naq kixra chaq li Jehobʼa ut kiʼabʼink chiru, joʼkan naq li Jehobʼa junelik tixjultika. Naq li Yos tixchʼinaʼusa chixjunil li Ruuchichʼochʼ, tixkʼe wiʼ chik xyuʼam laj Abel.