Li nimla ochoch Babel

Naq ak xnumeʼk li Bʼutʼihaʼ, ebʼ li ralal laj Noe ut ebʼ li rixaqil keʼwank naabʼal xkokʼal. Ebʼ li xjunkabʼal keʼtamk ut xkohebʼ chi kanaak saʼ jalan jalanq chi naʼaj, joʼ chanru keʼyeheʼk rehebʼ xbʼaan li Jehobʼa.

Abʼan wankebʼ li junkabʼal li inkʼaʼ keʼabʼink chiru li Jehobʼa. Keʼxye: «Kanaqo arin, ut qayiibʼaq junaq li tenamit ut jun nimla ochoch li twulaq toj saʼ choxa. Chi joʼkan tnaweʼq qu yalaq bʼar».

Li Jehobʼa inkʼaʼ xwulak chiru li yookebʼ xbʼaanunkil, joʼkan naq kixramebʼ li xkʼanjel. Ma nakaanaw chanru? Kixbʼaanu naq maakʼaʼebʼ saʼ xchʼool naq xeʼok chi aatinak saʼ jalan jalanq chi aatinobʼaal. Ebʼ li poyanam keʼxkʼabʼaʼi li tenamit aʼin choʼq Babel, li naraj xyeebʼal «sachbʼil». Saʼ xkʼabʼaʼ naq inkʼaʼ chik nekeʼruuk xtawbʼal ru li nekeʼxye chiribʼilebʼ ribʼ, keʼxkanabʼ kabʼlak ut xkohebʼ chi kanaak saʼ jalan jalanq chi naʼaj. Abʼan, inkʼaʼ keʼxkanabʼ xbʼaanunkil li maaʼusilal saʼebʼ li naʼaj bʼarwiʼ xkohebʼ. Kʼaru nakaaye ma toj wank junaq li poyanam li naxra li Jehobʼa? Tqil saʼ li jun chik tzolom.