Li xsachbʼachʼoolej li Kaqi palaw

Naq laj Faraon kirabʼi naq ebʼ laj Israel keʼelk chaq Egipto, kipoʼk xkʼaʼuxl xbʼaan naq kixkanabʼebʼ chi xik. Kixye rehebʼ laj puubʼ: «Kawresihomaq ebʼ li bʼelebʼaal chʼiichʼ, ut yoʼqex chirixebʼ. Inkʼaʼ raj xqakanabʼebʼ chi xik». Tojaʼ naq, laj Faraon ut ebʼ laj puubʼ xkohebʼ chirixebʼ laj Israel.

Li Jehobʼa yook xkʼutbʼal xbʼe li xtenamit rikʼin jun li choql chiru kutan ut jun li xaml chiru qʼoqyink. Kixkʼamebʼ saʼ li Kaqi palaw ut kixye rehebʼ naq aran teʼxkʼojobʼ rochoch.

Chirix chik aʼan, ebʼ laj Israel keʼxkʼe reetal naq laj Faraon ut ebʼ laj puubʼ yookebʼ chi taqenk rehebʼ. Ebʼ laj Israel tzʼaptzʼokebʼ xbʼe, chiruhebʼ wank li nimaʼ ut chirixebʼ wankebʼ laj puubʼ. Keʼok xjapbʼal re ut keʼxye re laj Moises: «Ok qe chi kamk! Kʼaru aj e naq xooʼaawisi Egipto?». Abʼan laj Moises kixsumehebʼ: «Mexxuwak. Oybʼenihomaq ut teeril chanru tooxkol li Jehobʼa». Peʼyaal naq laj Moises kʼojkʼo xchʼool rikʼin li Jehobʼa?

Moqon chik, li Jehobʼa kixye rehebʼ laj Israel naq teʼxwaklesi li rochochebʼ. Saʼ li qʼoqyink ajwiʼ aʼan, li Jehobʼa kirekʼasi li choql ut kixkʼe saʼ xyanqebʼ laj Egipcio ut ebʼ laj Israel. Qʼoqyink ru bʼarwiʼ wankebʼ laj Egipcio, abʼan saqenk ru bʼarwiʼ wankebʼ laj Israel.

Chirix chik aʼan, li Jehobʼa kixye re laj Moises naq tixyeʼ li ruqʼ saʼ xbʼeen li palaw. Tojaʼ naq, kixbʼaanu naq chiru jun qʼoqyink twanq jun nimla iqʼ. Li palaw kixjach ribʼ saʼ wiibʼ, ut saʼ xyi kixkʼe ribʼ jun li bʼe. Ebʼ li miyon chi Israel keʼnumeʼk chi chaqi ru saʼ junpakʼal li palaw.

Ebʼ laj puubʼ re laj Faraon xkohebʼ chi xchapbʼalebʼ laj Israel saʼ xbʼehil li nimaʼ chi chaqi ru. Abʼan, li Jehobʼa kixbʼaanu naq teʼxpoqoqi ribʼ ebʼ laj Egipcio. Li xyantil ebʼ li xbʼelebʼaal chʼiichʼ kiʼok chi bʼotzʼeʼk. Tojaʼ naq, ebʼ laj puubʼ keʼok xjapbʼal rehebʼ: «Elenqo arin! Li Jehobʼa yook chi yalok chirix li xtenamit».

Li Jehobʼa kixye re laj Moises: «Yeʼ laawuqʼ saʼ xbʼeen li palaw». Maakʼaʼ saʼ xchʼoolebʼ naq li haʼ li chapcho saʼ wiibʼ pakʼal kichalk saʼ xbʼeenebʼ laj puubʼ. Laj Faraon ut chixjunilebʼ laj puubʼ keʼkamk. Maaʼani kikanaak chi yoʼyo.

Saʼ junpakʼal li palaw, chixjunilebʼ li poyanam keʼxkʼe xloqʼal li Yos rikʼin jun li bʼich: «Tinbʼichanq chiru li Jehobʼa, xbʼaan naq kixnima li xloqʼal. Li kawaay ut li winq li wank saʼ xbʼeen kixkutebʼ saʼ nimaʼ». Naq li tenamit yook chi bʼichank, ebʼ li ixq yookebʼ chi xajok ut chi wajbʼak. Chixjunilebʼ sahebʼ saʼ xchʼool xbʼaan naq moko wankebʼ ta chik choʼq moos.