Nekeʼxqʼet ribʼ chiru li Jehobʼa

Saʼ xnumikebʼ li kutan, toj wankebʼ laj Israel saʼ li chaqichʼochʼ naq laj Core, laj Datan, laj Abiram ut 250 chi winq keʼxqʼet ribʼ chiru laj Moises. Keʼxye re: «Ak xootitzʼ eebʼaan! Kʼaʼut naq laaʼat xaqxoqat choʼq aj kʼamolbʼe saʼ qayanq? Ut kʼaʼut naq laj Aaron wank choʼq xyuwaʼil aj tij? Li Jehobʼa moko kaʼaj tawiʼ aawikʼin ut rikʼin laj Aaron wank, wank ajwiʼ qikʼin chiqajunilo». Li Jehobʼa inkʼaʼ xwulak chiru naq teʼxye aʼin xbʼaan naq rekʼa naq chiru yookebʼ xqʼetbʼal ribʼ.

Laj Moises kixye re laj Core ut ebʼ li wankebʼ rikʼin: «Chalqex wulaj saʼ li naʼaj re loqʼonink ut teekʼam chaq xnaʼaj li ru xaml nujenaq chi insiʼeens. Li Jehobʼa tixkʼut chiqu ani kixsikʼ ru».

Wulajaq chik, laj Core ut ebʼ li 250 chi winq xkohebʼ rikʼin laj Moises saʼ li naʼaj re loqʼonink. Aran keʼok chi kʼatok insiʼeens chanchan tawiʼ ebʼ aj tij. Tojaʼ naq, li Jehobʼa kixye re laj Moises ut re laj Aaron: «Elenqex chixkʼatq laj Core ut ebʼ li nekeʼtaqenk re».

Laj Core xkoho saʼ li naʼaj re loqʼonink bʼarwiʼ wank chaq laj Moises, abʼan laj Datan, laj Abiram ut li xjunkabʼalebʼ inkʼaʼ xeʼraj xik. Li Jehobʼa kixye rehebʼ laj Israel: «Najtobʼresihomaq eeribʼ rikʼin li rochoch laj Core, laj Datan ut laj Abiram». Ebʼ laj Israel saʼ junpaat keʼelk aran. Laj Datan, laj Abiram ut ebʼ li xjunkabʼal keʼkanaak chi xaqxo chiru li rochochebʼ. Maakʼaʼ saʼ xchʼoolebʼ naq li chʼochʼ kixte ribʼ ut kixnuqʼebʼ laj qʼetonel. Ut saʼ li naʼaj re loqʼonink, kikubʼeek chaq xaml saʼ choxa ut kixkamsi laj Core ut ebʼ li 250 chi winq.

Chirix chik aʼan, li Jehobʼa kixye re laj Moises: «Li nekeʼjolomink rehebʼ li junjunq chi teep teʼxkʼam chaq ebʼ li xxuqʼ. Taatzʼiibʼa chiru li junjunq chi xuqʼ li xkʼabʼaʼ laj kʼamolbʼe. Abʼan chiru li xxuqʼ li xteep laj Levi, taatzʼiibʼa li xkʼabʼaʼ laj Aaron. Kʼe chixjunil ebʼ li xuqʼ saʼ li naʼaj re loqʼonink. Aʼ li xxuqʼ li winq li tinsikʼ ru, tmoq chaq uutzʼuʼuj chiru».

Wulajaq chik, laj Moises kirisi chixjunil ebʼ li xuqʼ ut kixkʼut chiruhebʼ laj kʼamolbʼe. Li xxuqʼ laj Aaron yook chaq chi moq ruutzʼuʼujil ut wank qʼanil almeendr chiru. Chi joʼkan, li Jehobʼa kixkʼutbʼesi naq laj Aaron kixsikʼ ru choʼq xyuwaʼil aj tij.