Jun li ixqi bʼuur naʼaatinak

Kachʼin chik ma 40 chihabʼ xeʼwank saʼ chaqichʼochʼ ebʼ laj Israel. Ak xeʼrechani naabʼal li tenamit li jwal kawebʼ ribʼ. Anaqwan wankebʼ saʼ xtaqʼahil li tenamit Moab, saʼ relebʼl saqʼe re li nimaʼ Jordan, ut moko naabʼal ta chik naʼajmank re naq teʼoq saʼ li naʼaj li yeechiʼinbʼil chaq rehebʼ. Laj Balac, li awabʼej re Moab, yook xxiw xbʼaan naq naxkʼoxla naq ebʼ laj Israel teʼxmaqʼ li xchʼochʼ. Joʼkan naq, kixye re jun li winq li naxkʼabʼaʼi Balaam naq txik Moab re xmaajewankil ebʼ laj Israel, malaj tixye saʼ kawil kuxej naq narataw naq teʼxkʼul li maaʼusilal.

Abʼan li Jehobʼa kixye re laj Balaam: «Inkʼaʼ naru taamaajewa ebʼ laj Israel». Joʼkan naq, laj Balaam inkʼaʼ kiraj xik Moab. Li awabʼej Balac kixtaqla xkaʼsutil ut kixye re, naq tixpatzʼ li kʼaru naraj, abʼan laj Balaam inkʼaʼ kixkʼulubʼa wiʼ chik chiru. Tojaʼ naq, li Yos kixye re: «Tinkʼe aaleseens chi xik. Abʼan kaʼajwiʼ taaye li kʼaru tinye aawe».

Laj Balaam xkoho Moab saʼ xbʼeen li ixqi bʼuur, saʼ rokebʼl iqʼ. Abʼan ak xkʼoxla naq tixmaajewahebʼ laj Israel usta li Jehobʼa kixye re, naq inkʼaʼ tixbʼaanu. Tojaʼ naq, li xʼanjel li Jehobʼa oxibʼ sut kixkʼut ribʼ chiru saʼ xbʼe. Laj Balaam inkʼaʼ naril ru li anjel, abʼan li xbʼuur yook rilbʼal. Xbʼeen, li ixqi bʼuur kixjal xbʼe ut kixchʼik ribʼ saʼ pim. Xkabʼ, li ixqi bʼuur kijilok chiʼus saʼ xtoon tzʼak ut kiʼok xpitzʼbʼal roq laj Balaam chiru li tzʼak. Ut rox, li ixqi bʼuur kixbʼuchubʼ ribʼ saʼ xyi bʼe. Chiru li oxibʼ sut aʼin, laj Balaam inkʼaʼ naxkanabʼ xsakʼbʼal chi cheʼ li ixqi bʼuur.

Tojaʼ naq, li Jehobʼa kixbʼaanu naq li ixqi bʼuur t-aatinaq. Li bʼuur kixpatzʼ re laj Balaam: «Kʼaʼut nikinaasakʼ?». Laj Balaam kisumenk re: «Kʼaʼut nakaabʼaanu naq tinkʼut intoontil. Wi wank raj injutzʼchʼiichʼ tat-inkamsi raj». Li ixqi bʼuur kixye re: «Ak naabʼal chihabʼ aawokik saʼ inbʼeen. Ma ak inbʼaanuhom aawe aʼin junsutaq?».

Tojaʼ naq, li Jehobʼa kixkanabʼ naq laj Balaam tril li anjel. Li anjel kixye re: «Li Jehobʼa kixye aawe naq inkʼaʼ taamaajewahebʼ laj Israel». Laj Balaam kixye: «Moko us ta xinbʼaanu. Tinsutqʼiiq saʼ wochoch». Abʼan li anjel kixye re: «Naru nakatxik Moab, abʼan kaʼajwiʼ taaye li tixye aawe li Yos».

Ma nakaaye naq laj Balaam kixtaw xnaʼlebʼ? Inkʼaʼ, xbʼaan naq toj kixyal oxibʼ sut xmaajewankilebʼ laj Israel. Abʼan chiru li oxibʼ sut, li Jehobʼa kixbʼaanu naq choʼq reqaj li maajewank, t-osobʼtesinq. Tojaʼ naq, ebʼ laj Israel keʼyalok saʼ xbʼeenebʼ laj Moab, ut laj Balaam kikamk. Peʼyaal us raj naq laj Balaam kiʼabʼink chiru li Jehobʼa chalen saʼ xtiklajik?