Li xRahab naxmuqebʼ laj chʼuuk

Li wiibʼ chi winq re Israel xkohebʼ xchʼuukinkil li tenamit Jerico ut keʼkanaak saʼ rochoch jun li ixq xRahab xkʼabʼaʼ. Naq li awabʼej re Jerico kixnaw aʼin, kixtaqla ebʼ laj puubʼ saʼ rochoch li xRahab. Li ixq aʼin kixmuq li wiibʼ chi winq saʼ xbʼeen rochoch ut kixye rehebʼ laj puubʼ naq teʼxik xsikʼbʼalebʼ saʼ jalan chik naʼaj. Tojaʼ naq li xRahab kixye rehebʼ laj chʼuuk aʼin: «Texintenqʼa xbʼaan naq ninnaw naq li Jehobʼa wank eerikʼin ut teerechani li chʼochʼ aʼin. Yeehomaq we, bʼaanuhomaq usilal, naq teekol linjunkabʼal».

Ebʼ laj chʼuuk keʼxye re li xRahab: «Wi taabʼakʼ jun li kaqi kʼam saʼ laabʼentaan, relik chi yaal naq maakʼaʼ teʼxkʼul li wanqebʼ saʼ laawochoch. Chi joʼkan tkoleʼq laajunkabʼal».

Li xRahab kixtenqʼa ebʼ li winq chi elk Jerico ut kixkubʼsihebʼ saʼ bʼentaan rikʼin jun li kʼam. Ebʼ laj chʼuuk keʼxmuq ribʼ chiru oxibʼ kutan saʼebʼ li tzuul tojaʼ naq keʼsutqʼiik rikʼin laj Josue. Chirix chik aʼan, ebʼ laj Israel keʼnumeʼk saʼ li nimaʼ Jordan ut keʼxkawresi ribʼ chi rechaninkil li chʼochʼ. Jerico aʼan li xbʼeen tenamit li tento raj teʼrechani. Li Jehobʼa kixye rehebʼ naq teʼxsuti li tenamit jun sut ajwiʼ chiru kutan. Keʼxbʼaanu aʼin wulaj wulaj chiru waqibʼ kutan. Saʼ xwuq kutan, wuqubʼ sut keʼxsuti li tenamit. Chirix chik aʼan, ebʼ laj tij keʼxyaabʼasi li xtrompeet, ut ebʼ laj puubʼ re Israel keʼxjap rehebʼ chi anchalebʼ xchʼool. Tojaʼ naq kitʼaneʼk li tzʼak li nasutunk re li tenamit. Usta li rochoch li xRahab wank chiru li tzʼak li nasutunk re li tenamit, inkʼaʼ kitʼaneʼk. Li xRahab ut li xjunkabʼal keʼkoleʼk xbʼaan naq aʼan kʼojkʼo xchʼool rikʼin li Jehobʼa.