Jun chik laj kʼamolbʼe ut wiibʼ li ixq li inkʼaʼ nekeʼxuwak

Laj Josue kixbʼeresi li xtenamit li Jehobʼa chiru naabʼal chihabʼ ut kikamk naq wank 110 chihabʼ re. Naq toj yoʼyo chaq laj Josue, ebʼ laj Israel yookebʼ xloqʼoninkil li Jehobʼa. Abʼan naq kikamk, keʼok xloqʼoninkil li pechʼbʼil yos joʼ keʼxbʼaanu ebʼ laj Canaan. Saʼ xkʼabʼaʼ naq ebʼ laj Israel inkʼaʼ chik keʼabʼink chiru li Jehobʼa, aʼan kixkanabʼ naq li awabʼej Jabin tixkʼehebʼ saʼ chʼaʼajkilal. Tojaʼ naq li tenamit kixtzʼaama chiru li Jehobʼa naq teʼtenqʼaaq. Joʼkan naq li Jehobʼa kixkʼe rehebʼ jun chik laj kʼamolbʼe aj Barac xkʼabʼaʼ. Aʼan ttenqʼanq rehebʼ chi xloqʼoninkil wiʼ chik li Jehobʼa.

Li xDebora aʼan jun propeet. Kixtaqla xbʼoqbʼal laj Barac re xkʼebʼal re li esil aʼin li kixtaqla li Jehobʼa: «Ayu saʼ li roqhaʼ Cison rikʼin 10.000 chi winq re naq texyaloq saʼ xbʼeenebʼ laj puubʼ re laj Jabin. Aran taaqʼax ru laj Sisara, li naxjolomihebʼ laj puubʼ». Laj Barac kixye re li xDebora: «Tinxik, wi laaʼat tatxik chiwix». Li xDebora kixye re: «Tinxik chaawix, abʼan tento taanaw naq maawaʼ laaʼat tatkamsinq re laj Sisara. Li Jehobʼa kixye naq jun li ixq tbʼaanunq re».

Li xDebora kitaqeʼk saʼ li tzuul Tabor rochbʼen laj Barac ut ebʼ laj puubʼ re xkawresinkil ribʼebʼ. Naq laj Sisara kixnaw aʼin, kixchʼutubʼ taqʼa ebʼ li xbʼelebʼaal chʼiichʼ ut ebʼ laj puubʼ. Li xDebora kixye re laj Barac: «Hoon ajwiʼ li Jehobʼa tixbʼaanu naq tatqʼaxoq u». Tojaʼ naq laj Barac ut li 10.000 chi winq keʼkubʼeek saʼ li tzuul re naq teʼyaloq saʼ xbʼeen li kʼiila puubʼ re laj Sisara.

Chirix chik aʼan li Jehobʼa kixbʼaanu naq li xhaʼil li roqhaʼ Cison twulkʼuq chaq, ut ebʼ li xbʼelebʼaal chʼiichʼ laj Sisara keʼtʼilk saʼ li saklun. Laj Sisara kikubʼeek saʼ li xbʼelebʼaal chʼiichʼ ut xkoho saʼ aanil. Laj Barac ut ebʼ laj puubʼ keʼqʼaxok u saʼ xbʼeenebʼ laj puubʼ re laj Sisara, abʼan laj Sisara kiʼelelik ut kixmuq chaq ribʼ saʼ rochoch jun li ixq, xJael xkʼabʼaʼ. Li ixq aʼin kixkʼe leech chi rukʼ li winq ut kixtzʼap rikʼin jun li tʼikr. Warajenaq kikanaak laj Sisara xbʼaan naq jwal lubʼlu. Tojaʼ naq li xJael chi timil kijilok chixkʼatq, kixxeqʼ jun li cheʼ saʼ xjolom, ut kixkamsi.

Moqon chik, laj Barac kiwulak chi xsikʼbʼal laj Sisara. Li xJael kiʼelk saʼ rochoch ut kixye re: «Okan, tinkʼut chaawu li winq li yookat xsikʼbʼal». Laj Barac kiʼok saʼ li ochoch ut kiril laj Sisara chi tolto, kamenaq chik. Tojaʼ naq, laj Barac ut li xDebora keʼok chi bʼichank re xkʼebʼal xloqʼal li Jehobʼa xbʼaan naq kixtenqʼahebʼ chi xqʼaxbʼalebʼ li xikʼ nekeʼilok rehebʼ. Sa chik keʼwank ebʼ laj Israel chiru 40 chihabʼ.