Li Jehobʼa wank xkuyum rikʼin laj Jonas

Ebʼ li poyanam li wankebʼ chaq Ninive saʼ jun li tenamit re Asiria jwal maaʼusebʼ xnaʼlebʼ. Li Jehobʼa kixtaqla laj Jonas, li xpropeet, re naq txik Ninive chi xyeebʼal rehebʼ naq tento teʼxjal xnaʼlebʼ. Abʼan laj Jonas inkʼaʼ xkoho Ninive, kixjal xbʼe ut xtaqeʼk saʼ jun li jukubʼ li yook chi xik Tarsis.

Naq li jukubʼ wank saʼ palaw, kichalk jun li kawil iqʼ, ut ebʼ laj bʼeresinel jukubʼ kʼajoʼ naq keʼxuwak. Xeʼok chi tijok chiruhebʼ li xyos ut xeʼxpatzʼi chiribʼilebʼ ribʼ: «Kʼaʼut naqakʼul aʼin?». Tojaʼ naq, laj Jonas kixye rehebʼ: «Saʼ inmaak aʼin. Yookin chi elelik re naq inkʼaʼ tinbʼaanu li xinxtaqla wiʼ li Jehobʼa. Kutumaqin saʼ haʼ re naq txaqliiq aʼin». Ebʼ laj bʼeresinel jukubʼ inkʼaʼ raj nekeʼraj xkutbʼal saʼ haʼ, abʼan laj Jonas inkʼaʼ kixkanabʼ relajinkil ruhebʼ. Tojaʼ naq, xeʼxkut saʼ palaw, ut li iqʼ kixaqliik.

Laj Jonas kixkʼoxla naq tkamq. Naq yook chi xik rubʼel haʼ, kitijok chiru li Jehobʼa. Tojaʼ naq, li Jehobʼa kixtaqla jun li nimla kar re naq tixnuqʼ, abʼan inkʼaʼ xkamsi. Laj Jonas kitijok chiru li Jehobʼa saʼ xsaʼ li kar: «Relik chi yaal naq junelik chik tinʼabʼinq chaawu». Li Jehobʼa kixbʼaanu naq yoʼyooq laj Jonas saʼ li kar chiru oxibʼ kutan ut chirix chik aʼan txaʼwaaq chiru chʼochʼ.

Li Jehobʼa kixkol laj Jonas, abʼan, ma naraj xyeebʼal aʼin naq inkʼaʼ chik txik Ninive? Inkʼaʼ. Li Jehobʼa kitaqlank re wiʼ chik ut anaqwan kiʼabʼink chik chiru. Xkoho Ninive ut kixye rehebʼ li poyanam li maaʼusebʼ xnaʼlebʼ: «Chiru 40 kutan, li Jehobʼa tixsach li tenamit». Tojaʼ naq, xkʼulmank jun li naʼlebʼ. Ebʼ laj Ninive xeʼabʼink ut xeʼxjal xnaʼlebʼ. Li awabʼej re Ninive kixye re li tenamit: «Tzʼaamanqex chiru li Yos ut yotʼomaq eechʼool ut jalomaq eenaʼlebʼ, maare anchal inkʼaʼ tooxsach». Naq li Jehobʼa kiril aʼin, inkʼaʼ kixsachebʼ.

Laj Jonas kipoʼk naq li Jehobʼa inkʼaʼ kixsach li tenamit. Yal kʼoxla bʼayaq: li Jehobʼa kiwank xkuyum rikʼin laj Jonas ut kiruxtaana ru. Abʼan, laj Jonas inkʼaʼ kiruxtaana ebʼ laj Ninive. Kixchunubʼ ribʼ chirix li tenamit rubʼel xmu li xcheʼil kʼum ut kixkʼotzobʼ li ru. Li cheʼ kiʼok chi chaqik ut laj Jonas kʼajoʼ naq kipoʼk. Tojaʼ naq, li Jehobʼa kixye re: «Ma li cheʼ wank xwankil choʼq aawe chiruhebʼ laj Ninive. Laaʼin xwuxtaanahebʼ, joʼkan naq keʼkoleʼk». Kʼaru kiraj xkʼutbʼal li Yos chiru laj Jonas? Naq ebʼ laj Ninive wankebʼ xwankil chiru yalaq kʼaru chi cheʼ.