Nasachmank Jerusalen

Li tenamit Juda naabʼal sut kixkanabʼ li Jehobʼa ut kiʼok xloqʼoninkil li pechʼbʼil yos. Chiruhebʼ li chihabʼ aʼin, li Jehobʼa kixyal xtenqʼankilebʼ naq kixtaqla naabʼal li propeet. Abʼan ebʼ li poyanam inkʼaʼ nekeʼabʼink chiruhebʼ ut nekeʼxseʼe. Li Jehobʼa kiraj risinkil chi junajwa li loqʼonink pechʼbʼil yos. Chan raj ru tixbʼaanu?

Li awabʼej re Babilonia, Nabucodonosor, yook chaq rechaninkil jalan jalanq chi tenamit. Saʼ li xbʼeen sut naq kirechani Jerusalen, kixchap li awabʼej Joaquin, ebʼ laj jolominel tenamit, ebʼ laj puubʼ ut ebʼ li jalan chik xkʼanjelebʼ, ut kixkʼamebʼ Babilonia. Kixkʼam ajwiʼ li kʼaʼaq re ru li qʼaxal terto xtzʼaq li wank saʼ li rochoch li Jehobʼa. Moqon, laj Nabucodonosor kixxaqabʼ laj Sedequias choʼq awabʼej re Juda.

Saʼ xtiklajik, li awabʼej Sedequias kiʼabʼink chiru laj Nabucodonosor. Abʼan ebʼ li bʼalaqʼil propeet ut ebʼ li poyanam li wankebʼ chi xsutam nekeʼxye re laj Sedequias naq tixqʼet ribʼ chiru li tenamit Babilonia. Laj Jeremias kixye re: «Wi taaqʼet aawibʼ, tchalq kamk, weʼej ut yajel saʼ xbʼeen li tenamit Juda».

Naq xnumeʼk waqxaqibʼ chihabʼ, li awabʼej Sedequias kixqʼet ribʼ chiru Babilonia, ut re xbʼaanunkil aʼin kixpatzʼ xtenqʼankil rikʼinebʼ laj puubʼ re Egipto. Joʼkan naq, laj Nabucodonosor kixtaqla ebʼ laj puubʼ re xrahobʼtesinkil Jerusalen. Ebʼ laj puubʼ re Babilonia keʼxsut li tenamit. Laj Jeremias kixye re laj Sedequias: «Li Jehobʼa naxye naq wi taaqʼaxtesi aawibʼ saʼ ruqʼ li tenamit Babilonia, laaʼat ut li tenamit tkoleʼq. Abʼan, wi inkʼaʼ taaqʼaxtesi aawibʼ, teʼxkʼat Jerusalen ut tateʼxkʼam chi preexil». Laj Sedequias kixye: «Inkʼaʼ tinqʼaxtesi wibʼ!».

Naq ak xnumeʼk jun chihabʼ rikʼin waqibʼ po, ebʼ laj Babilonio keʼxjukʼ jun jachal li tzʼak re Jerusalen. Aran keʼok saʼ li tenamit ut keʼxkʼat. Keʼxkʼat ajwiʼ li rochoch li Yos, keʼxkamsi naabʼal li poyanam ut chi mil keʼxkʼam chi preexil.

Laj Sedequias kiʼelk Jerusalen ut kiʼelelik, abʼan ebʼ laj Babilonio keʼxtaqe, keʼxchap nachʼ rikʼin li tenamit Jerico ut keʼxkʼam rikʼin li awabʼej Nabucodonosor. Li awabʼej kixmin ru laj Sedequias chi rilbʼal chanru nekeʼxkamsi ebʼ li ralal. Moqon chik, kirisi saʼebʼ li ru ut kixkʼe saʼ tzʼalam. Aran kikamk laj Sedequias. Abʼan li Jehobʼa kixye li aatin aʼin re li tenamit Juda: «Naq tnumeʼq 70 chihabʼ, texinkʼam wiʼ chik Jerusalen saʼ leerochoch».

Kʼaru raj tkʼulmanq rikʼinebʼ li saaj al li keʼkʼameʼk Babilonia? Ma junelik teʼxloqʼoni li Jehobʼa?