Kaahibʼ li saaj li nekeʼabʼink chiru li Jehobʼa

Laj Nabucodonosor kixkʼamebʼ Babilonia ebʼ li xninqal ru winq re Juda ut kixxaqabʼ laj Aspenaz, laj jolominel kʼanjel, saʼ xbʼeenebʼ. Ut kixye ajwiʼ re laj jolominel kʼanjel aʼin naq tixsikʼ ebʼ li saaj al li kawaqebʼ ut wanqebʼ xnawom saʼ xyanqebʼ li xninqal ru winq aʼin. Ebʼ li saaj al aʼin teʼxkʼul xnimal xtzolbʼal chiru oxibʼ chihabʼ re naq teʼkʼeheʼq xnimal xkʼanjel saʼ li tenamit Babilonia. Tento naq teʼxtzol rilbʼal, xtzʼiibʼankil ut aatinak saʼ li aatinobʼaal Acadio re Babilonia. Tento ajwiʼ teʼxtzaka li tibʼelwa li nekeʼxkʼe saʼ rochoch li awabʼej. Kaahibʼ rehebʼ li saaj al aʼin aʼan chaq laj Daniel, laj Hananias, laj Misael ut laj Azarias. Abʼan laj Aspenaz kixjal li xkʼabʼaʼebʼ ut kiroksi li kʼabʼaʼej li naʼoksimank Babilonia: Beltsasar, Sadrac, Mesac ut Abednego. Kʼaru nakaaye, ma teʼnajtobʼresiiq tawiʼ chiru li Jehobʼa li tzolbʼal li teʼxkʼul?

Ebʼ li kaahibʼ chi saaj al aʼin nekeʼraj abʼink chiru li Jehobʼa. Nekeʼxnaw naq inkʼaʼ teʼxkʼulubʼa li tzakahemq li tixkʼe li awabʼej xbʼaan naq tenebʼanbʼil saʼ li Xchaqʼrabʼ li Jehobʼa naq wank li tzakahemq inkʼaʼ naru nekeʼxtzaka. Joʼkan naq keʼxye re laj Aspenaz: «Bʼaanu usilal, mooʼamin chi xwaʼbʼal li naxtzaka li awabʼej». Abʼan laj Aspenaz kixye rehebʼ: «Wi inkʼaʼ nekextzakank chiʼus, ut li awabʼej tril naq yajex, tinxkamsi».

Laj Daniel kixkʼoxla jun li naʼlebʼ. Kixye re laj kʼaakʼalenel: «Bʼaanu usilal, kʼe chiqatzaka ichaj ut haʼ chiru 10 kutan. Moqon chik tooʼaajuntaqʼeeta rikʼinebʼ li saaj li teʼxwaʼ li xtzakahemq li awabʼej». Laj kʼaakʼalenel kixkʼulubʼa aʼin.

Naq keʼnumeʼk 10 kutan, laj Daniel ut ebʼ li oxibʼ chi ramiiw jwal chʼinaʼus li rilobʼaalebʼ chiru ebʼ li junchʼol chik chi saaj. Jwal sa chaq saʼ xchʼool li Jehobʼa rikʼinebʼ xbʼaan naq keʼabʼink chiru. Kixkʼe ajwiʼ re laj Daniel li xnimal ru naʼlebʼ re xtawbʼal ru ebʼ li moy u ut ebʼ li matkʼ.

Naq xraqeʼk li xtzolbʼalebʼ chiru oxibʼ chihabʼ, laj Aspenaz kixkʼam ebʼ li saaj al rikʼin laj Nabucodonosor. Li awabʼej kiʼaatinak rikʼinebʼ ut kixkʼe reetal naq laj Daniel, laj Hananias, laj Misael ut laj Azarias jwal wankebʼ xnaʼlebʼ chiruhebʼ li junchʼol chik chi saaj al. Joʼkan naq kixsikʼebʼ ru re naq teʼkʼanjelaq saʼ rochoch li awabʼej. Chirix chik aʼan, naabʼal sut li awabʼej naxpatzʼ xnaʼlebʼ rikʼinebʼ chirix ebʼ li xnimal ru kʼanjel. Li Jehobʼa kixkʼe xnimal xnaʼlebʼebʼ chiru ebʼ li wankebʼ xnawom ut ebʼ laj qʼe li nekeʼkʼanjelak chiru li awabʼej.

Laj Daniel, laj Hananias, laj Misael ut laj Azarias moko wankebʼ ta saʼ li xtenamit, abʼan junelik wank saʼ xchʼoolebʼ naq wankebʼ saʼ xtenamit li Jehobʼa. Ut laaʼat? Naq laanaʼ laayuwaʼ moko wanqebʼ ta aawikʼin, ma junelik tjultikoʼq aawe li Jehobʼa?