Ebʼ li anjel nekeʼxye resil li xyoʼlajik li Jesus

Li awabʼej re li tenamit Roma, Cesar Augusto, kixye naq chixjunilebʼ laj Judiiy teʼxik saʼ li naʼaj bʼarwiʼ xeʼyoʼlaak chaq re xtzʼiibʼankil ribʼebʼ. Joʼkan naq, laj Jose ut li xMaria xkohebʼ Belen xbʼaan naq li xjunkabʼal laj Jose aran yoʼlajenaqebʼ. Ak yook chi tzʼaqlok xhoonalil naq tyoʼlaaq li kʼuulaʼal.

Naq keʼwulak Belen, inkʼaʼ keʼxtaw xnaʼajebʼ re hilank, kaʼajwiʼ wank xnaʼajebʼ li xul, ut aran kiyoʼlaak li Jesus. Li xMaria kixlan li kʼuulaʼal saʼ qʼunil tʼikr ut kixyokobʼ chi timil saʼ xwaʼlebʼaalebʼ li ketomq.

Nachʼ rikʼin Belen, ebʼ laj kʼaakʼalenel yookebʼ xyoʼlenkil ebʼ li xketomq chiru qʼoqyink. Maakʼaʼ saʼ xchʼoolebʼ, naq kutamil chiruhebʼ jun li anjel, ut keʼril chi xsutamebʼ li xloqʼal li Jehobʼa. Ebʼ laj kʼaakʼalenel keʼxuwak, abʼan li anjel kixye rehebʼ: «Mexxuwak, xinkʼam chaq chaabʼil esil. Li Sikʼbʼil Ru xyoʼlaak anaqwan aran Belen». Saʼ li hoonal aʼan, keʼxkʼut ribʼ naabʼalebʼ li anjel saʼ choxa li yookebʼ xyeebʼal: «Nim xloqʼal li Yos saʼ choxa ut wank tuqtuukilal saʼ ruuchichʼochʼ». Tojaʼ naq, ebʼ li anjel sachamilebʼ. Kʼaru keʼxbʼaanu ebʼ laj kʼaakʼalenel?

Ebʼ laj kʼaakʼalenel nekeʼxye chiribʼilebʼ ribʼ: «Yoʼqex Belen anaqwan ajwiʼ». Joʼkan naq, xkohebʼ saʼ junpaat ut xeʼxtaw laj Jose ut li xMaria saʼ xnaʼajebʼ li xul rochbʼen li kʼuulaʼal li tojaʼ tyoʼlaaq.

Chixjunilebʼ li keʼabʼink re li kixye li anjel rehebʼ laj kʼaakʼalenel sachsokebʼ keʼkanaak. Li xMaria kixkʼoxla rix chiʼus li kixye li anjel ut maajunwa kisachk saʼ xchʼool. Ebʼ laj kʼaakʼalenel xeʼsutqʼiik chi rilbʼalebʼ li xkarneer ut kʼajoʼ xeʼxbʼanyoxi re li Jehobʼa xbʼaan chixjunil li keʼril ut keʼrabʼi.