TZOLOM 80
Li Jesus naxsikʼ li 12 chi Apostol
Ak jun chihabʼ rikʼin waqibʼ po tana rokik chi puktesink li Jesus naq kixkʼoxla jun li nimla naʼlebʼ. Anihebʼ tixsikʼ re naq teʼkʼanjelaq rochbʼen ut re naq teʼxbʼeresi li xchʼuut li Yos? Re xsikʼbʼalebʼ, xbʼeenwa kixtzʼaama xnaʼlebʼ rikʼin li Jehobʼa. Joʼkan naq, xkoho xjunes saʼ jun li kʼicheʼ ut kitijok chixjunil li qʼoqyink. Wulajaq chik, li Jesus kixchʼutubʼ wiibʼ oxibʼ rehebʼ li xtzolom ut kixxaqabʼ li 12 chi Apostol. Ma nakaanaw xkʼabʼaʼ jun rehebʼ li winq aʼin? Keʼxkʼabʼaʼi Pedro, Andres, Santiago, Juan, Felipe, Bartolome, Tomas, Mateo, Santiago ralal laj Alfeo, Tadeo, Simon ut aj Judas Iscariote.
Andres, Pedro, Felipe, Santiago
Li 12 yookebʼ chirix li Jesus. Kixkʼut chiruhebʼ chanru teʼpuktesinq ut, chirix chik aʼan, kixtaqlahebʼ chi puktesink xjunesebʼ. Joʼkan ajwiʼ, li Jehobʼa kixkʼe xwankilebʼ re naq teʼisinq maaʼus aj musiqʼej ut teʼkʼirtasinq.
Juan, Mateo, Bartolome, Tomas
Choʼq re li Jesus, li 12 chi Apostol wankebʼ choʼq ramiiw, ut aʼan naxkʼoxla naq teʼxnaw xbʼaanunkil li kʼanjel. Ebʼ laj Pariseey nekeʼxkʼoxla naq ebʼ li Apostol maakʼaʼebʼ xwankil ut maakʼaʼ nekeʼxnaw. Abʼan li Jesus moko joʼkan ta kirilebʼ. Li Jesus kixtzolebʼ chiʼus re naq teʼxbʼaanu li kʼanjel. Ebʼ li Apostol teʼwanq rochbʼen li Jesus saʼ li hoonal li jwal loqʼ chiru aʼan. Joʼ naq, teʼwanq rochbʼen naq ak kamk re ut naq ak xwakliik wiʼ chik chi yoʼyo. Li xkʼihalil ebʼ li Xʼapostol ebʼ aj Galilea, joʼ li Jesus. Ut wankebʼ rehebʼ li Xʼapostol sumsukebʼ.
Santiago ralal laj Alfeo, Judas Iscariote, Tadeo, Simon
Ebʼ li Xʼapostol ebʼ aj maak, joʼkan naq nekeʼpaltoʼk. Wank sut inkʼaʼ nekeʼxkʼoxla li nekeʼxye ut wank sut moko us ta nekeʼnaʼlebʼak. Moko junelik ta xeʼwank xkuyum. Keʼxchoqi ajwiʼ ribʼ chirix ani rehebʼ wank tzʼaqal xwankil. Abʼan, chaabʼilebʼ ut nekeʼxra chaq li Jehobʼa. Aʼanebʼ xkaaxukuutil li chʼuut naq li Jesus maaʼanihaq chik saʼ Ruuchichʼochʼ.
«Nekexinkʼabʼaʼi amiiw, xbʼaan naq xinseeraqʼi eere chixjunil li xwabʼi xyeebʼal chaq Linyuwaʼ» (Juan 15:15).