TZOLOM 6

Chʼolobʼ chiʼus li xraqal li Santil Hu

Juan 10:33-36

WIIBʼ OXIBʼ LI AATIN: Moko kaʼaj tawiʼ taayaabʼasi junaq xraqal li Santil Hu ut saʼ junpaat taaye li jun chik naʼlebʼ. Taakʼe bʼan reetal naq teʼril chiʼus chanru naxchap ribʼ li raqal li xaayaabʼasi rikʼin li naʼlebʼ li taawaj xkʼutbʼal.

CHANRU XBʼAANUNKIL

Kʼut li aatin li wank xwankil. Naq ak xaayaabʼasi junaq li raqal, kʼe xwankil ebʼ li aatin li naxchap ribʼ rikʼin li naʼlebʼ li taawaj xkʼutbʼal. Tatruuq xbʼaanunkil aʼin wi nakaaye wiʼ chik ebʼ li aatin li wank xwankil malaj taabʼaanu junaq li patzʼom li ttenqʼanq rehebʼ chi xtawbʼal ebʼ li aatin aʼin.

Wi naq yooqat xchʼolobʼankil li raqal taawoksi wiibʼ oxibʼ li aatin li wank chisaʼ, kʼe reetal naq teʼruuq rilbʼal chanru naxchap ribʼ li raqal aʼin rikʼin li naʼlebʼ li wank xwankil.
Kʼe xwankil li taawaj xkʼutbʼal. Wi taaye kʼaʼut taayaabʼasi junaq xraqal li Santil Hu, tento taachʼolobʼ chanru naxchap ribʼ ebʼ li aatin li wank xwankil saʼ li raqal rikʼin aʼin.

Kanabʼ chi teeto li Santil Hu naq yooqat xchʼolobʼankil li raqal. Aʼin ttenqʼanq rehebʼ chi rilbʼal chanru naxchap ribʼ li nakaaye rikʼin li raqal li xaayaabʼasi.
Moko chʼaʼajkaq ta naq taachʼolobʼ. Maaye ebʼ li naʼlebʼ li inkʼaʼ naxchap ribʼ rikʼin li naʼlebʼ li wank xwankil. Il xbʼeenwa li ak nekeʼxnaw, aʼin tatxtenqʼa chi rilbʼal joʼnimal li naʼlebʼ naʼajmank re naq teʼxtaw ru chiʼus li taachʼolobʼ.