TZOLOM 07
Kʼaru naqanaw chirix li Jehobʼa?
Chan tawiʼ ru li Jehobʼa naq nakaakʼoxla? Ma nakaakʼoxla naq najt wank li Yos chiqu joʼ ebʼ li chahim ut naq maajunwa tooruuq chi nachʼok chixkʼatq? Malaj nakaakʼoxla naq aʼan nim xwankil ut maakʼaʼ rekʼahom? Chanru tzʼaqal li Jehobʼa? Saʼ li Santil Hu naqataw li xninqal ru xnaʼlebʼ li Jehobʼa ut naxye ajwiʼ qe naq naxkʼe xchʼool chiqix.
1. Kʼaʼut inkʼaʼ naqil ru li Yos?
«Li Yos aʼan musiqʼej» (Juan 4:24). Li Yos maakʼaʼ xbʼaqel ut xtibʼel. Aʼan jun li musiqʼej li wank saʼ choxa ut li xnaʼaj inkʼaʼ naru naqil.
2. Bʼar wank wiibʼ oxibʼ li xninqal ru xnaʼlebʼ li Jehobʼa?
Usta inkʼaʼ naqil ru li Jehobʼa, li xchaabʼil naʼlebʼ nokoorekʼasi chi xraabʼal naq naqanaw ru. Li Santil Hu naxye: «Li Qaawaʼ naxra li tiikil chʼoolej, ut inkʼaʼ naxkanabʼ xjunesebʼ li nekeʼpaabʼank re» (Salmo 37:28). Li Jehobʼa aʼan «aj toqʼobʼanel u ut aj uxtaan», qʼaxal wiʼ chik rikʼinebʼ li kristiʼaan li yookebʼ xkʼulbʼal junaq li rahilal (Santiago 5:11). «Nachʼ wank li Qaawaʼ rikʼinebʼ li nekeʼmaynak xchʼool: aʼan naxkolebʼ li maakʼaʼ chik roybʼenihomebʼ» (Salmo 34:19). Ma nakaanaw naq li naqabʼaanu naru tixsahobʼresi malaj tixrahobʼtesi xchʼool? Li kristiʼaan li naxbʼaanu junaq li maaʼusilal naxrahobʼtesi xchʼool li Jehobʼa (Salmo 78:40, 41). Abʼan li chaabʼil xbʼaanuhom naxsahobʼresi xchʼool (yaabʼasi Proverbios 27:11).
3. Chanru naxkʼutbʼesi li Jehobʼa naq nokooxra?
Li xnaʼlebʼ li Jehobʼa li qʼaxal nim aʼan li rahok. Li Santil Hu naxye: «Li Yos aʼan rahok» (1 Juan 4:8). Rikʼin li Santil Hu ut li xyobʼtesihom li Jehobʼa naxkʼutbʼesi naq nokooxra (yaabʼasi Hechos 14:17). Kʼam xkʼoxlankil chanru xooxyobʼtesi. Naru naqil li xbʼonol li kʼaʼaq re ru, naqayal xsahil ebʼ li tzekemq, li bʼich ut li xajok. Aʼan naraj naq tqayal xsahil li qayuʼam.
QASIKʼAQ XCHAMAL LI NAʼLEBʼ
Qilaq kʼaru naroksi li Jehobʼa re xbʼaanunkil li sachbʼachʼoolej. Ut moqon qatzʼilaq chanru naxkʼutbʼesi chiqu li xchaabʼil naʼlebʼ.
4. Li xsantil musiqʼej li Yos: li metzʼew li naroksi re xbʼaanunkil li naraj
Naq nokookʼanjelak naqoksi li quqʼ, li Jehobʼa naroksi li xsantil musiqʼej. Li Santil Hu moko naxye ta naq li santil musiqʼej aʼan jun li kristiʼaan, aʼan bʼan li metzʼew li naroksi li Yos re xbʼaanunkil chixjunil li naraj. Cheeyaabʼasi Lucas 11:13 ut Hechos 2:17 ut chexʼaatinaq chirix ebʼ li patzʼom aʼin:
Naru naqatzʼaama re li Yos li xsantil musiqʼej ut aʼan tixkʼe qe. Joʼkan naq, ma nakaakʼoxla naq li santil musiqʼej aʼan jun li kristiʼaan malaj li xmetzʼew li Yos li naroksi re xbʼaanunkil li naraj? Kʼaʼut naq joʼkan nakaakʼoxla?
Li Jehobʼa naroksi li xsantil musiqʼej re xbʼaanunkil li sachbʼachʼoolej. Cheeyaabʼasi Salmo 33:6 ut 2 Pedro 1:20, 21 ut chexʼaatinaq chirix li patzʼom aʼin:
Chanru kiroksi li Jehobʼa li xsantil musiqʼej?
5. Nokoojilok chixkʼatq li Jehobʼa xbʼaan li xchaabʼil naʼlebʼ
Usta kaw chaq xpaabʼal laj Moisés inkʼaʼ kixkanabʼ xsikʼbʼal xnaʼlebʼ chirix li Jehobʼa. Joʼkan naq kixye re li Jehobʼa: «Kʼe chinnaw laawajom re naq kʼojkʼooq linchʼool chawix» (Éxodo 33:13). Li Jehobʼa kixkʼut chiru laj Moisés wiibʼ oxibʼ li xninqal ru xnaʼlebʼ. Cheeyaabʼasi Éxodo 34:4-6 ut chexʼaatinaq chirix ebʼ li patzʼom aʼin:
Bʼar wank wiibʼ oxibʼ li xninqal ru xnaʼlebʼ li kixkʼut li Jehobʼa re laj Moisés?
Bʼar wank li xninqal ru xnaʼlebʼ li Jehobʼa li jwal nawulak chaawu?
6. Li Jehobʼa naxkʼe xchʼool chirixebʼ li kristiʼaan
Ebʼ laj hebreo keʼwank joʼ loqʼbʼil moos saʼ li tenamit Egipto. Kʼaru kirekʼa li Jehobʼa naq kiril naq keʼxrahobʼtesi li xtenamit? Yooqex rilbʼal xsaʼ li Santil Hu saʼ Éxodo 3:1-10 naq teʼrabʼi li XYAABʼ KUXEJ malaj yal cheeyaabʼasi. Moqon chexʼaatinaq chirix ebʼ li patzʼom aʼin:
Kʼaru nakaatzol saʼebʼ li raqal aʼin chirix li narekʼa li Jehobʼa naq nekeʼrahobʼtesiik li kristiʼaan? (Teeril li raqal 7 ut 8).
Ma nakaapaabʼ naq li Jehobʼa naraj xtenqʼankilebʼ li kristiʼaan? Ma naru tawiʼ xbʼaanunkil? Kʼaʼut naq joʼkan nakaakʼoxla?
7. Li yobʼtesihom naxkʼut li xchaabʼil naʼlebʼ li Jehobʼa
Rikʼin li xyobʼtesihom naru naqil li xchaabʼil naʼlebʼ li Jehobʼa. Cheerilaq li BʼIDEO. Moqon cheeyaabʼasi Romanos 1:20 ut chexʼaatinaq chirix li patzʼom aʼin:
Kʼaru li xchaabʼil naʼlebʼ li Jehobʼa nakaawil saʼ li yobʼtesihom?
WIIBʼ OXIBʼ NEKEʼXYE: «Li Yos aʼan jun musiqʼej li wank yalaq bʼar, maawaʼ jun kristiʼaan re naq toojiloq rikʼin».
Kʼaru nakaakʼoxla laaʼat?
Kʼaʼut nakaaye chi joʼkan?
LI AK XQATZOL
Li Jehobʼa aʼan jun musiqʼej joʼkan naq inkʼaʼ naqil ru. Jalan jalanq li xchaabʼil naʼlebʼ, abʼan li qʼaxal nim aʼan li rahok.
Qajultikaq
Kʼaʼut inkʼaʼ naqil ru li Jehobʼa?
Kʼaru li santil musiqʼej?
Bʼar wank wiibʼ oxibʼ li xninqal ru xnaʼlebʼ li Jehobʼa?
SIKʼ XKOMON LI NAʼLEBʼ
Taanaw ru chiʼus li Jehobʼa naq taatzol kaahibʼ li xninqal ru xnaʼlebʼ.
Tzol kʼaʼut nayeemank naq li Jehobʼa moko wank ta yalaq bʼar.
Tzol kʼaʼut li Santil Hu naxjuntaqʼeeta li santil musiqʼej rikʼin li «ruqʼ» li Yos.
Kichʼaʼajkoʼk chiru jun li winq li mutzʼ xpaabʼankil naq naraheʼk xbʼaan li Yos. Tzol kʼaru kitenqʼank re, re naq tixjal li xkʼaʼuxl.
«Ninruuk chik xtenqʼankilebʼ li junchʼol» (Laj Kʼaakʼalehom, 1 re octubre 2015)