TZOLOM 54
Li xkʼanjel «li moosej tiik xchʼool ut wank xnaʼlebʼ»
Li Jesús «aʼan xjolomil li Iklees» (Efesios 5:23). Saʼebʼ li qakutan naroksi «li moosej tiik xchʼool ut wank xnaʼlebʼ» re xbʼeresinkilebʼ laj kʼanjel chiru arin saʼ Ruuchichʼochʼ (yaabʼasi Mateo 24:45). Li Jesús kixaqabʼank re li «moosej» aʼin joʼkan naq wank bʼayaq xwankil. Usta joʼkan toj wank rubʼel xwankil li Jesús ut nakʼanjelak choʼq rehebʼ li riitzʼin li Kriist. Ani li moosej aʼin? Ut chanru nokooxtenqʼa?
1. Ani «li moosej tiik xchʼool ut wank xnaʼlebʼ»?
Li Jehobʼa junelik naroksi jun chi winq malaj jun chʼuut chi winq re xbʼeresinkil li xtenamit (Malaquías 2:7; Hebreos 1:1). Jun eetalil, naq ak kikamk li Jesús, ebʼ li apóstol ut ebʼ li cheekel winq re Jerusalén keʼok xbʼeresinkil li chʼuut (Hechos 15:2). Joʼ xbʼaanumank chaq junxil, anaqwan jun chʼuut chi cheekel winq li nawbʼilebʼ ru joʼ li Nekeʼjolomink re Xmolam li Jehobʼa nekeʼxkʼe qe li naʼlebʼ li naʼajmank re xkawubʼresinkil li qapaabʼal ut re puktesink. Li chʼuut aʼin nawbʼil ru joʼ «li moosej tiik xchʼool ut wank xnaʼlebʼ li kikʼeheʼk xwankil xbʼaan laj eechal re saʼ xbʼeenebʼ li rech moosil» (Mateo 24:45a). Li Nekeʼjolomink re Xmolam li Jehobʼa sikʼbʼilebʼ ru ut naq teʼkamq nekeʼroybʼeni awabʼejink rochbʼen li Kriist saʼ choxa.
2. Kʼaru li naʼlebʼ naxkʼe qe li moosej tiik xchʼool re xkawubʼresinkil li qapaabʼal?
Li Jesús kixtenebʼ saʼ xbʼeen li moosej aʼin «xkʼeebʼal xwahebʼ saʼ xqʼehil» rehebʼ laj paabʼanel (Mateo 24:45b). Joʼ naq li tzakahemq naxkawresi li qajunxaqalil, joʼkan ajwiʼ li naʼlebʼ li nachalk saʼ li Raatin li Yos nokooxkawubʼresi re naq tiikaq qachʼool chiru li Jehobʼa ut re naq tqabʼaanu li kʼanjel li kixkanabʼ saʼ quqʼ li Jesús (1 Timoteo 4:6). Naqakʼul ebʼ li naʼlebʼ aʼin saʼebʼ li chʼutam, li nimla chʼutam, ebʼ li qatasal hu ut ebʼ li bʼideo li chalenaq saʼ li Santil Hu. Chixjunil aʼin nokooxtenqʼa chi xnawbʼal kʼaru naraj li Jehobʼa ut xchaabʼilobʼresinkil li qamiiwil rikʼin.
QASIKʼAQ XCHAMAL LI NAʼLEBʼ
Qilaq kʼaʼut naʼajmank «li moosej tiik xchʼool ut wank xnaʼlebʼ» li nawbʼil ajwiʼ ru joʼ li Nekeʼjolomink re Xmolam li Jehobʼa.
Li Nekeʼjolomink re Xmolam li Jehobʼa nekeʼxkʼe li naʼajmank re xkawubʼresinkil li xpaabʼal ut nekeʼxtenqʼa ebʼ laj Testiiw saʼ chixjunil li Ruuchichʼochʼ.
3. Aajel ru naq kʼubʼkʼu ru li xtenamit li Jehobʼa
Li Jesús kixbʼeresihebʼ li xbʼeen aj paabʼanel ut joʼkan ajwiʼ naxbʼeresihebʼ li Nekeʼjolomink re Xmolam li Jehobʼa re naq teʼxkʼubʼ li xkʼanjelebʼ laj testiiw re li Jehobʼa. Cheerilaq li BʼIDEO.
Cheeyaabʼasi 1 Corintios 14:33, TNM, 40 ut chexʼaatinaq chirix ebʼ li patzʼom aʼin:
Ma naraj li Jehobʼa naq kʼubʼkʼukebʼ ru li xTestiiw? Kʼaʼut nakaaye chi joʼkan?
4. Li moosej tiik xchʼool naxkʼubʼ li puktesink
Li qʼaxal wank xwankil choʼq rehebʼ li xbʼeen aj paabʼanel aʼan xkʼebʼal resil li Xʼawabʼejilal li Yos. Cheeyaabʼasi Hechos 8:14, 25 ut chexʼaatinaq chirix ebʼ li patzʼom aʼin:
Saʼ xkutankilebʼ li apóstol, ani nabʼeresink re li puktesink?
Kʼaru keʼxbʼaanu laj Pedro ut laj Juan rikʼin li keʼyeheʼk re xbʼaan ebʼ li junchʼol chi apóstol?
Li nekeʼxkʼe chiʼubʼej li Nekeʼjolomink re Xmolam li Jehobʼa aʼan xkʼubʼankil li kʼanjel re xkʼebʼal resil li Xʼawabʼejilal li Yos. Cheerilaq li BʼIDEO.
Li kixkʼe xwankil li Jesús aʼan xkʼebʼal chi naweʼk li chaabʼil esil. Cheeyaabʼasi Marcos 13:10 ut chexʼaatinaq chirix ebʼ li patzʼom aʼin:
Kʼaʼut naq li Nekeʼjolomink re Xmolam li Jehobʼa nekeʼxkʼe xwankil xpuktesinkil li chaabʼil esil?
Kʼaʼut naʼajmank chiqu naq «li moosej tiik xchʼool ut wank xnaʼlebʼ» tixkʼubʼ li kʼanjel aʼin?
5. Li moosej tiik xchʼool nokooxbʼeresi
Li Nekeʼjolomink re Xmolam li Jehobʼa nekeʼxbʼeresi ebʼ laj Testiiw saʼ chixjunil li Ruuchichʼochʼ. Chanru naxkʼubʼ li nekeʼxbʼaanu? Kʼe reetal chanru xeʼxbʼaanu chaq li nekeʼxjolomi li xmolam li Jehobʼa saʼ xkutankilebʼ li apóstol. Cheeyaabʼasi Hechos 15:1, 2 ut chexʼaatinaq chirix ebʼ li patzʼom aʼin:
Kʼaʼut naq xeʼxwechʼi ribʼ ebʼ laj paabʼanel saʼ xkutankilebʼ li apóstol?
Bʼar keʼxsikʼ xtenqʼ laj Pablo, laj Bernabé ut ebʼ li junchʼol chik aj paabʼanel re xtuqubʼankil ru li chʼaʼajkilal?
Cheeyaabʼasi Hechos 15:12-18 ut 23-29 ut chexʼaatinaq chirix li patzʼom aʼin:
Kʼaru keʼxbʼaanu li nekeʼjolomink re xmolam li Jehobʼa saʼ xkutankilebʼ li apóstol re naq li Jehobʼa ttenqʼanq rehebʼ chi xtuqubʼankil li chʼaʼajkilal? (Teeril li raqal 12, 15 ut 28).
Cheeyaabʼasi Hechos 15:30, 31 ut 16:4, 5 ut chexʼaatinaq chirix ebʼ li patzʼom aʼin:
Chanru xeʼnaʼlebʼak li xbʼeen aj paabʼanel naq xeʼxkʼul li naʼlebʼ li xeʼxkʼubʼ li nekeʼjolomink re xmolam li Jehobʼa?
Chanru naqanaw naq li Jehobʼa kirosobʼtesihebʼ xbʼaan naq keʼabʼink?
Cheeyaabʼasi 2 Timoteo 3:16 ut Santiago 1:5 ut chexʼaatinaq chirix li patzʼom aʼin:
Kʼaru nekeʼxbʼaanu li Nekeʼjolomink re Xmolam li Jehobʼa saʼebʼ li qakutan re naq li Jehobʼa tbʼeresinq rehebʼ?
WIIBʼ OXIBʼ NEKEʼXYE: «Xpaabʼankil li Nekeʼjolomink re Xmolam li Jehobʼa aʼan xtaqenkil li winq».
Kʼaʼut nakaapaabʼ naq li Jesús yook xbʼeresinkilebʼ li Nekeʼjolomink re Xmolam li Jehobʼa?
LI AK XQATZOL
Li Nekeʼjolomink re Xmolam li Jehobʼa aʼan «li moosej tiik xchʼool ut wank xnaʼlebʼ» li kixxaqabʼ li Kriist. Aʼanebʼ nekeʼxkʼe xnaʼlebʼ laj paabʼanel saʼ chixjunil li ruuchichʼochʼ re xkawubʼresinkil li xpaabʼal.
Qajultikaq
Ani kisikʼok re «li moosej tiik xchʼool ut wank xnaʼlebʼ»?
Chanru nokooʼeʼxtenqʼa li Nekeʼjolomink re Xmolam li Jehobʼa?
Ma nakaapaabʼ naq li Nekeʼjolomink re Xmolam li Jehobʼa aʼan «li moosej tiik xchʼool ut wank xnaʼlebʼ»?
SIKʼ XKOMON LI NAʼLEBʼ
Kʼe reetal chanru nekeʼxkʼubʼ ribʼ li Nekeʼjolomink re Xmolam li Jehobʼa re xbʼaanunkil li xkʼanjelebʼ.
«Anihebʼ li Nekeʼjolomink re Xmolam li Jehobʼa?» (Li naʼlebʼ re jw.org)
Kʼe reetal kʼaru nekeʼxbʼaanu li Nekeʼjolomink re Xmolam li Jehobʼa re naq paabʼajelaq li naʼlebʼ li naqakʼul re xkawresinkil li qapaabʼal.
Tzʼaqal re ru li naʼlebʼ li wank saʼebʼ li qatasal hu (17:18)
Kʼaru nekeʼxkʼoxla li Nekeʼjolomink re Xmolam li Jehobʼa chirix li kʼanjel li kikʼeheʼk re xbʼaan li Jesús?
Kʼe reetal chanru naq ebʼ li qachʼutam ut ebʼ li nimla chʼutam naxkʼutbʼesi naq li Jehobʼa yook xbʼeresinkil li Nekeʼjolomink re li xmolam.