Ye li aatin li moko chʼaʼaj ta

Li kixbʼaanu li Jesús

BʼIDEO: Li Jesús naroksi jun li eetalil re xkʼutbʼal naq li Jehobʼa naxkʼe xchʼool chi qilbʼal

1. Taawil li BʼIDEO malaj taayaabʼasi Mateo 6:​25-27. Chirix chik aʼan taatzʼil rix ebʼ li patzʼom aʼin:

1. Kʼaru li eetalil kiroksi li Jesús re xkʼutbʼal naq li Jehobʼa naxkʼe xchʼool chi qilbʼal?

2. Usta li Jesús naxnaw naabʼal li naʼlebʼ chirixebʼ li xul li nekeʼrupupik, kʼaʼut kiroksi jun li naʼlebʼ li moko chʼaʼaj ta xtawbʼal ru? Kʼaʼut us li naʼlebʼ aʼin re kʼutuk?

Kʼaru naqatzol rikʼin li Jesús?

2. Wi li naqaye natawmank ru saʼ junpaat, ebʼ li qas qiitzʼin teʼxjultika li naqakʼut chiruhebʼ ut twulaq saʼ xchʼoolebʼ.

Kʼam aawe rikʼin li Jesús

3. Moko kʼi ta taaye. Maachʼolobʼ re laatzolom chixjunil li nakaanaw chirix junaq li naʼlebʼ. Kaʼajwiʼ taakʼut li naʼlebʼ li wank saʼ li kʼanjelobʼaal li yookex xtzolbʼal. Naq taabʼaanu junaq li patzʼom, taawoybʼeni naq tsumenq. Ut wi inkʼaʼ naxnaw xsumenkil malaj li naxye inkʼaʼ naxchap ribʼ rikʼin li Santil Hu, bʼaanu wiibʼ oxibʼ chik li patzʼom toj reetal tixtaw li xsumenkil. Wi ak xtaw ru li naʼlebʼ, numenqex saʼ li jun chik.

4. Oksi li naʼlebʼ li ak naxnaw re naq tixtaw ru li toj akʼ. Jun eetalil, wi taatikibʼ junaq li tzolom chirix li wakliik chi yoʼyo, naru nakaajultika chiru rikʼin wiibʼ oxibʼ li aatin li naxnaw chirix li naqakʼul naq nokookamk.

5. Sikʼ chiʼus li eetalil li taawoksi. Naq ok aawe roksinkil junaq li eetalil, xbʼeenwa kʼoxla ut bʼaanu aawe ebʼ li patzʼom aʼin:

1. «Ma inkʼaʼ chʼaʼaj li eetalil?».

2. «Ma tixtaw ru saʼ junpaat?».

3. «Kʼaru tixjultika saʼ junpaat: li naʼlebʼ li wank xwankil malaj li eetalil?».