Li naʼlebʼ choʼq re li chʼutam Qayuʼam ut Qakʼanjel joʼ aj Paabʼanel

Xtusulal naʼlebʼ

1. Saʼ li hu aʼin wank li naʼlebʼ choʼq rehebʼ li teʼtzʼaqonq saʼ li chʼutam Qayuʼam ut Qakʼanjel joʼ aj Paabʼanel. Naq teʼxkawresi ribʼ tento teʼril li naʼlebʼ li wank saʼ li hu aʼin ut li wank saʼ Xhuhil li qachʼutam Qayuʼam ut Qakʼanjel joʼ aj Paabʼanel. Us xwaklesinkil xchʼool chixjunilebʼ laj puktesinel re naq teʼtzʼaqonq chi xbʼaanunkil junaq li kʼanjel joʼ xyaabʼasinkil li Santil Hu malaj junaq li eetalil re aatinak. Ebʼ li poyanam li nekeʼwulak rajlal saʼebʼ li chʼutam teʼruuq ajwiʼ chi tzʼaqonk wi nekeʼxkʼulubʼa ut nekeʼxyuʼami li naxkʼut li Santil Hu. Wi wank ani naraj tzʼaqonk ut maajiʼ naʼok joʼ aj puktesinel, li cheekel winq li naxjolomi li chʼutam Qayuʼam ut Qakʼanjel tixtzʼil rix rikʼin kʼaru naʼajmank ut moqon chik tixye re ma truuq tzʼaqonk. Naq li cheekel winq t-aatinaq rikʼin tento naq twanq li nakʼehok re xtzolbʼal (malaj jun rehebʼ li xnaʼ xyuwaʼ aj paabʼanel). Aʼan ajwiʼ li naʼlebʼ li natzʼilmank rix rikʼin li naraj wank joʼ aj puktesinel li maajiʼ nakubʼeek xhaʼ (od-S tasal 8 raqal 8).

WIIBʼ OXIBʼ LI AATIN RE XTIKIBʼANKIL

2. Jun kʼasal. Naq ak xwank li bʼichank ut li tijok, laj bʼeresinel re li chʼutam Qayuʼam ut Qakʼanjel tixye chi sa saʼ xchʼool wiibʼ oxibʼ li naʼlebʼ li ttzolmanq. Tixye li naʼlebʼ li jwal wank xwankil li tkʼanjelaq chiru li chʼuut.

XCHAQʼALIL RU LI RAATIN LI YOS

3. Seeraqʼ: (10 kʼasal). Saʼ Xhuhil li qachʼutam wank li xjolomil li naʼlebʼ ut wiibʼ malaj oxibʼ li xnimal ru naʼlebʼ. Li kʼanjel aʼin kʼebʼil re jun li cheekel winq malaj jun laj tenqʼanel li naxnaw kʼutuk. Wi akʼ li tasal hu li tyaabʼasimanq saʼ li Santil Hu, t-ilmanq jun li bʼideo chirix li tasal hu aʼin. Li nabʼaanunk re li kʼanjel aʼin tixkʼut chanru naxchap ribʼ li bʼideo rikʼin xjolomil li seeraqʼ, abʼan chʼolchʼooq chiru naq tixchʼolobʼ ebʼ li naʼlebʼ li wank saʼ Xhuhil li qachʼutam. Wi toj wank li hoonal, tento ajwiʼ troksi ebʼ li eetalil li naxkʼe xtzʼaqobʼ li naʼlebʼ li ttzʼilmanq rix. Truuq ajwiʼ roksinkil xkomon li naʼlebʼ li tkʼanjelaq chiru re xchʼolobʼankil li xkʼanjel.

4. Li tertokil pek: (10 kʼasal). Saʼ li kʼanjel aʼin naʼuxmank ebʼ li patzʼom ut li sumenk abʼan maakʼaʼ xtiklajik ut xraqik. Li kʼanjel aʼin kʼebʼil re jun li cheekel winq malaj jun laj tenqʼanel li naxnaw kʼutuk. Li hermaan aʼin tixbʼaanu li wiibʼ chi patzʼom. Aʼan ajwiʼ tnawoq re ma aajel ru xyaabʼasinkil li xraqal li Santil Hu li wank aran. Ebʼ li hermaan li teʼsumenq inkʼaʼ teʼxqʼax 30 kʼajkʼasal.

5. Xyaabʼasinkil li Santil Hu: (4 kʼasal). Jun li hermaan winq tbʼaanunq re li kʼanjel aʼin. Li tbʼaanunq re li kʼanjel inkʼaʼ tixkʼe xtiklajik ut xraqik naq tixyaabʼasi ebʼ li xraqal li Santil Hu. Li cheekel winq li nabʼeresink re li chʼutam tixtenqʼa ebʼ laj bʼaanuhom kʼanjel re naq teʼxyaabʼasi chiʼus li yookebʼ rilbʼal, teʼxtaw ru, sa teʼxyaabʼasi ut inkʼaʼ teʼtʼilq, joʼ ajwiʼ teʼxnaw xkubʼsinkil ut xtaqsinkil xyaabʼ xkuxebʼ ut teʼxnaw bʼar teʼxaqliiq. Li cheekel winq li naxjolomi li chʼutam Qayuʼam ut Qakʼanjel xbʼeenwa tixkʼe reetal li xseebʼal ebʼ li hermaan xbʼaan naq wankebʼ li raqal li Santil Hu najt roq.

QATZOLAQ CHANRU TOOKʼUTUQ CHIʼUS

6. 15 kʼasal. Li tasal aʼin nokooxtenqʼa re naq chiqajunilo tqatzol xbʼaanunkil chi chaabʼil li xkʼanjel li Yos ut re naq chaabʼil chik toopuktesinq ut tookʼutuq. Ebʼ li cheekel winq teʼruuq ajwiʼ xkʼulbʼal jun rehebʼ li kʼanjel aʼin wi maaʼani naru nabʼaanunk re. Ebʼ laj puktesinel teʼxkʼe saʼ ajl li tzolom re li hu Kʼutuk malaj li hu Li rahok tatrekʼasi chi xtzolbʼalebʼ li wank saʼ paréntesis saʼ Xhuhil li qachʼutam. Wank sut li ttzʼilmanq rikʼin li chʼuut tixbʼaanu jun li cheekel winq malaj jun laj tenqʼanel li naxnaw kʼutuk (chaawil raqal 15 chirix chanru xbʼaanunkil li kʼanjel, taatzʼil rix rikʼin li chʼuut).

7. Raatinankil xbʼeen sut: Li kʼanjel aʼin naru naxbʼaanu junaq li hermaan winq malaj ixq. Li ttenqʼanq re tento naq rechwinqilal malaj rech-ixqilal malaj jun rehebʼ li xjunkabʼal. Naru teʼxbʼaanu chi xaqxo malaj chi chunchu. (Re xtawbʼal xkomon li naʼlebʼ chirix li tyeemanq ut chanru tbʼaanumanq li kʼanjel, chaawil li raqal 12 ut 13).

8. Ulaʼanihebʼ wiʼ chik: Li kʼanjel aʼin naru naxbʼaanu junaq li hermaan winq malaj ixq. Li ttenqʼanq re tento naq rechwinqilal malaj rech-ixqilal (km-S 5/97 2). Naru teʼxbʼaanu li kʼanjel chi xaqxo malaj chi chunchu. Laj bʼaanuhom kʼanjel tento tixkʼutbʼesi kʼaru tixye naq twulaq rulaʼaninkil li poyanam li kixkʼe xchʼool chi abʼink. (Re xtawbʼal xkomon li naʼlebʼ chirix li tyeemanq ut chanru tbʼaanumanq li kʼanjel, chaawil li raqal 12 ut 13).

9. Kʼehok tzolom: Li kʼanjel aʼin naru naxbʼaanu junaq li hermaan winq malaj ixq. Li ttenqʼanq re tento naq rechwinqilal malaj rech-ixqilal (km-S 5/97 2). Naru teʼxbʼaanu li kʼanjel chi xaqxo malaj chi chunchu. Li kʼanjel aʼin yal re xkʼutbʼal bʼayaq naq ak xtiklaak jun li tzolok. Moko aajel ta ru xyeebʼal wiibʼ oxibʼ li aatin saʼ xtiklajik malaj saʼ xraqik li kʼanjel, abʼan wi chirix li naʼlebʼ aʼin yook chi kʼanjelak, naru nabʼaanumank. Moko aajel ta ajwiʼ ru naq tyaabʼasimanq saʼ kawil kuxej chixjunil li naʼlebʼ usta naru xbʼaanunkil.

10. Chʼolobʼ laapaabʼal: Wi tbʼaanumanq joʼ jun li seeraqʼ, li kʼanjel aʼin tixkʼe jun li hermaan winq. Abʼan wi tbʼaanumanq joʼ jun li kʼutbʼesink naru naxbʼaanu junaq li hermaan winq malaj ixq. Li ttenqʼanq re tento naq rechwinqilal malaj rech-ixqilal malaj jun rehebʼ li xjunkabʼal. Li hermaan tento tixsume chi chaabʼil ut chi chʼolchʼo ru li patzʼom rikʼin roksinkil li kikʼemank re. Yaal re ma tixye bʼar elenaq chaq li naʼlebʼ naq yook xbʼaanunkil li xkʼanjel.

11. Seeraqʼ: Li kʼanjel aʼin tixkʼe jun li hermaan ut tixbʼaanu joʼ jun li seeraqʼ. Naq li seeraqʼ elenaq chaq saʼ li xkomon li naʼlebʼ A re li hu Li rahok, li hermaan tento tixye chanru t-oksimaq ebʼ li raqal naq tqaye li chaabʼil esil. Jun eetalil, naru tixye kʼaru naraj xyeebʼal li raqal, joqʼe roksinkil ut chanru xchʼolobʼankil re naʼlebʼak rikʼinebʼ li kristiʼaan. Naq naʼoksimank jun rehebʼ li tzolom re li hu Li rahok, li hermaan tento tixkʼe xchʼool chi xkʼutbʼal chanru xbʼaanunkil saʼ li puktesink. Wi aajel ru, naru troksi ebʼ li eetalil li wank saʼ li naʼlebʼ 1 re li tzolom malaj ebʼ li raqal li wankebʼ chisaʼ.

12. Li tyeemanq: Li naʼlebʼ saʼ li raqal aʼin ut li jun chik t-oksimanq naq tbʼaanumanq li kʼanjel «Raatinankil xbʼeen sut» ut «Ulaʼanihebʼ wiʼ chik». Wi inkʼaʼ nakʼemank jun chik li naʼlebʼ, li hermaan tixkʼut li yaal li naxye li Santil Hu li wank xwankil choʼq re li kristiʼaan li yook chi aatinak wiʼ ut xkanabʼankil junaq chik li patzʼom re rulaʼaninkil wiʼ chik. Li hermaan tento tixsikʼ junaq li naʼlebʼ li tkʼanjelaq saʼ li xteep. Yaal re ma tixyeechiʼi junaq li tasal hu malaj tixkʼut junaq li bʼideo li wank saʼ li kʼanjelobʼaal re kʼutuk. Tento tixkawresi ribʼ re naq tixnaw chanru seeraqʼik, tixkʼe xchʼool chirix li kristiʼaan, t-aatinaq joʼ kʼaynaq xbʼaanunkil ut inkʼaʼ yal tixtzol li tixye.

13. Chanru tbʼaanumanq: Li hermaan tento troksi li naʼlebʼ li yook chi kʼulmank saʼ li xteep. Jun eetalil:

(1) Chirekabʼlal: Aʼan aatinak rikʼinebʼ li kristiʼaan, saʼ selular malaj rikʼin esilhu, ut rulaʼaninkil wiʼ chik li kristiʼaan li xtawmank saʼ li puktesink.
(2) Puktesink yalaq bʼar: Aʼan xyeebʼal li chaabʼil esil naq laatzʼ qu malaj naq yooko chi kʼanjelak. Jun eetalil, naru xwotzbʼal junaq xraqal li Santil Hu saʼ li qakʼanjel, saʼ li tzolebʼaal, saʼ li qateep, saʼ bus malaj jalan chik.
(3) Puktesink bʼarwiʼ nekeʼnumeʼk naabʼal li kristiʼaan: Chisaʼ naʼokenk roksinkil li kʼanjelobʼaal, saʼ li kʼayil, saʼ li bʼe, saʼ li parke, bʼarwiʼ nekeʼxaqli li kaar ut bʼarwiʼ wankebʼ naabʼal li kristiʼaan.

14. Roksinkil ebʼ li bʼideo ut ebʼ li hu: Aʼ yaal chanru li naʼlebʼ, li hermaan naru troksi junaq li bʼideo malaj tasal hu. Ut wi chisaʼ li kʼanjel naʼok jun li bʼideo malaj tixkʼoxla roksinkil, naru troksi ut tixtzʼil rix, abʼan mixkʼe.

QAYUʼAM JOʼ AJ PAABʼANEL

15. Li tasal aʼin natiklaak rikʼin jun li bʼich. Chiru 15 kʼasal twanq jun malaj wiibʼ li kʼanjel li tixtenqʼahebʼ li hermaan chi xyuʼaminkil li Raatin li Yos. Abʼan wi inkʼaʼ naxye naq tjalmanq, li kʼanjel aʼin tixbʼaanu jun li cheekel winq malaj jun laj tenqʼanel li naxnaw kʼutuk, abʼan li kʼanjel li naʼajmank saʼ li chʼuut kaʼajwiʼ jun li cheekel winq tkʼehoq re. Naq ttzʼilmanq rix junaq li naʼlebʼ rikʼin li chʼuut, li hermaan li yook chi bʼeresink re, naru tixbʼaanu jalan chik li patzʼom. Tixtikibʼ rikʼin wiibʼ oxibʼ li aatin re naq truuq xkʼebʼal xwankil li naʼlebʼ ut re naq ebʼ li hermaan teʼtzʼaqonq. Wi tbʼaanumanq wiibʼ oxibʼ li patzʼom re junaq li hermaan, us raj naq tnumeʼq chiru wi naruhank.

16. Xtzolbʼal li Santil Hu saʼ li chʼuut: (30 kʼasal). Li kʼanjel aʼin tixbʼaanu jun li cheekel winq li naxnaw kʼutuk (saʼebʼ li chʼuut bʼarwiʼ moko naabʼalebʼ ta li cheekel winq naru roksinkil ebʼ laj tenqʼanel li nekeʼxnaw kʼutuk). Ebʼ li chʼuut chi cheekel winq teʼxye anihebʼ teʼruuq xbʼaanunkil li kʼanjel aʼin. Ebʼ li hermaan aʼin tento teʼxnaw xbʼaanunkil chiʼus re naq inkʼaʼ teʼxqʼax li hoonal, teʼxsikʼ chiʼus ebʼ li xraqal li Santil Hu li teʼxyaabʼasi ut teʼxtenqʼa chixjunilebʼ re rilbʼal chanru teʼxyuʼami li yookebʼ xtzolbʼal. Ut li ttenqʼanq rehebʼ aʼan li naʼlebʼ chirix chanru xbʼeresinkil li kʼanjel patzʼok ut sumenk (w23.04 perel 24, kaaxukuut). Wi ak xtzʼilmank rix chiʼus li naʼlebʼ, moko aajel ta ru xbʼaanunkil li 30 kʼasal. Wi naruhank, tento roksinkil jalan jalanq aj bʼeresinel ut li teʼyaabʼasinq re li hu rajlal xamaan. Wi li nabʼeresink re li chʼutam tixye re li yook xbʼaanunkil li kʼanjel aʼin naq tixkʼos li tzolok, aʼan yaal re chanru tixbʼaanu. Naru ajwiʼ naq inkʼaʼ chik tyaabʼasimanq junjunq li raqal.

WIIBʼ OXIBʼ LI AATIN RE XRAQBʼAL

17. 3 kʼasal. Li tbʼeresinq re li chʼutam tixjultika wiibʼ oxibʼ li xnimal ru naʼlebʼ li xqatzol saʼ li chʼutam. Naru ajwiʼ tixye rikʼin wiibʼ oxibʼ li aatin li ttzolmanq saʼ li jun chik xamaan. Wi toj wank li hoonal, naru tixye li xkʼabʼaʼebʼ li teʼnumeʼq saʼ li jun chik xamaan. Abʼan, wi aajel ru, li nabʼeresink re li chʼutam troksi li hoonal aʼin re xkʼebʼal junaq li esil malaj xyaabʼasinkil junaq li esilhu. Ebʼ li esil joʼ xhoonalil li puktesink, ut ebʼ li chʼuut li teʼtzʼaqonq saʼ li saabʼesink, inkʼaʼ tyaabʼasimanq, tkʼemanq bʼan li hu aʼin saʼ xnaʼaj ebʼ li esil. Wi maakʼaʼ chik li hoonal re xkʼebʼal li esil malaj xyaabʼasinkil ebʼ li esilhu li naʼajmank, li nabʼeresink re li chʼutam tixye rehebʼ li teʼtzʼaqonq saʼ li tasal «Qayuʼam joʼ aj paabʼanel» naq teʼxkʼos bʼayaq xhoonalil li xkʼanjelebʼ (chaawil li raqal 16 ut 19). Li chʼutam traqeʼq rikʼin bʼichank ut tijok.

XKʼEBʼAL XKAWIL XCHʼOOL UT XNAʼLEBʼ

18. Naq ak xbʼaanumank junaq li kʼanjel, li nabʼeresink re li chʼutam maare chiru jun kʼasal tixbʼanyoxi li xkʼanjel li hermaan ut tixkʼe xnaʼlebʼ rikʼin li tzolom li yook chi kʼanjelak wiʼ. Naq li nabʼeresink re li chʼutam tixye xkʼabʼaʼ laj bʼaanuhom kʼanjel, inkʼaʼ tixye chirix kʼaru li tzolom kixkawresi ribʼ. Saʼ xraqik li kʼanjel ut naq ak xkawresi xchʼool laj bʼaanuhom kʼanjel, li nabʼeresink re li chʼutam truuq xyeebʼal chirix kʼaru li tzolom kixkawresi ribʼ ut tixye kʼaʼut kixbʼaanu chiʼus malaj tixchʼolobʼ saʼ tuulanil kʼaʼut tixkʼe xchʼool chirix. Li nabʼeresink re li chʼutam truuq ajwiʼ xyeebʼal jalan chik li naʼlebʼ chirix li kʼutbʼesink li truuq xtenqʼankil laj bʼaanuhom kʼanjel malaj li chʼuut. Saʼ xraqik li chʼutam malaj saʼ jun chik li hoonal, naru nakʼemank xnaʼlebʼ saʼ junesal ut isinbʼilaq saʼ li hu Li rahok, Kʼutuk malaj Benefíciese, maare chirix li kʼanjel kikʼemank re malaj jalan chik (saʼebʼ li raqal 19, 24 ut 25 taataw xkomon li naʼlebʼ chirix li xkʼanjel li najolomink re li chʼutam Qayuʼam ut Qakʼanjel ut li xkʼanjel li xkabʼil aj kʼehol naʼlebʼ).

HOONAL

19. Maajun li kʼanjel (joʼ ajwiʼ li tixye li nabʼeresink re li chʼutam) tixqʼax li hoonal li ak xaqabʼanbʼil. Usta li Xhuhil li qachʼutam naxkʼe li hoonal li tbʼaanumanq wiʼ junaq li kʼanjel, moko aajel ta ru naq tkʼemanq xtzʼaqobʼ li kʼanjel wi ak xbʼaanumank chiʼus usta inkʼaʼ xwulak saʼ li kʼasal yeebʼil re. Wi ebʼ li hermaan teʼxqʼax li hoonal saʼebʼ li xkʼanjel, li naxbʼeresi li chʼutam malaj li xkabʼil aj kʼehol naʼlebʼ t-aatinaq rikʼinebʼ saʼ junesal (chaawil li raqal 24 ut 25). Li xhoonalil li xaqabʼanbʼil choʼq re li chʼutam aʼan 1 hoonal rikʼin 45 kʼasal, saʼ xyanq aʼin nawank li bʼichank ut li tijok.

NAQ LI CHEEKEL WINQ NARULAʼANI LI QACHʼUUT

20. Saʼ li xamaan li twanq wiʼ li ulaʼanink chʼuut, tbʼaanumanq ebʼ li kʼanjel li wank saʼ Xhuhil li qachʼutam abʼan yal tjalmanq bʼayaq. Choʼq reqaj li kʼanjel re «Xtzolbʼal li Santil Hu saʼ li chʼuut» twanq jun li seeraqʼ chiru 30 kʼasal li tixkʼe li naʼulaʼanink chʼuut. Abʼan re naq tixkʼe li xseeraqʼ, xbʼeenwa li nabʼeresink re li chʼutam tixjultika li xqatzol ut tixye wiibʼ oxibʼ li naʼlebʼ li t-ilmanq saʼ li jun chik xamaan, tixkʼe ebʼ li esil, tixyaabʼasi ebʼ li esilhu li naʼajmank ut tixkʼe resil li naʼulaʼanink chʼuut. Naq tixraq li xseeraqʼ, li naʼulaʼanink chʼuut tixraq li chʼutam rikʼin li bʼich li sikʼbʼil ru xbʼaan. Naru tixye re jun li hermaan naq tixbʼaanu li tij. Chiru li xamaan aʼin, maakʼaʼaq li chʼutam saʼ li xkabʼ naʼaj. Wi saʼ li qachʼuut wankebʼ li jalan raatinobʼaal, naru teʼwanq xchʼutam usta li qachʼuut yooq chi ulaʼaniik. Abʼanan, teʼqʼaxonq rikʼin li chʼuut re rabʼinkil li seeraqʼ li tixkʼe li naʼulaʼanink chʼuut.

LI XAMAAN RE LI NIMLA CHʼUTAM

21. Maakʼaʼaq li chʼutam chiru li xamaan naq twanq li nimla chʼutam. Tjultikamanq rehebʼ li hermaan naq teʼxtzol chixjunqalebʼ malaj joʼ junkabʼal li xtzolmank raj saʼ li chʼutam chiru li xamaan aʼan.

LI XAMAAN RE XNIMANKIL LI XKAMIK LI JESÚS

22. Wi li Xnimankil li Xkamik li Jesús tnaq saʼ xyanqil xamaan, inkʼaʼ chik tbʼaanumanq li chʼutam Qayuʼam ut Qakʼanjel.

LI CHEEKEL WINQ LI NAXJOLOMI LI CHʼUTAM QAYUʼAM UT QAKʼANJEL

23. Aʼan jun cheekel winq li kisikʼeʼk ru xbʼaan li jun chʼuut chi cheekel winq. Li xkʼanjel aʼan rilbʼal naq teʼxkʼubʼ chiʼus li chʼutam ut teʼxbʼaanu joʼ chanru naxye li hu aʼin. Tento naq junelik wanq saʼ aatin rikʼin li xkabʼil aj kʼehol naʼlebʼ. Naq ak wanq chik li Xhuhil li qachʼutam, tixsikʼ li teʼtzʼaqonq chi xbʼaanunkil li kʼanjel re li wiibʼ po. Saʼ li kʼanjel aʼin wank li nabʼeresink re li chʼutam, kʼutuk chiʼus ut xkomon li kʼanjel li nawank saʼ li chʼutam. Choʼq re Xchaqʼalil ru li Raatin li Yos, Qayuʼam ut Qakʼanjel ut xbʼeresinkil li chʼutam, kaʼajwiʼ nekeʼokenk li sikʼbʼilebʼ ru xbʼaan li cheekel winq (chaawil li raqal 3-16 ut 24). Naq tixye ani tbʼaanunq re li kʼanjel tixkʼe saʼ ajl li xchihabʼebʼ, li nekeʼxnaw xbʼaanunkil ut naq inkʼaʼ nekeʼxuwak chi aatinak chirix junaq li naʼlebʼ. Ut tril naq tkʼemanq naq oxibʼ xamaan chik ma nawulak xkutankil li xkʼanjelebʼ. Saʼ li kʼanjel qatzolaq chanru tookʼutuq chiʼus tento t-isimanq chi huhil ut t-oksimanq li hu Kʼanjel choʼq re li qachʼutam Qayuʼam ut Qakʼanjel (S-89). Tril ajwiʼ naq li tustukil kʼanjel re li chʼutam re li xamaan aʼan tkʼemanq saʼ xnaʼaj li esil. Ebʼ li cheekel winq naru texxaqabʼ jun rehebʼ aʼan malaj junaq aj tenqʼanel saʼ li chʼuut re xbʼaanunkil aʼin. Abʼan, kaʼajwiʼ ebʼ li cheekel winq naru teʼxsikʼ ani teʼtzʼaqonq chi xbʼaanunkil li kʼanjel Xchaqʼalil ru li Raatin li Yos, Qayuʼam ut Qakʼanjel ut xbʼeresinkil li chʼutam.

LI CHEEKEL WINQ LI NAXBʼERESI LI CHʼUTAM QAYUʼAM UT QAKʼANJEL

24. Saʼ li junjunq chi xamaan, jun li cheekel winq tixbʼeresi chalen saʼ xtiklajik toj saʼ xraqik li chʼutam Qayuʼam ut Qakʼanjel (saʼebʼ li chʼuut bʼarwiʼ moko naabʼalebʼ ta li cheekel winq, naru nekeʼroksi ebʼ laj tenqʼanel li nekeʼxnaw kʼutuk). Li cheekel winq li naxbʼeresi li chʼutam tento tixkʼubʼ wiibʼ oxibʼ li aatin re xtikibʼankil ut re xraqbʼal. Tento tixye ani teʼbʼaanunq re li junjunq chi kʼanjel ut, wi moko naabʼalebʼ ta li cheekel winq, maare tento ajwiʼ tixbʼaanu junaq chik li kʼanjel ut qʼaxal chik bʼar tkʼutbʼesimanq jun li bʼideo. Li tyeemanq saʼ xyanq li junjunq chi kʼanjel moko najt ta roq. Li chʼuut chi cheekel winq tixye ani rehebʼ truuq xbʼaanunkil li kʼanjel aʼin. Li sikʼbʼilaqebʼ ru joqʼeqil texbʼeresi li chʼutam aʼin. Aʼ yaal li naʼajmank, li cheekel winq li najolomink re li chʼutam Qayuʼam ut Qakʼanjel maare aʼan tbʼeresinq re kokʼaj xsaʼ li chʼutam chiruhebʼ li junchʼol chi cheekel winq. Joʼkan ajwiʼ, wi jun li cheekel winq naru xbʼeresinkil «Xtzolbʼal li Santil Hu saʼ li chʼuut», maare truuq ajwiʼ xbʼeresinkil li chʼutam. Abʼanan, aajel ru naq li tbʼeresinq re aʼin tixnaw xwaklesinkilebʼ xchʼool ut saʼ tuulanil tixkʼehebʼ xnaʼlebʼ ebʼ laj bʼaanuhom kʼanjel. Tenebʼanbʼil ajwiʼ saʼ xbʼeen naq saʼ xhoonalil traqeʼq li chʼutam (chaawil li raqal 17 ut 19). Wi wank naʼaj chiru ut wi li nabʼeresink re li chʼutam naraj, naru xkʼebʼal junaq chik li micrófono ut aran tixye anihebʼ teʼtzʼaqonq naq ak yookebʼ xkʼebʼal ribʼ saʼ li naʼaj bʼar teʼxbʼaanu li kʼanjel. Re naq inkʼaʼ tsachmanq li hoonal, naru ajwiʼ xkʼebʼal jun li meex chiru ut jun li tem re naq laj bʼeresinel chʼutam wanq aran naq yooqebʼ xyaabʼasinkil li Santil Hu ut li tasal «Qatzolaq chanru tookʼutuq chiʼus».

XKABʼIL AJ KʼEHOL NAʼLEBʼ

25. Wi naruhank, us xsikʼbʼal junaq li cheekel winq li naxnaw xkʼebʼal li seeraqʼ. Naq t-ajmanq, tixkʼe xnaʼlebʼebʼ li cheekel winq ut ebʼ laj tenqʼanel li teʼtzʼaqonq saʼ li chʼutam Qayuʼam ut Qakʼanjel, li teʼxkʼe li seeraqʼ saʼ xraqik li xamaan, li teʼbʼeresinq re li hu Laj Kʼaakʼalehom malaj «Xtzolbʼal li Santil Hu saʼ li chʼuut», malaj li teʼyaabʼasinq re ebʼ li tasal hu (chaawil li raqal 19). Wi wankebʼ naabʼal li cheekel winq li nekeʼxnaw xkʼebʼal li seeraqʼ ut kʼutuk, naru naxaqabʼamank jun li xkabʼil aj kʼehol naʼlebʼ rajlal chihabʼ. Moko aajel ta ru naq tixkʼehebʼ xnaʼlebʼ rajlal naq teʼxbʼaanu junaq li kʼanjel.

XKABʼ NAʼAJ

26. Aʼ yaal jarubʼebʼ laj bʼaanuhom kʼanjel, ebʼ li chʼuut teʼruuq roksinkil li xkabʼ naʼaj. Saʼ li junjunq chi naʼaj wanq jun aj kʼehol naʼlebʼ li naxnaw kʼutuk, wi naruhank junaq li cheekel winq. Wi aajel ru, naru naʼoksimank junaq laj tenqʼanel li naxnaw kʼutuk. Li chʼuut chi cheekel winq tyeehoq re anihebʼ teʼruuq xbʼaanunkil li kʼanjel aʼin, ut ma teʼjalaaq malaj inkʼaʼ. Laj kʼehol naʼlebʼ tento tixbʼaanu li naxye saʼ li raqal 18. Teʼyeemanq rehebʼ laj bʼaanuhom kʼanjel naq teʼxik saʼ li xkabʼ naʼaj naq traqeʼq li kʼanjel «Li tertokil pek», re li tasal «Xchaqʼalil ru li Raatin li Yos». Naq ak xraqeʼk li tasal «Qatzolaq chanru tookʼutuq chiʼus», chixjunilebʼ teʼsutqʼiiq saʼ li xbʼeen naʼaj.

EBʼ LI BʼIDEO

27. Saʼ li chʼutam saʼ xyanqil xamaan t-oksimanq wiibʼ oxibʼ li bʼideo li wanq saʼ li kʼanjelobʼaal JW Library® li naru rilbʼal saʼ li selular, saʼ li tableta malaj saʼ jalan chik.

S-38-GK 11/23