Kʼaru tixbʼaanu li Yos?

Jun chaabʼil amiiw aʼan li naru nokooxtenqʼa naq wanqo saʼ chʼaʼajkilal. Joʼkan naq wankebʼ nekeʼxye naq li Yos moko qamiiw ta, xbʼaan naq nekeʼxkʼoxla naq maakʼaʼ naxbʼaanu re qatenqʼankil. Abʼanan, ak naabʼal kixbʼaanu chiqix ut, joʼkan ajwiʼ, chi seebʼ tixtuqubʼ ru chixjunil li qachʼaʼajkilal ut trisi li rahilal. Kʼaru tixbʼaanu li Yos?

TRISI CHI JUNAJWA LI MAAʼUSILAL

Li Yos trisi chi junajwa li maaʼusilal naq tixsach li nakʼamok chaq re aʼin. Li Santil Hu naxkʼut ani nakʼamok chaq re aʼin naq naxye: «Chixjunil li ruuchichʼochʼ wank rubʼel xwankil li maaʼus» (1 Juan 5:19). «Li maaʼus» aʼan laj Tza, li Jesus kixkʼabʼaʼi joʼ «laj Taqlanel saʼ xbʼeen li ruuchichʼochʼ aʼin» (Juan 12:31). Laj Tza aʼan li xxeʼil li chʼaʼajkilal li nekeʼxkʼul ebʼ li qas qiitzʼin. Kʼaru tixbʼaanu li Yos chirix aʼin?

Chi seebʼ, li Jehobʼa troksi li Ralal re xsachbʼal «xwankil laj eechal re li kamk, aʼ laj tza» (Hebreos 2:14; 1 Juan 3:8). Li Santil Hu naxkʼut naq laj Tza naxnaw naq «ajlanbʼil kutan aj chik taawanq» re naq tsachmanq (Apocalipsis 12:12). Li Yos tixsach ajwiʼ li maaʼusebʼ xnaʼlebʼ (Salmo 37:9; Proverbios 2:22).

TIXBʼAANU NAQ CHʼINAʼUSAQ CHIXJUNIL LI RUUCHICHʼOCHʼ

Naq ak xrisi li maaʼusilal, laj Yobʼtesinel tixbʼaanu naq ttzʼaqloq ru li rajom chi junelik choʼq rehebʼ li qas qiitzʼin ut li Ruuchichʼochʼ. Chanruhaq li yuʼam aʼin?

Twanq li tuqtuukilal chi junelik. «Aʼut ebʼ li nebʼaʼ teʼreechani li chaabʼil naʼajej [«li Ruuchichʼochʼ», TNM]. Kʼajoʼ xnimal li tuqtuukil usilal teʼxyal chi junelik!» (Salmo 37:11).

Twanq li chaabʼil tzakahemq ut numtajenaqaq. «Numtajenaqaq li awimq saʼ ruuchichʼochʼ, heetanqebʼ saʼ xbʼeenebʼ li [...] tzuul» (Salmo 72:16).

Chaabʼilaq li qochoch ut li qakʼanjel. «Ebʼ li poyanam teʼkabʼlaq ut teʼwanq chisaʼ; teʼawq uubʼ ut teʼxtzeka li ru [...] ut ebʼ li sikʼbʼilebʼ ru inbʼaan teʼxyal xsahil li xkʼanjelebʼ» (Isaias 65:21, 22).

Ma twulaq raj chaawu wank saʼ jun li Ruuchichʼochʼ joʼ aʼin? Chi seebʼ, chixjunil aʼin tkʼulmanq.

TRISI LI YAJEL UT LI KAMK

Saʼebʼ li qakutan, chiqajunilo nokooyajerk ut nokookamk, abʼan aʼin moko twanq ta chi junelik. Chi seebʼ, saʼ xkʼabʼaʼ li xkamik li Jesus, li Jehobʼa tixbʼaanu naq «chixjunil li taapaabʼanq re, inkʼaʼ taasachq, wanq bʼan xyuʼam chi junelik» (Juan 3:16). Chanruhaq li yuʼam aʼin?

Maakʼaʼaq chik li yajel. «Maajun chik saʼ qayanq tixye: “Yajin”, ut li Qaawaʼ tixkuy xmaakebʼ li wankebʼ saʼ li tenamit» (Isaias 33:24).

Maakʼaʼaq chik li kamk. «Tixsach chi junajwa xwankil li kamk. Li Qaawaʼ tixmes li xyaʼal ruhebʼ chixjunil li poyanam» (Isaias 25:8).

Teʼwanq xyuʼam chi junelik. «Li maatan li nachalk rikʼin li Yos aʼan li junelik yuʼam saʼ xkʼabʼaʼ li Kristo Jesus, li Qaawaʼ» (Romanos 6:23).

Ebʼ li kamenaq teʼwanq wiʼ chik xyuʼam. «Teʼwakliiq wiʼ chik chi yoʼyo li tiikebʼ xchʼool ut ebʼ laj maak» (Hechos 24:15). Ebʼ li kamenaq teʼxtaw ajwiʼ rusilal li maatan li kixkʼe li Yos naq kixqʼaxtesi li xyuʼam li Ralal.

Kʼaru tixbʼaanu li Yos re naq ttzʼaqloq ru chixjunil aʼin?

TIXXAQABʼ JUN CHAABʼIL AWABʼEJILAL

Li Yos troksi jun li awabʼejilal li wank saʼ choxa li kʼebʼil saʼ ruqʼ li Jesukriist re naq ttzʼaqloq ru li rajom chirixebʼ li qas qiitzʼin ut li Ruuchichʼochʼ (Salmo 110:1, 2). Aʼin ajwiʼ li awabʼejilal li kixkʼut li Jesus rehebʼ li xtzolom naq teʼxtzʼaama: «At qaYuwaʼ li wankat saʼ choxa [...] chichalq ta laanimajwal awabʼejihom» (Mateo 6:9, 10).

Li Xʼawabʼejilal li Yos tixjolomi li Ruuchichʼochʼ ut trisi chixjunil li rahil chʼoolejil ut li rahilal. Maakʼaʼ chik junaq li awabʼejilal joʼ aʼin. Joʼkan naq, li Jesus kixkʼe xchʼool chi xpuktesinkil li chaabʼil esil chirix li Xʼawabʼejilal li Yos naq kiwank saʼ li Ruuchichʼochʼ ut kixtaqla ebʼ li xtzolom chi xbʼaanunkil ajwiʼ aʼin (Mateo 4:23; 24:14).

Li Jehobʼa naxyeechiʼi qe chixjunil li maatan aʼin xbʼaan naq jwal nokooxra. Joʼkan naq, ma twulaq raj chaawu xnawbʼal ru chiʼus ut xkʼebʼal aachʼool chi wank choʼq ramiiw? Kʼaru rusilal taataw wi taabʼaanu? Qilaq saʼ li jun chik tzolom.