Cheekʼam Eere Rikʼinebʼ li Propeet: laj Miqueas
1. Kʼaru li patzʼom kixkʼoxla tana laj Miqueas naq yook chaq xbʼaanunkil li xkʼanjel li Yos ut kʼaʼut wank xwankil li esil li kixkʼe chaq?
1 Maare wank sut naqakʼoxla joqʼe tawiʼ t-osoʼq chixjunil li maaʼusilal. Ut joʼkan tana ajwiʼ kixkʼoxla laj Miqueas naq yook chaq xyebʼal rehebʼ li teep re Israel ut Juda naq li Jehobʼa tsachoq rehebʼ wi inkʼaʼ teʼxjal xnaʼlebʼ. Abʼanan kiwank tzʼaqal xwankil li puktesink li kixkʼe chaq chi naweʼk. Saʼ li chihabʼ 740 naq Toj Maajiʼ Natiklaak li Chihabʼ 1, naq toj yoʼyo chaq laj Miqueas, li Jehobʼa kixkʼe chi xtojbʼal xmaak ebʼ laj Samaria (Miq. 1:6, 7). Ut moqon chik, saʼ 607, li tenamit Jerusalen kisacheʼk (Miq. 3:12). Ut laaʼo, chanru tooruuq xkʼambʼal qe rikʼin laj Miqueas anaqwan naq yooko roybʼeninkil naq li Jehobʼa tixkʼam chaq li yalok u?
2. Kʼaʼut aajel ru naq inkʼaʼ tootitzʼq chi roybʼeninkil xkutankil li Jehobʼa, ut chanru tooruuq xbʼaanunkil aʼin?
2 Chiwanq Qakuyum. Laj Miqueas kixtzʼiibʼa: «Aʼut laaʼin kaw ninʼoybʼenink rikʼin li Qaawaʼ, kʼojkʼo linchʼool rikʼin li Yos laj kolol we» (Miq. 7:7). Aʼin moko naraj ta xyeebʼal naq kikanaak chi chunchu chi roybʼeninkil xkutankil li Jehobʼa, kixkʼe bʼan xchʼool chi xbʼaanunkil li xkʼanjel joʼ propeet. Joʼkan ajwiʼ naq yooko roybʼeninkil xkutankil li Jehobʼa, wanqo «saʼ santilal» ut yooqo chi «paabʼank» (2 Ped. 3:11, 12). Qajultikaq naq li xkuyum li Yos naxkʼe xhoonalebʼ li poyanam re naq teʼxyotʼ xchʼool ut teʼxjal xnaʼlebʼ (2 Ped. 3:9). Joʼkan bʼiʼ, qakʼamaq qe rikʼinebʼ li xkuyum ebʼ li propeet joʼ chanru naxye qe li Santil Hu (Sant. 5:10).
3. Kʼaʼut inkʼaʼ tqakanabʼ xpatzʼbʼal re li Jehobʼa li xsantil musiqʼej?
3 Qapaabʼaq naq li Jehobʼa Tixkʼe Qametzʼew. Jwal chʼaʼaj li kʼanjel li kikʼeheʼk re laj Miqueas, joʼkan naq kixpatzʼ xtenqʼankil rikʼin li Jehobʼa re naq tkawresiiq (Miq. 3:8). Li Jehobʼa naxnaw naq naqaj qatenqʼankil, ut li Santil Hu nokooxtaqla chi tijok re xtzʼaamankil. Wi toolubʼq, li Jehobʼa tixkʼe qametzʼew re naq tooruuq xbʼaanunkil chiʼus li qakʼanjel chiru (Sal. 84:6, 8 [84:5, 7, Wy]; Is. 40:28-31). Naabʼalebʼ laj paabʼanel teʼruuq xyebʼal naq chiru naabʼal chihabʼ li Jehobʼa yook chaq xkʼebʼal qametzʼew re naq tooruuq chi kʼanjelak chiru. Joʼkan bʼiʼ, inkʼa tqakanabʼ xtzʼaamankil li xsantil musiqʼej (Luc. 11:13).
4. Kʼaru li chaabʼil eetalil kixkanabʼ qe laj Miqueas?
4 Chiru laj Miqueas xbʼaanunkil li Rajom li Jehobʼa aʼan li wank tzʼaqal xwankil chiru. Saʼ xkutankil laj Miqueas naabʼal chaq li maaʼusilal, abʼan aʼan maajunwa kixkʼoxla xtzʼeqtaanankil li Jehobʼa. Joʼkan ajwiʼ, saʼebʼ li qakutan wulaj wulaj nayaleʼk ajwiʼ rix li qapaabʼal. Joʼkan naq, qakʼehaq qachʼool chi xpaabʼankil ut xloqʼoninkil li Jehobʼa (Miq. 4:5).