Re xkʼutbʼesinkil naq oxloqʼ chaawu xjultikankil li xkamik li Jesus

1. Kʼaru tooruuq xbʼaanunkil naq twanq xjultikankil li xkamik li Jesus?

¹ Saʼ li 14 re Abril naq tjultikamanq xkamik li Jesus twanq qahoonal re xtzolbʼal ut xkʼutbʼesinkil naq oxloqʼ chiqu li rusilal li Jehobʼa. Saʼ Lucas 17:11-18 naxkʼut kʼaru naxkʼoxla li Jehobʼa ut li Jesus chirix li bʼanyoxink. Joʼ naxye arin jun ajwiʼ li winq kibʼanyoxink, usta lajeebʼebʼ keʼkʼirtasiik xbʼaan saqlep. Saʼ li kutan chaalel, li xyuʼam li Jesus li kixkʼe chaq li Jehobʼa aʼan tsachoq re chixjunil li maaʼusilal ut tixbʼaanu naq tqataw li yuʼam chi junelik. Joʼkan bʼiʼ moko tnumeʼq ta junaq kutan naq inkʼaʼ tqabʼanyoxi re li Jehobʼa chixjunil li osobʼtesihom aʼin. Abʼan, chanru toobʼanyoxinq chiru li Yos chiruhebʼ li xamaan li yooqebʼ chaq chi chalk?

2. Chanru tqatzol xbʼanyoxinkil li xkamik li Jesus?

² Qatzolaq chanru tooruuq chi bʼanyoxink. Chixjunil li wank saʼ li qakʼaʼuxl naʼeekʼasink qe chi bʼanyoxink. Wankebʼ li hu li tooxtenqʼa chi xnimankil li qarahom chirix li xkamik li Jesus, chisaʼ li hu Examinando las Escrituras Diariamente wank chi tustu ebʼ li raqal li Santil Hu li t-ilmanq chiru li xamaan naq tqajultika xkamik li Jesus, ut tqataw ajwiʼ saʼ li ajlebʼaal kutan. Us raj naq tqachʼutubʼ qibʼ joʼ junkabʼal re rilbʼal ebʼ li raqal aʼin saʼ li Santil Hu. Ut wi joʼkan tqabʼaanu, tnimanq li qarahom chirix li xkamik li Jesus ut tooxtenqʼa ajwiʼ re naq chaabʼilaq qanaʼlebʼ (2 Cor. 5:14, 15; 1 Juan 4:11).

3. Chanru tooruuq xkʼutbʼesinkil naq naqabʼanyoxi xkamik li Jesus?

³ Qakʼutbʼesihaq naq nokoobʼanyoxink. Rikʼin li qabʼaanuhom tqakʼutbʼesi naq oxloqʼ chiqu junaq li naʼlebʼ (Col. 3:15). Li winq li saqlep rix kixsikʼ li Jesus re bʼanyoxink chiru. Chi sa tana saʼ xchʼool li winq aʼin kixseeraqʼi re chixjunilebʼ naq rikʼin jun li sachbʼachʼoolej kikʼirtasiik (Luc. 6:45). Ma tootzʼaqonq chi anchal qachʼool saʼ li nimla kʼanjel saʼ xkʼabʼaʼ naq oxloqʼ chiqu li xkamik li Jesus? Tooruuq ajwiʼ xkʼutbʼesinkil naq oxloqʼ chiqu li xkamik li Jesus wi naqabʼaanu 30 malaj 50 hoonal saʼ li puktesink malaj tqakʼe xtzʼaqobʼ qahoonal chiru xqʼehil li xkamik. Ut saʼ li qʼoqyink ajwiʼ aʼin tqakʼulebʼ li qulaʼ chi anchal qachʼool ut tqasumehebʼ li xpatzʼom.

4. Kʼaru tooruuq xbʼaanunkil re naq maakʼaʼ chirahoʼq wiʼ li qachʼool naq tjultikamanq xkamik li Jesus?

⁴ Ma twanq tawiʼ saʼ li jun chik chihabʼ xjultikankil li xkamik li Jesus? (1 Cor. 11:26.) Inkʼaʼ naqanaw. Abʼan wi inkʼaʼ tqakʼe qahoonal re bʼanyoxink chiru li chihabʼ aʼin, maare inkʼaʼ chik twanq junaq chik. Ut laaʼo, ma tqakʼe qahoonal re bʼanyoxink? Us raj naq li qaatin ut li naqakʼoxla tixsahobʼresi xchʼool li Jehobʼa li kixtaqla chaq li Ralal chi kamk saʼ qakʼabʼaʼ (Sal. 19:15 [19:14, Wy]).