Chʼinaʼus yiibʼanbʼil ebʼ li akʼ tratado!
1. Kʼaru ebʼ li hu re puktesink jalan ut chʼinaʼus xyiibʼankil?
1 Saʼ li nimla chʼutam re oxibʼ kutan 2013 rehebʼ laj Testiiw re li Jehobʼa li naxkʼabʼaʼi: «Li Raatin li Yos aʼan li Yaal!» xkʼeemank qe oobʼ li akʼ tratado. Ut xkʼeheʼk ajwiʼ qe li tratado Resil li Xʼawabʼejilal li Yos ajl 38 li naxkʼabʼaʼi: Ma teʼwanq wiʼ chik xyuʼam ebʼ li kamenaq? Li waqibʼ chi hu aʼin jalan yiibʼanbʼilebʼ wiʼ ut chʼinaʼus rilbʼal. Kʼaʼut jalan yiibʼanbʼilebʼ wiʼ? Chanru tooruuq roksinkil chiʼus li xjalanil naq tqayeechiʼi chirekabʼlal?
2. Kʼaru tooxtenqʼa xbʼaanunkil ebʼ li akʼ tratado?
2 Kʼaʼut jalan yiibʼanbʼilebʼ wiʼ. Aajel ru naq tqabʼaanu li kaahibʼ chi naʼlebʼ aʼin re naq tooruuq xyeechiʼinkil chiʼus junaq li hu naq yooqo chi puktesink chirekabʼlal: 1) xbʼaanunkil li patzʼom re naq tsumenq li poyanam ut chi joʼkan ttiklaaq li seeraqʼik rikʼin, 2) xkʼutbʼal li naxkʼut li Santil Hu, 3) xkanabʼankil junaq li tasal hu re naq tril xsaʼ ut 4) xkanabʼankil junaq li patzʼom re naq saʼ jun chik kutan twanq xsumenkil ut tqakʼe qibʼ saʼ aatin rikʼin re rilbʼal joqʼe toosutqʼiiq. Li xchʼinaʼusil li tratado nokooxtenqʼa chi xbʼaanunkil li kaahibʼ chi naʼlebʼ aʼin.
3. Chanru tooruuq xyeechiʼinkil ebʼ li akʼ tratado naq yooqo chi puktesink?
3 Chanru teʼoksimanq. Naq ak xkʼeemank xsahil xchʼool, tooruuq 1) xkʼutbʼal chiru li patzʼom li wank wiibʼ oxibʼ xsumenkil, aʼin tqataw saʼ li xbʼeen perel ut tqapatzʼ re kʼaru naxkʼoxla chirix, 2) xteebʼal li tratado ut tqachʼolobʼ bʼarwiʼ naxye: «Li Santil Hu naxye». Ut wi naruhank, naru naqil xsaʼ li raqal saʼ li Santil Hu. Ut wi li poyanam wank xhoonal, tqatzʼil rix bʼarwiʼ naxye: «Chanru tooxtenqʼa xnawbʼal aʼin», 3) xyeechiʼinkil re li tratado ut naq wanq xhoonal tixchoy rilbʼal xsaʼ, 4) ut naq ak xik qe, tqakʼut chiru li patzʼom li wank saʼ raqik rubʼel li tzʼiibʼ li naxye: «Kʼoxla li patzʼom aʼin». Ut tqaye re joqʼe toosutqʼiiq re xkʼutbʼal chiru kʼaru naxchʼolobʼ li Santil Hu chirix li patzʼom.
4. Chanru tqoksi li akʼ tratado naq tqulaʼani junaq li poyanam?
4 Joʼkan ajwiʼ rulaʼaninkil wiʼ chik junaq li poyanam moko chʼaʼaj ta xbʼaanunkil. Kaʼajwiʼ tqoksi ebʼ li raqal li Santil Hu li wank toj chirix li hu aʼin re xsumenkil li patzʼom li xqakanabʼ re, naq xookʼulunk saʼ li xbʼeen sut. Ut tqakʼut chiru li jalam u chirix li folleto Li Chaabʼil Esil li wank chiru li hu aʼin. Chirix chik aʼan tqakʼut chiru li folleto aʼin ut li tzolom li naxkʼe xtzʼaqobʼ li naʼlebʼ chirix li yook wiʼ chi aatinak, ut naq tooraqeʼq tqayeechiʼi re li folleto. Wi naxkʼul, tqaye re joqʼe tooruuq chi kʼulunk re rilbʼal xsaʼ. Ut chi joʼkan tqatikibʼ xtzolbʼal li Santil Hu rikʼin. Ut wi naruhank inkʼaʼ tqakʼe re li folleto, tqakʼe bʼan re jun chik li tratado ut tqaye re joqʼe tookʼulunq wiʼ chik re xtzʼilbʼal xsaʼ.
5. Kʼaʼut jwal chaabʼil roksinkil ebʼ li tratado re xpuktesinkil li Raatin li Yos?
5 Naxqʼax 130 chihabʼ chalen naq xqatikibʼ roksinkil ebʼ li tratado saʼ li puktesink. Usta yaal naq xeʼjalaak xnimal ut rilbʼal abʼan jwal chaabʼil re xkʼeebʼal chi naweʼk li chaabʼil esilal. Anaqwan qakʼutaq chanru yiibʼanbʼilebʼ re xkʼeebʼal chi naweʼk li Raatin li Yos saʼ chixjunil li Ruuchichʼochʼ (Prov. 15:7a).