Saʼ Agosto t-uxmanq jun nimla kʼanjel

1. Kʼaru li nimla kʼanjel tbʼaanumanq saʼ chixjunil li Ruuchichʼochʼ naq yooq chaq chi nachʼok jun siʼeent chihabʼ xkʼojlajik li Xʼawabʼejilal li Yos?

¹ Naq yooq chaq chi nachʼok jun siʼeent chihabʼ xkʼojlajik li Xʼawabʼejilal li Yos, tqakʼe xloqʼal li Jehobʼa rikʼin jun li nimla kʼanjel! Chiru li po Agosto tjekʼimanq saʼ chixjunil li Ruuchichʼochʼ jun li akʼ tratado li naxkʼabʼaʼi: Bʼar tqataw xsumenkil ebʼ li xninqal ru patzʼom chirix li qayuʼam? Li tratado aʼin kʼuubʼanbʼil re naq ebʼ laj ilol hu teʼxsikʼ li xsumenkil ebʼ li xpatzʼom saʼ li Santil Hu ut naxchʼolobʼ chanru naru nekeʼtenqʼaak xbʼaan li jw.org.

2. Chanru tooruuq xkʼeebʼal xloqʼal li Jehobʼa chiru li po Agosto?

² Yalaq bʼar tkʼeemanq xloqʼal. Re naq ebʼ laj puktesinel teʼruuq xkʼeebʼal xtzʼaqobʼ li xkʼanjel chiru li Yos, kikʼuubʼamank naq ebʼ laj puktesinel li ak xeʼsubʼeʼk saʼ haʼ teʼruuq xbʼaanunkil 30 hoonal chiru li po Agosto. Saʼ xkʼabʼaʼ naq li po Agosto naxkʼam chaq oobʼ kutan Viernes, Sabado ut Domingo, naabʼalebʼ laj puktesinel li nekeʼkʼanjelak malaj li nekeʼtzolok wulaj wulaj teʼruuq xbʼaanunkil li kʼanjel aʼin. Wi junaq laatzolom malaj jun rehebʼ laakokʼal ak naruuk raj chi elk saʼ li puktesink, aatinan saʼ junpaat rikʼin li nakʼuubʼank re li kʼanjel saʼ xyanqebʼ li cheekel winq. Wi joʼkan taabʼaanu, sahaq saʼ xchʼool naq t-oq chi kʼanjelak choʼq aj puktesinel chiru li po aʼin! Naabʼalebʼ laj puktesinel li nekeʼxbʼaanu 70 hoonal naq nekeʼtzʼaqlok xhoonalebʼ, nekeʼhilank chiru li po aʼin. Abʼan naru nekeʼxkʼuubʼ li xhoonalebʼ re naq teʼruuq chi tzʼaqonk saʼ li nimla kʼanjel aʼin. Us raj naq ebʼ li junkabʼal ak yooqebʼ xkʼoxlankil chanru teʼtzʼaqonq re xkʼeebʼal xloqʼal li Jehobʼa chiru li po Agosto (Esd. 3:11; Prov. 15:22).

3. Kʼaru naqoybʼeni rikʼin li nimla kʼanjel aʼin?

³ Usta ak xqabʼaanu li kʼanjel aʼin saʼ junaq kutan, naqoybʼeni naq jwal nimaq li kʼanjel aʼin chiru li ak xqabʼaanu chaq. Ma wanq naabʼal li hoonal, laj puktesinel ut li teʼxbʼaanu 50 malaj 30 hoonal chiru li po Agosto? Naq yooq chaq chi raqeʼk li qakʼanjel chiru li chihabʼ 2014, li Jehobʼa t-osobʼtesinq re li kʼanjel saʼ chixjunil li Ruuchichʼochʼ re naq yalaq bʼar twulaq li nimla kʼanjel aʼin (Mat. 24:14).