Chixjunil li nakʼanjelak re kʼutuk
1. Kʼaru xjuntaqʼeetalil ebʼ laj paabʼanel rikʼinebʼ laj tzʼak?
1 Ebʼ laj tzʼak nekeʼroksi jalan jalanq li kʼanjelobʼaal. Wankebʼ li kʼanjelobʼaal moko nekeʼoksimank ta junelik ut wank junes aʼan naʼoksimank. Ebʼ laj tzʼak li nekeʼxnaw kʼanjelak junelik nekeʼxkʼam chirixebʼ li kʼanjelobʼaal li nekeʼroksi chi rajlal. Li Santil Hu naxye naq tento tqakʼe qachʼool chi puktesink. Naʼajmank naq ebʼ laj Testiiw chanchanaqebʼ «laj kʼanjel li maakʼaʼ kʼaru taaxutaanaq wiʼ» (2 Tim. 2:15). Bʼar wank rehebʼ li kʼanjelobʼaal li wank tzʼaqal xwankil li naqoksi saʼ li puktesink? Li Santil Hu, ut aʼan li naqoksi re xtzolbʼalebʼ li qas qiitzʼin (Mat. 28:19, 20). Joʼkan bʼiʼ, tento tqakʼe qachʼool chi roksinkil chiʼus «li Aatin re li yaal». Abʼanan, chiqajunilo joʼ aj paabʼanel tento tqatzol roksinkil chiʼus li nakʼanjelak chiqu re xkʼutbʼal li yaal chiruhebʼ li qas qiitzʼin (Prov. 22:29).
2. Bʼar wank rehebʼ li kʼanjelobʼaal li nekeʼkʼanjelak re kʼutuk?
2 Chixjunil li nakʼanjelak re kʼutuk. Joʼ xqaye, li Santil Hu jwal nakʼanjelak chiqu, abʼan kʼaru chik nakʼanjelak chiqu? Li tasal hu Kʼaru Tzʼaqal Naxchʼolobʼ li Santil Hu? li hu aʼin naqoksi chiʼus re xtzolbʼalebʼ li qas qiitzʼin. Naq nokooraqeʼk xtzolbʼal li tasal hu aʼin rikʼin li qatzolom, naqatikibʼ xtzolbʼal li tasal hu Chexwanq Junelik saʼ «Xrahom li Yos» re naq li tzolom tixtzol xyuʼaminkil li naʼlebʼ li wank saʼ li Santil Hu. Joʼkan naq, aajel ru naq tqanaw ut tqatzol roksinkil chiʼus li wiibʼ chi tasal hu aʼin. Saʼ chixjunil li nakʼanjelak chiqu re kʼutuk aajel ajwiʼ ru naq tqakʼe chisaʼ wiibʼ oxibʼ rehebʼ li folleto. Joʼ Li Chaabʼil Esil li Nachalk Rikʼin li Yos nakʼanjelak re xtikibʼankil junaq li tzolom. Wi saʼ li qateep wankebʼ li qas qiitzʼin li inkʼaʼ nekeʼxnaw ilok ru hu chiʼus malaj nekeʼaatinak saʼ junaq li aatinobʼaal li moko wank ta ebʼ li tasal hu, ut wi wank, maare moko naabʼal ta, aran naqoksi ebʼ li tasal hu Chaapaabʼ li Yos malaj Chaapaabʼ li Yos re naq Twanq Aayuʼam chi Junelik. Jun chik rehebʼ li kʼanjelobʼaal li jwal us re kʼutuk aʼan Anihebʼ Yookebʼ Xbʼaanunkil li Rajom li Jehobʼa saʼebʼ li Qakutan?, li hu aʼin naxkʼut chirix li qamolam. Ebʼ li bʼideo nekeʼkʼanjelak ajwiʼ re xtzolbʼalebʼ li qas qiitzʼin ut tento tqatzol roksinkil. Wiibʼ oxibʼ rehebʼ li bʼideo aʼin Kʼaʼut Us naq Tattzoloq Chirix li Santil Hu?, Kʼaru nabʼaanumank saʼebʼ li Chʼutlebʼaal Kabʼl rehebʼ laj Testiiw? ut Chanru natzolmank li Santil Hu?
3. Kʼaru tqatzol saʼebʼ li hu Li Qakʼanjel Chirix li Yos li t-elq moqon?
3 Saʼebʼ li hu Li Qakʼanjel Chirix li Yos, li t-elq moqon, tqatzol chanru roksinkil chiʼus ebʼ li tasal hu li naqoksi re kʼutuk. Wi naqakʼe qachʼool chi roksinkil chiʼus, yooqo xpaabʼankil li naʼlebʼ aʼin li naxkʼe li Santil Hu: «Chakʼe reetal chi us li kʼaru yookat chi xkʼutbʼal; jiiqʼaq aachʼool chi xbʼaanunkil aʼan: wi joʼkan taabʼaanu, taakol aawibʼ laaʼat joʼebʼ ajwiʼ li teʼabʼinq aawe» (1 Tim. 4:16).